కలెక్టర్ ఆధ్వర్యంలో ఆరు నెలల ఉచిత శిక్షణ, అర్హులైన అవివాహిత బాలికల నుంచి దరఖాస్తుల ఆహ్వానం
దిక్సూచి, పెద్దపల్లి, జూలై 13: పెద్దపల్లి జిల్లాకు చెందిన అర్హులైన అవివాహిత యువతులకు ఎయిర్ హోస్టెస్–ఎయిర్‌పోర్ట్ గ్రౌండ్ స్టాఫ్ విభాగాల్లో శిక్షణ అందించేందుకు దరఖాస్తులు ఆహ్వానిస్తున్నట్లు జిల్లా యువజన మరియు క్రీడల శాఖ అధికారి ఎ. సురేశ్ తెలిపారు.
జిల్లా కలెక్టర్ ఆధ్వర్యంలో ప్రభుత్వ పాఠశాలలు, ప్రభుత్వ కళాశాలల్లో చదివి ఇంటర్మీడియట్ ఉత్తీర్ణులైన 17 నుంచి 24 సంవత్సరాల మధ్య వయస్సు గల అవివాహిత బాలికలకు మాత్రమే ఆరు నెలల శిక్షణ అందించనున్నట్లు పేర్కొన్నారు.
శిక్షణ మొత్తం వ్యయం రూ.1.42 లక్షలు కాగా, అభ్యర్థులు హాస్టల్ ఫీజుగా నెలకు రూ.5,500 చొప్పున ఆరు నెలలకు మొత్తం రూ.33 వేల మాత్రమే చెల్లించాల్సి ఉంటుందని తెలిపారు. మిగిలిన రూ.1.09 లక్షల శిక్షణ వ్యయాన్ని పెద్దపల్లి జిల్లా కలెక్టర్ భరిస్తారని వెల్లడించారు.
శిక్షణ విజయవంతంగా పూర్తి చేసిన అభ్యర్థులకు విమానాశ్రయాల్లో ప్యాసింజర్ సర్వీస్ అసిస్టెంట్ (PSA), బ్యాగేజ్ హ్యాండ్లింగ్ సర్వీస్ (BHS), డిజీ బడ్డి (Digi Buddy) తదితర విభాగాల్లో ఉద్యోగ అవకాశాలు కల్పించనున్నట్లు తెలిపారు. ఎంపికైన వారికి ప్రారంభ వేతనం నెలకు రూ.14 వేల నుంచి రూ.25 వేల వరకు ఉండే అవకాశం ఉందన్నారు.
ఈ అవకాశాన్ని పెద్దపల్లి జిల్లాకు చెందిన అర్హులైన యువతులు సద్వినియోగం చేసుకోవాలని జిల్లా యువజన మరియు క్రీడల శాఖ అధికారి ఎ. సురేశ్, జిల్లా ఇంటర్మీడియట్ విద్యాధికారి (డీఐఈఓ) కల్పన కోరారు. మరిన్ని వివరాలకు 99639 60063 నంబర్‌ను సంప్రదించాలని సూచించారు.
కామెంట్‌లు లేవు:
కామెంట్‌ను పోస్ట్ చేయండి