కరీంనగర్‌లో సంబరాలు

 

ఇందిరా చౌక్‌లో భారీ కేక్‌ కట్‌.. పేదలకు ఆహార ప్యాకెట్ల పంపిణీ

కరీంనగర్‌, సెప్టెంబర్‌ 5: తెలంగాణలో కాంగ్రెస్‌ ప్రజా ప్రభుత్వం 1000 రోజుల పాలన పూర్తి చేసుకున్న సందర్భంగా కరీంనగర్‌ జిల్లా కాంగ్రెస్‌ ఆధ్వర్యంలో శనివారం ఇందిరా చౌక్‌ వద్ద ఘనంగా సంబరాలు నిర్వహించారు. జిల్లా కాంగ్రెస్‌ అధ్యక్షుడు, చొప్పదండి ఎమ్మెల్యే డా. మేడిపల్లి సత్యం ఆధ్వర్యంలో నిర్వహించిన కార్యక్రమంలో నాయకులు, కార్యకర్తలు పెద్ద సంఖ్యలో పాల్గొన్నారు.

బాణాసంచా కాల్చి, డీజే పాటలతో కాంగ్రెస్‌ శ్రేణులు సందడి చేశారు. అనంతరం భారీ కేక్‌ కట్‌ చేసి సంబరాలు జరుపుకున్నారు. జిల్లా కాంగ్రెస్‌ ప్రధాన కార్యదర్శి రూపురెడ్డి కశ్యప్‌రెడ్డి సహకారంతో ఏర్పాటు చేసిన ఆహార ప్యాకెట్లను డా. మేడిపల్లి సత్యం పేదలకు పంపిణీ చేశారు.

ఈ సందర్భంగా మేడిపల్లి సత్యం మాట్లాడుతూ.. పదేళ్ల బీఆర్‌ఎస్‌ పాలనకు చరమగీతం పాడి కాంగ్రెస్‌ ప్రజా ప్రభుత్వం ఏర్పడి 1000 రోజులు పూర్తయిందన్నారు. ఈ కాలంలో 7 లక్షల ఇందిరమ్మ ఇళ్లు, 15 లక్షల కొత్త రేషన్‌ కార్డులు మంజూరు చేశామని తెలిపారు. 53 లక్షల కుటుంబాలకు 200 యూనిట్ల ఉచిత విద్యుత్‌, 43 లక్షల కుటుంబాలకు చేయూత పింఛన్లు అందిస్తున్నామని పేర్కొన్నారు.

మహిళలకు ఆర్టీసీలో ఉచిత ప్రయాణం, రూ.500కే గ్యాస్‌ సిలిండర్‌, 25 లక్షల మంది రైతులకు రూ.2 లక్షల రుణమాఫీ, సన్న వడ్లకు రూ.500 బోనస్‌ వంటి పథకాలను అమలు చేస్తున్నామని తెలిపారు. 1000 రోజుల్లో 70 వేలకు పైగా ప్రభుత్వ ఉద్యోగాలు భర్తీ చేశామని, మిగిలిన ఖాళీలకు కూడా నోటిఫికేషన్లు జారీ చేస్తామని అన్నారు.

1000 రోజులుగా ప్రజల్లోకి రాకుండా ఫామ్‌హౌస్‌కే పరిమితమైన మాజీ సీఎం కేసీఆర్‌ తక్షణమే రాజీనామా చేయాలని మేడిపల్లి సత్యం డిమాండ్‌ చేశారు. బీఆర్‌ఎస్‌ నేతలు నిరాశతో విమర్శలు చేస్తున్నారని, వచ్చే ఎన్నికల్లోనూ ప్రజలు కాంగ్రెస్‌ వైపే నిలుస్తారని ధీమా వ్యక్తం చేశారు.

కార్యక్రమంలో కార్పొరేషన్‌ కాంగ్రెస్‌ అధ్యక్షుడు వైద్యుల అంజన్‌కుమార్‌, హుజూరాబాద్‌ నియోజకవర్గ ఇన్‌చార్జి ఒడితెల ప్రణవ్‌బాబు, పీసీసీ ప్రధాన కార్యదర్శి రహమత్‌ హుస్సేన్‌, కోమటిరెడ్డి నరేందర్‌రెడ్డి, ఆరెపల్లి మోహన్‌, ఆల్ఫోర్స్‌ నరేందర్‌రెడ్డి తదితరులు పాల్గొన్నారు.

కరీంనగర్‌లో కాంగ్రెస్‌ 1000 రోజుల ప్రజా పాలన సంబరాలు

 

ఇందిరా చౌక్‌ నుంచి అంబేద్కర్‌ చౌక్‌ వరకు భారీ బైక్‌ ర్యాలీ

దిక్సూచి, కరీంనగర్‌, సెప్టెంబర్‌ 4: ముఖ్యమంత్రి రేవంత్‌రెడ్డి నేతృత్వంలోని కాంగ్రెస్‌ ప్రజా ప్రభుత్వం 1000 రోజుల పాలన పూర్తయిన సందర్భంగా కరీంనగర్‌లో కాంగ్రెస్‌ శ్రేణులు ఘనంగా సంబరాలు నిర్వహించాయి. కరీంనగర్‌ కార్పొరేషన్‌ కాంగ్రెస్‌ ఆధ్వర్యంలో ఇందిరా చౌక్‌ వద్ద కార్యక్రమం నిర్వహించి, అనంతరం నగరంలో భారీ బైక్‌ ర్యాలీ చేపట్టారు.

ఇందిరా చౌక్‌ నుంచి ప్రారంభమైన ర్యాలీ రాజీవ్‌ చౌక్‌, గాంధీ చౌక్‌, బాబు జగ్జీవన్‌రామ్‌ చౌక్‌ మీదుగా అంబేద్కర్‌ చౌక్‌ వరకు కొనసాగింది. కాంగ్రెస్‌ నాయకులు, కార్యకర్తలు పెద్ద సంఖ్యలో పాల్గొన్నారు.

ఈ సందర్భంగా కార్పొరేషన్‌ కాంగ్రెస్‌ అధ్యక్షుడు వైద్యుల అంజన్‌కుమార్‌ మాట్లాడుతూ.. కాంగ్రెస్‌ ప్రజా పాలనలో అభివృద్ధి, సంక్షేమ ఫలాలు పేదలకు అందుతున్నాయని అన్నారు. ఇందిరమ్మ ఇళ్లు, రైతు రుణమాఫీ, రైతు భరోసా, 200 యూనిట్ల ఉచిత విద్యుత్‌, ప్రభుత్వ ఉద్యోగాల భర్తీ వంటి కార్యక్రమాలతో ప్రజలకు ప్రయోజనం కలుగుతోందన్నారు.

మహాలక్ష్మి, గృహజ్యోతి, చేయూత పథకాలతో ప్రజల జీవితాల్లో మార్పు తీసుకొచ్చామని తెలిపారు. గతంలో మాదిరిగా ఫామ్‌హౌస్‌ పాలన కాకుండా ప్రజల గడప వద్దకు పాలన చేరిందని వ్యాఖ్యానించారు. విద్య, వైద్యం, ఉపాధి రంగాల్లో రాష్ట్రాన్ని మరింత అభివృద్ధి చేస్తామని పేర్కొన్నారు.

కార్యక్రమంలో జిల్లా గ్రంథాలయ సంస్థ చైర్మన్‌ సత్తు మల్లేశం, మాజీ ఎమ్మెల్యే ఆరెపల్లి మోహన్, మాజీ సుడా చైర్మన్‌ కోమటిరెడ్డి నరేందర్‌రెడ్డి, కాంగ్రెస్‌ నాయకులు ఆల్‌ఫోర్స్‌ నరేందర్‌రెడ్డి, పురుమల్ల శ్రీనివాస్‌ తదితరులు పాల్గొన్నారు.

తెలంగాణ రైజింగ్‌ గ్లోబల్‌ సమ్మిట్‌ ఏర్పాట్లు పకడ్బందీగా చేపట్టాలి

 

పెట్టుబడులు, పరిశ్రమలు, యువతకు ఉపాధే లక్ష్యం: మంత్రి శ్రీధర్‌బాబు

దిక్సూచి, హైదరాబాద్‌:

రాష్ట్ర ప్రభుత్వం డిసెంబర్‌ 7, 8, 9 తేదీల్లో ప్రతిష్ఠాత్మకంగా నిర్వహించనున్న ‘తెలంగాణ రైజింగ్‌ గ్లోబల్‌ సమ్మిట్‌–2026’ ఏర్పాట్లపై ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు ఉన్నతస్థాయి సమీక్ష నిర్వహించారు. శనివారం ఆబిడ్స్‌లోని ఇండస్ట్రీస్‌ డైరెక్టర్‌ కార్యాలయంలో జరిగిన సమావేశంలో సమ్మిట్‌ ఏర్పాట్లు, రోడ్‌షోలు, ఎంవోయూలు, ప్రచారం, లాజిస్టిక్స్‌, ప్రోటోకాల్‌ తదితర అంశాలపై అధికారులకు దిశానిర్దేశం చేశారు. 

ప్రపంచస్థాయి పెట్టుబడులను ఆకర్షించి, కొత్త పరిశ్రమల ఏర్పాటుతో రాష్ట్ర యువతకు భారీగా ఉపాధి అవకాశాలు కల్పించడమే ప్రభుత్వ ప్రధాన సంకల్పమని శ్రీధర్‌బాబు తెలిపారు. తెలంగాణను పెట్టుబడులకు మరింత ఆకర్షణీయ గమ్యస్థానంగా తీర్చిదిద్దేందుకు గ్లోబల్‌ సమ్మిట్‌ను పూర్తిస్థాయిలో సద్వినియోగం చేసుకోవాలని సూచించారు.

ఈజ్‌ ఆఫ్‌ డూయింగ్‌ బిజినెస్‌లో తెలంగాణను ఇతర రాష్ట్రాలకు రోల్‌మోడల్‌గా నిలిపేలా కొత్త విధానాలను రూపొందిస్తున్నామని మంత్రి తెలిపారు. తెలంగాణ బ్రాండ్‌ ఇమేజ్‌ను అంతర్జాతీయ స్థాయికి తీసుకెళ్లేలా దేశీయ, విదేశీ స్థాయిలో విస్తృత ప్రచారం కల్పించేందుకు ప్రత్యేక రోడ్‌షోలు నిర్వహించనున్నట్లు వెల్లడించారు.

సమ్మిట్‌ వేదికగా తెలంగాణలో పెట్టుబడులకు ఉన్న అవకాశాలు, పరిశ్రమల ఏర్పాటుకు అనుకూల పరిస్థితులను పారిశ్రామికవేత్తలకు వివరించేలా ప్రత్యేక ఏర్పాట్లు చేస్తున్నామని చెప్పారు. గతంలో కుదిరిన ఎంవోయూలు కేవలం ఒప్పందాలకే పరిమితం కాకుండా క్షేత్రస్థాయిలో పెట్టుబడులుగా, పరిశ్రమలుగా రూపుదిద్దుకునేలా ప్రత్యేక చర్యలు తీసుకుంటున్నామని తెలిపారు. ప్రతి ఎంవోయూపై ఎప్పటికప్పుడు పకడ్బందీగా ఫాలోఅప్‌ చేయాలని అధికారులను ఆదేశించారు.

భారీగా ఉద్యోగ, ఉపాధి అవకాశాలు కల్పించే రంగా
లకు సమ్మిట్‌లో అత్యధిక ప్రాధాన్యం ఇవ్వనున్నట్లు మంత్రి వెల్లడించారు. విదేశీ ప్రతినిధులు, పారిశ్రామిక దిగ్గజాలకు ఎలాంటి అసౌకర్యం కలగకుండా లాజిస్టిక్స్‌, ప్రోటోకాల్‌, హాస్పిటాలిటీ ఏర్పాట్లపై ప్రత్యేక దృష్టి సారించాలని సూచించారు.

శాఖల మధ్య సమన్వయం లోపించకుండా ప్రతి శాఖకు స్పష్టమైన బాధ్యతలు, టైమ్‌లైన్లు నిర్దేశించామని, ప్రత్యేక కమిటీలను ఏర్పాటు చేసినట్లు తెలిపారు. సమ్మిట్‌ ఏర్పాట్లపై ఎప్పటికప్పుడు సమీక్ష నిర్వహిస్తూ, నిర్దేశిత గడువులో అన్ని పనులు పూర్తయ్యేలా ప్రత్యేక కార్యాచరణ అమలు చేస్తున్నామని శ్రీధర్‌బాబు పేర్కొన్నారు.

వర్షాకాల అసెంబ్లీ సమావేశాలకు పకడ్బందీ ఏర్పాట్లు

 

5 నుంచి ప్రారంభం

నిర్వహణ, వసతులు, భద్రతపై ఉన్నతస్థాయి సమీక్ష

దిక్సూచి ప్రతినిధి, హైదరాబాద్‌, సెప్టెంబర్‌ 5: సోమవారం నుంచి ప్రారంభం కానున్న తెలంగాణ శాసనసభ వర్షాకాల సమావేశాల నేపథ్యంలో సభ నిర్వహణకు సంబంధించిన ఏర్పాట్లపై ప్రభుత్వం ప్రత్యేక దృష్టి సారించింది. సమావేశాల నిర్వహణ, శాసనసభ్యులకు అవసరమైన వసతులు, భద్రతా చర్యలు, ఇతర శాఖల సమన్వయంపై శనివారం ఉన్నతస్థాయి సన్నాహక సమావేశం నిర్వహించారు.  

శాసనసభ వ్యవహారాల శాఖ మంత్రి దుద్దిళ్ల శ్రీధర్‌బాబు ఆధ్వర్యంలో జరిగిన ఈ సమావేశంలో శాసనసభాపతి గడ్డం ప్రసాద్‌కుమార్, శాసనమండలి చైర్మన్ గుత్తా సుఖేందర్‌రెడ్డి, మండలి డిప్యూటీ చైర్మన్ బండా ప్రకాశ్, మండలి చీఫ్‌విప్ పట్నం మహేందర్‌రెడ్డి, రాష్ట్ర ప్రభుత్వ ప్రధాన కార్యదర్శి సంజయ్‌ జాజుతో పాటు వివిధ శాఖల ఉన్నతాధికారులు పాల్గొన్నారు.

సమావేశాల్లో ఎలాంటి ఇబ్బందులు తలెత్తకుండా అన్ని ఏర్పాట్లను ముందుగానే పూర్తి చేయాలని అధికారులు, సంబంధిత శాఖలకు సూచనలు చేశారు. శాసనసభ, శాసనమండలి సమావేశాలు సజావుగా సాగేందుకు అవసరమైన మౌలిక వసతులు, సభ్యులకు కల్పించాల్సిన సౌకర్యాలు, సభా ప్రాంగణంలో నిర్వహణ తదితర అంశాలపై చర్చించారు.

అదేవిధంగా సమావేశాల సందర్భంగా భద్రతకు అత్యంత ప్రాధాన్యం ఇవ్వాలని నిర్ణయించారు. శాసనసభ ప్రాంగణం, పరిసర ప్రాంతాల్లో భద్రతా ఏర్పాట్లను పటిష్టం చేయడంతో పాటు ట్రాఫిక్‌ నియంత్రణ, వాహనాల రాకపోకలు, ప్రజలు, సందర్శకుల భద్రతకు సంబంధించిన అంశాలపై కూడా అధికారులు సమన్వయంతో పనిచేయాలని సూచించారు.

వర్షాకాల సమావేశాలకు హాజరయ్యే మంత్రులు, ఎమ్మెల్యేలు, ఎమ్మెల్సీలు, అధికారులు, మీడియా ప్రతినిధులకు అవసరమైన సౌకర్యాలు అందుబాటులో ఉండేలా చర్యలు చేపట్టాలని సమావేశంలో సూచించినట్లు సమాచారం. వివిధ ప్రభుత్వ శాఖల మధ్య సమన్వయం కొనసాగిస్తూ సమావేశాలు ప్రశాంతంగా, సమర్థవంతంగా జరిగేలా ముందస్తు చర్యలు తీసుకోవాలని నిర్ణయించారు.

ప్రజా సమస్యలు, ప్రభుత్వ విధానాలు, వివిధ అంశాలపై చర్చకు వేదిక కానున్న శాసనసభ వర్షాకాల సమావేశాలను విజయవంతంగా నిర్వహించేందుకు ప్రభుత్వం అన్ని ఏర్పాట్లను పూర్తి చేస్తోంది.

నిరుపేద కుటుంబానికి ఇందిరమ్మ ఇల్లు.. నూతన గృహప్రవేశం

 

దిక్సూచి, మంథని, సెప్టెంబర్‌ 5: 

కాంగ్రెస్‌ ప్రజా ప్రభుత్వం నిరుపేదల సంక్షేమానికి ప్రాధాన్యం ఇస్తోందని మండల కాంగ్రెస్‌ అధ్యక్షుడు అయిలి ప్రసాద్ అన్నారు. మంత్రి దుద్దిళ్ల శ్రీధర్‌బాబు ఆశీస్సులతో మంథని నియోజకవర్గం కాకర్లపల్లి గ్రామానికి చెందిన దివంగత దొబ్బల చంద్రయ్య కుటుంబానికి ఇందిరమ్మ ఇల్లు మంజూరైంది. ఇందిరమ్మ ఇంటి నిర్మాణం పూర్తికావడంతో శనివారం కుటుంబ సభ్యులతో కలిసి నిర్వహించిన నూతన గృహప్రవేశ కార్యక్రమాన్ని అయిలి ప్రసాద్ ప్రారంభించారు. ఈ సందర్భంగా ఆయన మాట్లాడుతూ.. నిరుపేద కుటుంబాల్లో ఆనందం నింపడమే కాంగ్రెస్‌ ప్రజా ప్రభుత్వ లక్ష్యమన్నారు.   

ఇందిరమ్మ ఇళ్ల మంజూరు విషయంలో ఎవరూ లంచం ఇవ్వొద్దని, ఎవరైనా ఇబ్బందులకు గురిచేస్తే క్యాంపు కార్యాలయంలో లేదా తనను నేరుగా సంప్రదించాలని సూచించారు. మంత్రి శ్రీధర్‌బాబు మంథని ప్రాంత అభివృద్ధికి నిరంతరం కృషి చేస్తున్నారని తెలిపారు.

ప్రజలకు తెల్ల రేషన్‌ కార్డులు, ఇందిరమ్మ ఇళ్లు, 200 యూనిట్ల ఉచిత విద్యుత్‌, రూ.10 లక్షల ఆరోగ్యశ్రీ, రూ.2 లక్షల రుణమాఫీ వంటి సంక్షేమ పథకాలు అందుతున్నాయని, రానున్న రోజుల్లో మరిన్ని అభివృద్ధి కార్యక్రమాలు చేపడతామని పేర్కొన్నారు.

కార్యక్రమంలో సోషల్‌ మీడియా ఇన్‌చార్జి ఆరెల్లి కిరణ్‌గౌడ్‌, ఉపసర్పంచ్‌ ఆకుల ప్రత్యూష సాయి, మార్కెట్‌ కమిటీ డైరెక్టర్‌ కన్నెబోయిన ఓదెలు, మాజీ చైర్మన్‌ ఆకుల కిరణ్‌, కాంగ్రెస్‌ నాయకులు, యువజన నాయకులు, కార్యకర్తలు పాల్గొన్నారు.