సెమీ కండక్టర్‌ తయారీలో పెట్టుబడులు పెట్టేలా జర్మనీ కంపెనీలను ప్రోత్సహించండి
తెలంగాణ–జర్మనీ లాజిస్టిక్‌ కారిడార్‌కు సహకరించండి
జర్మన్‌ ఇండియన్‌ బిజినెస్‌ అలయన్స్‌ ప్రతినిధులను కోరిన మంత్రి దుద్దిళ్ల శ్రీధర్‌బాబు
దిక్సూచి, హైదరాబాద్:
కెల్‌స్టర్‌బాక్‌ నగర మేయర్‌ మాన్‌ఫ్రెడ్‌ ఓకెల్‌ నేతృత్వంలోని జీఐబీఏ ప్రతినిధులు సోమవారం డా. బీఆర్‌ అంబేద్కర్‌ తెలంగాణ సచివాలయంలో మంత్రి శ్రీధర్‌బాబును మర్యాదపూర్వకంగా కలిశారు. ఈ సందర్భంగా తెలంగాణలో పెట్టుబడులకు ఉన్న అవకాశాలు, రాష్ట్ర ప్రభుత్వం కల్పిస్తున్న మౌలిక వసతులు, పరిశ్రమలకు అందిస్తున్న ప్రోత్సాహకాలను మంత్రి వారికి వివరించారు.
పలు రంగాల్లో పెట్టుబడులకు అవకాశాలు
సెమీ కండక్టర్స్‌తో పాటు లైఫ్‌ సైన్సెస్‌, ఏరోస్పేస్‌, డిఫెన్స్‌, ఎలక్ట్రానిక్స్‌, అధునాతన తయారీ, ప్రెసిషన్‌ ఇంజినీరింగ్‌, ఆటోమొబైల్‌, ఆటోమేషన్‌ వంటి రంగాల్లో తెలంగాణలో భారీ పెట్టుబడులకు అనుకూల పరిస్థితులు ఉన్నాయని శ్రీధర్‌బాబు తెలిపారు. ప్రపంచ స్థాయి పరిశ్రమలకు అవసరమైన నైపుణ్యం కలిగిన మానవ వనరులు, అభివృద్ధి చెందిన పారిశ్రామిక వ్యవస్థ, హైదరాబాద్ కేంద్రంగా ఉన్న సాంకేతిక నైపుణ్యం రాష్ట్రానికి బలమని పేర్కొన్నారు.
పరిశ్రమల ఏర్పాటుకు వేగవంతమైన అనుమతులు, మౌలిక వసతులు, పెట్టుబడి ప్రోత్సాహకాలు, నైపుణ్యాభివృద్ధి తదితర అంశాల్లో రాష్ట్ర ప్రభుత్వం పూర్తి సహకారం అందించేందుకు సిద్ధంగా ఉందన్నారు.
జర్మనీ సాంకేతికత–తెలంగాణ నైపుణ్యం అనుసంధానం
జర్మనీ కంపెనీల అధునాతన సాంకేతిక పరిజ్ఞానం, ప్రెసిషన్‌ ఇంజినీరింగ్‌, అడ్వాన్స్‌డ్‌ మ్యాన్యుఫ్యాక్చరింగ్‌ సామర్థ్యాలను తెలంగాణలోని నైపుణ్యవంతమైన మానవ వనరులు, పారిశ్రామిక వ్యవస్థతో అనుసంధానం చేయడానికి ప్రభుత్వం సిద్ధంగా ఉందని మంత్రి చెప్పారు. ఇరు ప్రాంతాల మధ్య సాంకేతిక, పారిశ్రామిక భాగస్వామ్యాన్ని మరింత బలోపేతం చేయాలని ఆకాంక్షించారు.
తెలంగాణ–జర్మనీ లాజిస్టిక్‌ కారిడార్‌
తెలంగాణలో తయారయ్యే ఉత్పత్తులు జర్మనీతో పాటు యూరప్‌ మార్కెట్లకు వేగంగా చేరుకునేలా ‘తెలంగాణ–జర్మనీ’ ప్రత్యేక లాజిస్టిక్‌ కారిడార్‌ ఏర్పాటుకు చొరవ చూపాలని జీఐబీఏ ప్రతినిధులను శ్రీధర్‌బాబు కోరారు. ఎగుమతుల రంగాన్ని మరింత బలోపేతం చేయడానికి మెరుగైన రవాణా, సరఫరా వ్యవస్థలు కీలకమని అన్నారు.
