 |
రూ.2 లక్షల లంచం తీసుకుంటూ రెడ్‌హ్యాండెడ్‌గా పట్టుబడ్డ సతీష్ వీడియో
దిక్సూచి ప్రతినిధి, పెద్దపల్లి | జూలై 14
పెద్దపల్లి జిల్లాలో అవినీతిపై అవినీతి నిరోధక శాఖ (ఏసీబీ) అధికారులు మరోసారి ఉక్కుపాదం మోపారు. పెద్దపల్లి మున్సిపాలిటీలో అసిస్టెంట్ ఇంజినీర్ (ఏఈ)గా పనిచేస్తున్న సతీష్‌ను రూ.2 లక్షల లంచం తీసుకుంటున్న సమయంలో మంగళవారం ఏసీబీ అధికారులు రెడ్‌హ్యాండెడ్‌గా పట్టుకున్నారు.
మున్సిపల్ పరిధిలో చేపట్టిన అభివృద్ధి పనులకు సంబంధించిన బిల్లులు విడుదల చేయడానికి కాంట్రాక్టర్ బత్తుల శ్రీను నుంచి రూ.2 లక్షలు లంచంగా డిమాండ్ చేసినట్లు సమాచారం. బాధితుడు ఏసీబీ అధికారులను ఆశ్రయించడంతో పక్కా ప్రణాళిక ప్రకారం ఉచ్చు వేసిన అధికారులు, డబ్బు స్వీకరిస్తున్న సమయంలో సతీష్‌ను అదుపులోకి తీసుకున్నారు.
కరీంనగర్ ఏసీబీ డీఎస్పీ మహేందర్ రెడ్డి ఆధ్వర్యంలో నిర్వహించిన ఈ ఆపరేషన్‌లో ఇన్‌స్పెక్టర్లు, సిబ్బంది పాల్గొన్నారు. తొలుత ఏఈ సతీష్‌ను ఆయన నివాసం వద్ద అదుపులోకి తీసుకుని, అనంతరం పెద్దపల్లి మున్సిపల్ కార్యాలయానికి తరలించి సంబంధిత రికార్డులను పరిశీలించారు.
ఈ ఘటనతో పెద్దపల్లి మున్సిపల్ కార్యాలయంలో ఒక్కసారిగా కలకలం రేగింది. ప్రభుత్వ ఉద్యోగులు అవినీతికి పాల్పడితే చట్టపరమైన చర్యలు తప్పవని ఏసీబీ అధికారులు మరోసారి హెచ్చరించారు. ఈ కేసులో విచారణ కొనసాగుతోంది.
కామెంట్‌లు లేవు:
కామెంట్‌ను పోస్ట్ చేయండి