మూగబోయిన కోకిల గానం

జానకమ్మ ఇక లేరు..

భారతీయ సినీ సంగీత ప్రపంచంలో ఒక స్వర్ణయుగానికి ప్రతీకగా నిలిచిన ప్రముఖ నేపథ్య గాయనీ ఎస్. జానకి ఇక లేరు. ఎనిమిది దశాబ్దాల పాటు తన అపూర్వ గానమాధుర్యంతో కోట్లాది మంది సంగీతాభిమానులను అలరించిన ఆమె మరణం సంగీత ప్రపంచానికి తీరని లోటు.

1957లో సినీ గానరంగంలో అడుగుపెట్టిన జానకమ్మ, తెలుగు, తమిళం, కన్నడ, మలయాళం, హిందీతో పాటు అనేక భారతీయ భాషల్లో వేలాది పాటలు ఆలపించారు. ప్రేమ, విరహం, భక్తి, జానపదం, శృంగారం, విషాదం... ఏ భావాన్నైనా తన గాత్రంలో జీవింపజేయడం ఆమె ప్రత్యేకత. అందుకే ఆమెను అభిమానులు ప్రేమగా "దక్షిణ భారత కోకిల" అని పిలిచేవారు.

తెలుగు సినీ సంగీతంలో ఘంటసాల, ఎస్పీ బాలసుబ్రహ్మణ్యం, పి. సుశీల వంటి దిగ్గజాలతో కలిసి ఆమె ఆలపించిన ఎన్నో పాటలు నేటికీ ప్రతి ఇంట్లో మారుమోగుతూనే ఉన్నాయి. సంగీత దర్శకులు చక్రవర్తి, కె.వి. మహదేవన్, ఇళయరాజా, ఎం.ఎం. కీరవాణి వంటి ప్రముఖుల స్వరాలకు ఆమె గాత్రం ప్రాణం పోసింది.

నాలుగు జాతీయ చలనచిత్ర అవార్డులతో పాటు అనేక రాష్ట్ర ప్రభుత్వ పురస్కారాలు ఆమెను వరించాయి. పురస్కారాల కంటే ప్రజల ప్రేమనే గొప్ప అవార్డుగా భావించిన జానకమ్మ తన నిరాడంబర వ్యక్తిత్వంతో అందరికీ ఆదర్శంగా నిలిచారు.

జానకమ్మ మరణం ఒక గాయని మరణం మాత్రమే కాదు... ఒక సంగీత యుగానికి ముగింపు. కానీ ఆమె పాడిన ప్రతి పాట, ప్రతి స్వరం, ప్రతి భావం సంగీతాభిమానుల హృదయాల్లో శాశ్వతంగా నిలిచిపోతుంది.

నేటి సాంకేతిక యుగంలో ఎన్నో గొంతులు వినిపిస్తున్నా, జానకమ్మలాంటి భావవ్యక్తీకరణ, పదాల స్పష్టత, రాగాలపై పట్టు, భాషలపై ఆధిపత్యం కలిగిన గాత్రాలు అరుదుగా కనిపిస్తున్నాయి. కొత్త తరానికి ఆమె పాటలు కేవలం వినోదం మాత్రమే కాదు, సంగీతానికి ఒక పాఠశాల. కాలం మారినా, తరాలు మారినా, జానకమ్మ గానం మాత్రం భారతీయ సంగీత చరిత్రలో చిరస్థాయిగా నిలిచిపోతుంది.

"గళం నిశ్శబ్దమైనా... గానం శాశ్వతం. జానకమ్మ పాటలు ఎప్పటికీ మన హృదయాల్లో మారుమోగుతూనే ఉంటాయి."

- సంతోష రూప

దేశంలో తొలి సీఎంపీ ప్యాడ్ టెక్నాలజీస్ హబ్

 

టీ-వర్క్స్‌లో లాంఛనంగా ప్రారంభించిన మంత్రి శ్రీధర్‌బాబు

దిక్సూచి, హైదరాబాద్, జూలై 11,

*సెమీకండక్టర్ల తయారీ రంగంలో తెలంగాణ మరో కీలక ముందడుగు వేసింది. రాష్ట్ర ప్రభుత్వం చొరవతో చిప్‌ల తయారీలో అత్యంత కీలకమైన కెమికల్ మెకానికల్ పాలిషింగ్ (సీఎంపీ) ప్యాడ్ టెక్నాలజీకి సంబంధించిన దేశంలోనే తొలి హబ్ హైదరాబాద్‌లో ఏర్పాటైంది. జపాన్‌కు చెందిన తోహో కోకి సీసాకుషో కంపెనీ లిమిటెడ్ (Toho Koki Seisakusho Co. Ltd.) సహకారంతో టీ-వర్క్స్‌లో ఏర్పాటు చేసిన ఈ కేంద్రాన్ని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు శనివారం లాంఛనంగా ప్రారంభించారు*. ఈ సందర్భంగా మంత్రి శ్రీధర్ బాబు మాట్లాడుతూ... తెలంగాణను దేశంలోనే ప్రముఖ సెమీకండక్టర్ హబ్‌గా తీర్చిదిద్దేందుకు ప్రణాళికాబద్ధంగా కృషి చేస్తున్నామన్నారు. ఈ లక్ష్య సాధనలో తాజాగా ప్రారంభించిన సీఎంపీ ప్యాడ్ టెక్నాలజీ హబ్ కీలక పాత్ర పోషిస్తుందన్నారు. సెమీకండక్టర్ చిప్‌ల తయారీలో వాఫర్‌ను సమతలంగా మార్చేందుకు ఉపయోగించే ఈ సీఎంపీ ప్యాడ్లను ప్రస్తుతం పూర్తిగా విదేశాల నుంచే దిగుమతి చేసుకుంటున్నామన్నారు. ఈ హబ్ ఏర్పాటుతో ఇప్పటివరకు విదేశాలకే పరిమితమైన సీఎంపీ ప్యాడ్ టెక్నాలజీ తొలిసారిగా దేశంలో హైదరాబాద్ వేదికగా అందుబాటులోకి వచ్చిందన్నారు. విద్యార్థులు, పరిశోధకులు, ఆవిష్కర్తలు, స్టార్టప్‌లు, పరిశ్రమలకు ఈ కేంద్రం ద్వారా శిక్షణతో పాటు పరిశోధనలు చేపట్టేందుకు అవసరమైన సాంకేతిక సహకారం అందిస్తామన్నారు. ప్రముఖ విద్యాసంస్థలు, పరిశోధనా సంస్థలు, పరిశ్రమలు, ఎంఎస్‌ఎంఈల భాగస్వామ్యంతో వచ్చే 18 నుంచి 24 నెలల్లో సీఎంపీ ప్యాడ్లను దేశంలోనే తయారు చేసేలా సంయుక్త పరిశోధనలు చేపడతామని వివరించారు. సెమీకండక్టర్ రంగంలోని అత్యాధునిక సాంకేతికతను అందిపుచ్చుకునేందుకు జపాన్ లాంటి దేశాలతో కలిసి ముందుకు సాగుతున్నామన్నారు. పరిశోధన నుంచి చిప్‌ల తయారీ వరకు అవసరమైన సమగ్ర ఎకోసిస్టమ్‌ను రాష్ట్రంలో అభివృద్ధి చేసేందుకు ప్రత్యేక రోడ్‌మ్యాప్‌ను సిద్ధం చేస్తున్నామన్నారు. కార్యక్రమంలో తోహో కోకి సీసాకుషో కంపెనీ లిమిటెడ్ ప్రతినిధి టకుయా నిషిమురా, జెట్రో బెంగళూరు డైరెక్టర్ జనరల్ స్వస్తిక్ కులకర్ణి, ఇండోబాక్స్ వ్యవస్థాపకుడు, సీఈవో డైసుకే టాంజి, జపాన్ ఇండియా బిజినెస్ బ్యూరో ఛైర్మన్ షిగెమారో యాసుయి, ఐటీ శాఖ సంయుక్త కార్యదర్శి అనుదీప్ దురిశెట్టి, టీ-వర్క్స్ సీఈవో జోగిందర్ తనికెళ్ల తదితరులు పాల్గొన్నారు.