తండ్రుల పేరిట పురస్కారాలు ఇవ్వడం గొప్ప సంస్కృతి

రాష్ట్ర సివిల్ సప్లైస్ డైరెక్టర్ జివి శ్యాంప్రసాద్ లాల్

దిక్సూచి, కరీంనగర్:

మన భారతీయ సంస్కృతి “మాతృదేవో భవ, పితృదేవో భవ” అని బోధించిందని, తల్లిదండ్రుల పేరిట పురస్కారాలు అందించడం గొప్ప సంస్కృతి అని రాష్ట్ర సివిల్ సప్లైస్ డైరెక్టర్ జివి శ్యాంప్రసాద్ లాల్ అన్నారు.

 శుక్రవారం సాయంత్రం కరీంనగర్ ఫిలిం భవన్ లో సమైక్య సాహితి ఆధ్వర్యంలో తండ్రుల పేరిట అందజేస్తున్న విశిష్ట పురస్కారాల ప్రదానోత్సవ కార్యక్రమానికి ఆయన ముఖ్యఅతిథిగా హాజరై ప్రసంగించారు. సందర్భంగా ఆయన మాట్లాడుతూ తల్లి తండ్రులను దేవతలతో సమానంగా భావించే మన సంస్కృతి లో వారి పేరును సేవతో, సత్కార్యాలతో, సన్మానాలతో చిరస్థాయిగా నిలబెట్టడం మనందరి బాధ్యత అని పేర్కొన్నారు. 

నాన్న ల పట్ల ప్రేమను కేవలం భావోద్వేగంగా కాకుండా, సమాజానికి ఉపయోగపడే విధంగా వ్యక్తీకరించడం నిజంగా ప్రశంసనీయమని అన్నారు. విశిష్ట అతిథిగా హాజరైన కరీంనగర్ ఫిలిం సొసైటీ అధ్యక్షుడు, గద్దర్ పురస్కార గ్రహీత పొన్నం రవిచంద్ర మాట్లాడుతూ ఇలాంటి కార్యక్రమాలు మరెందరికో స్ఫూర్తిగా నిలుస్తాయని అన్నారు. 

మనకు జన్మనిచ్చిన తల్లిదండ్రుల ఋణం ఎన్నటికీ తీర్చలేనిదని వారి పేరు సమాజంలో గౌరవంగా నిలిచేలా చేయడం, వారి ఆశయాలను ముందుకు తీసుకెళ్లడం, వారి విలువలను భావితరాలకు అందించడం నిజమైన ప్రేమ కు నిదర్శనం అని అన్నారు. సభకు అధ్యక్షత వహించిన సంస్థ అధ్యక్షులు మాడిశెట్టి గోపాల్ మాట్లాడుతూ  ప్రతి సంవత్సరం నాన్నల పేరిట అందించే ఈ పురస్కారాలు సంస్థకు ఎంతో గర్వకారణమని అన్నారు. ముందుగా నంది శ్రీనివాస్ రూపొందించిన బ్రోచర్ ను ఆవిష్కరించారు. ఈ కార్యక్రమంలో  జి.వి. శ్యామ్ ప్రసాద్ లాల్ పురస్కార ప్రదాత గా వ్యవహరించే ఆచార్య రజనిశ్రీ నృత్య పురస్కారాన్ని 

 ప్రముఖ నృత్య కళాకారులు, అధ్యక్షులు ఆదివాసీ నృత్య నికేతన్ జె. రతన్ కుమార్ కు ప్రదానం చేశారు. సీనియర్ ఫిజీషియన్ డా. డి. రఘురామన్ అందిస్తున్న డాక్టర్ దారం నాగభూషణం పురస్కారాన్ని , ప్రముఖ చరిత్ర పరిశోధకులు, కవి  కరిపె రాజ్ కుమార్ కు ప్రదానం చేశారు. ఈ పురస్కారాన్ని 

సమైక్య సాహితి అధ్యక్షులు మాడిశెట్టి గోపాల్ ప్రదాత గా అందజేసే మాడిశెట్టి మల్లయ్య ఉపాధ్యాయ పురస్కారాన్ని 

అసోసియేట్ ప్రొఫెసర్, ఛైర్మన్ బోర్డు ఆఫ్ స్టడీస్, ఉస్మానియా విశ్వవిద్యాలయం తెలుగు శాఖ ప్రొ. ఎస్. రఘు కు అందజేశారు. పూర్వ డిప్యూటి న్యూస్ ఎడిటర్, ఈనాడు రావికంటి శ్రీనివాస్ ప్రదాత గా అందించే 

రావికంటి రామయ్య గుప్త పురస్కారాన్ని  ప్రముఖ పద్యకవి, చతుర, విపుల పూర్వ ఎడిటర్ చంద్ర ప్రతాప్ కంతేటి కి అందజేశారు. సమైక్య సాహితీ ప్రధాన కార్యదర్శి కె.ఎస్.అనంతాచార్య అందించే సంపత్ కుమారాచార్య స్మారక సంగీత పురస్కారాన్ని ప్రముఖ మృదంగ కళాకారులు నమిలికొండ వేణుగోపాల్ కు ప్రదానం చేశారు. ఈ కార్యక్రమంలో పురస్కార ప్రదాతలు మరియు పురస్కార గ్రహీతలు మాట్లాడారు. జ్యోతి ప్రజ్వలనంతో ప్రారంభమైన ఈ కార్యక్రమం లో రతన్ కుమార్ శిష్య బృందం చక్కని నృత్యాన్ని ప్రదర్శించారు. కార్యక్రమం లో డా గండ్ర లక్ష్మణరావు, డా బివిఎన్ స్వామి, గాజుల రవీందర్, తదితరులు పాల్గొన్నారు

సంక్షేమ, అభివృద్ధి పనుల్లో వేగం పెంచాలి

రాష్ట్ర ఐటీ పరిశ్రమలు శాసనసభ వ్యవహారాల శాఖ మంత్రివర్యులు  దుద్దిళ్ల శ్రీధర్ బాబు

*అధికారులు బాధ్యత, పారదర్శకతతో పని చేయాలి

*ప్రజలకు మెరుగైన సేవలందించేందుకు అధికారులు, ప్రజాప్రతినిధులు సమన్వయంతో పని చేయాలి

*ప్రజాపాలన ప్రగతి ప్రణాళిక పై శ్వేతపత్రం సిద్ధం చేయాలి

*యూరియా బుకింగ్ యాప్ రాష్ట్రానికి ఆదర్శం.. ప్రత్యామ్నాయ పంటల సాగును ప్రోత్సహించాలి

*అభివృద్ధి పనులు, భూసేకరణను నిర్ణీత గడువులో పూర్తి చేయాలి

*సన్న వడ్లు సాగు చేసి బోనస్ పొందాలి

* ధాన్యం కొనుగోలు, ఇందిరమ్మ ఇండ్లు, విద్య, వైద్యం, మౌలిక సదుపాయాల్లో గణనీయమైన పురోగతి

* జిల్లా అభివృద్ధిపై అధికారులతో సమీక్ష సమావేశం నిర్వహించిన మంత్రి శ్రీధర్ బాబు

దిక్సూచి. పెద్దపల్లి,  జూలై, 04:

సంక్షేమ, అభివృద్ధి పనుల్లో వేగం పెంచాలని రాష్ట్ర ఐటీ పరిశ్రమలు శాసనసభ వ్యవహారాల శాఖ మంత్రి  దుద్దిళ్ల శ్రీధర్ బాబు తెలిపారు. 

శనివారం  పెద్దపల్లి కలెక్టరేట్ లోని సమావేశ మందిరంలో రాష్ట్ర ఐటీ పరిశ్రమలు శాసనసభ వ్యవహారాల శాఖ మంత్రి  దుద్దిళ్ళ శ్రీధర్ బాబు, రాష్ట్ర సంక్షేమ శాఖ మంత్రి అడ్లూరి లక్ష్మణ్ కుమార్ ప్రోటోకాల్ & ప్రజా సంబంధాల ప్రభుత్వ సలహాదారు హర్కర వేణు గోపాల్ , ప్రభుత్వ విప్ చింతకుంట విజయ రమణారావు, జిల్లా కలెక్టర్ కోయ శ్రీహర్ష,  రామగుండం ఎమ్మెల్యే మక్కాన్ సింగ్  రాజ్ ఠాకూర్ లతో కలిసి పెద్దపెల్లి జిల్లా సమీక్ష సమావేశం నిర్వహించారు. వ్యవసాయ శాఖ, పౌర సరఫరాల శాఖ, ఇరిగేషన్ , పంచాయతీరాజ్,పట్టణాభివృద్ధి, ఇందిరమ్మ ఇండ్లు,  వైద్య శాఖ, విద్యా శాఖ, ఎస్సి, తీసి, మైనారిటీ సంక్షేమ శాఖ, పరిశ్రమల, రెవెన్యూ శాఖ, వి.బి.జి రామ్ జి, త్రాగునీటి సరఫరా,  విద్యుత్ సరఫరా , అటవీ శాఖ పరిధిలో చేపట్టిన వివిధ అభివృద్ధి, సంక్షేమ కార్యక్రమాల పురోగతి పై అధికారులు పవర్ పాయింట్ ప్రజెంటేషన్ ద్వారా వివరించారు.

మంత్రి శ్రీధర్ బాబు మాట్లాడుతూ.. ప్రస్తుత ప్రభుత్వానికి ఇంకా రెండున్నర సంవత్సరాలకు పైగా పదవీకాలం ఉందని, ఈ కాలంలో ప్రతి అధికారి మరింత బాధ్యత, పారదర్శకత, జవాబుదారీతనంతో పనిచేసి ప్రభుత్వ లక్ష్యాలను ప్రజలకు చేరువ చేయాలని మంత్రి  అన్నారు.

ప్రజలకు సమయం కేటాయించి వారి సమస్యలను ఓపికగా వినాలని, మర్యాదపూర్వకంగా వ్యవహరించాలని, ఎలాంటి విసుగు లేకుండా ప్రతి దరఖాస్తును పరిశీలించాలని సూచించారు. దరఖాస్తుల్లో లోపాలు ఉంటే లేదా ఏదైనా పని ఆలస్యం అవుతుంటే దానికి గల కారణాలను ప్రజలకు స్పష్టంగా, వారికి అర్థమయ్యే విధంగా వివరించాలని ఆదేశించారు.

అధికారులు, ప్రజాప్రతినిధులు సమన్వయంతో పనిచేస్తేనే ప్రభుత్వ కార్యక్రమాలు సమర్థవంతంగా అమలవుతాయని పేర్కొన్నారు. చిన్న సమస్య అయినా ప్రభుత్వం దృష్టికి తీసుకురావాలని, వాటి పరిష్కారానికి ప్రభుత్వం పూర్తిస్థాయిలో సహకరిస్తుందని తెలిపారు. తెలిసి ఎలాంటి తప్పిదాలు చేయకుండా ప్రతి అధికారి అత్యంత బాధ్యతతో విధులు నిర్వహించాలని సూచించారు.

ప్రజాపాలన ప్రగతి ప్రణాళిక కార్యక్రమంపై జిల్లా స్థాయిలో సమగ్ర శ్వేతపత్రం (వైట్ పేపర్) సిద్ధం చేయాలని మంత్రి ఆదేశించారు. ప్రజల నుంచి వచ్చిన ప్రతి ఫిర్యాదు, సూచన, అభిప్రాయం ప్రభుత్వానికి చేరేలా చర్యలు తీసుకోవాలని, వాటి ఆధారంగా లోపాలు, పెండింగ్ అంశాలు, బ్యాక్‌లాగ్‌లను గుర్తించి వెంటనే సరిదిద్దే కార్యాచరణ చేపట్టాలని సూచించారు.

పెద్దపల్లి జిల్లా పరిపాలన, జిల్లా కలెక్టర్ కోయ శ్రీహర్ష నాయకత్వంలో అధికారులు సమర్థవంతంగా పనిచేస్తున్నారని అభినందించారు. జిల్లాలో ధాన్యం కొనుగోలు, ప్రభుత్వ జిల్లా ఆసుపత్రి సేవల మెరుగుదల, ప్రభుత్వ పాఠశాలల్లో విద్యా ప్రమాణాల పెంపు వంటి రంగాల్లో మంచి ఫలితాలు సాధించినట్లు పేర్కొన్నారు.

రైతుల కోసం పెద్దపల్లి జిల్లాలో ప్రారంభించిన యూరియా బుకింగ్ యాప్ రాష్ట్రానికే కాకుండా దేశానికి కూడా ఆదర్శంగా నిలిచిందని మంత్రి అన్నారు. జిల్లాలో ప్రతి అర్హ రైతుకు అవసరమైన సమయంలో యూరియా తప్పనిసరిగా అందేలా చూడాలని, అవసరం లేని వారికి యూరియా పంపిణీ జరగకుండా కట్టుదిట్టమైన పర్యవేక్షణ చేపట్టాలని ఆదేశించారు.

సూపర్ ఎల్‌నినో పరిస్థితులను దృష్టిలో ఉంచుకొని రైతులను ప్రత్యామ్నాయ పంటల సాగువైపు ప్రోత్సహించాలని, ముఖ్యంగా ఆయిల్ పామ్, కూరగాయలు, పప్పుధాన్యాలు వంటి పంటల సాగును విస్తరించేలా వ్యవసాయ శాఖ కార్యాచరణ రూపొందించాలని సూచించారు.

ప్రభుత్వం బోనస్ ప్రకటించిన ఏడు రకాల వరి వంగడాలపై రైతులకు విస్తృత అవగాహన కల్పించాలని, ప్రతి మండలంలోని రైతు వేదికల్లో ఆ ఏడు రకాల విత్తనాలు ఎల్లప్పుడూ అందుబాటులో ఉండేలా చర్యలు తీసుకోవాలని ఆదేశించారు. 

జిల్లాలో విజయవంతంగా నిర్వహించిన విత్తన మేళా తరహాలో రైతులకు నాణ్యమైన విత్తనాలపై అవగాహన కార్యక్రమాలు కొనసాగించాలని సూచించారు.

వ్యవసాయ అధికారులు రైతులతో నిరంతరం సంబంధాలు కొనసాగిస్తూ క్షేత్రస్థాయిలో పంటలను పర్యవేక్షించాలని, రైతులకు అవసరమైన సాంకేతిక సలహాలు అందించాలని తెలిపారు.

 అనధికారిక, నాణ్యతలేని విత్తనాల వినియోగాన్ని ఎట్టి పరిస్థితుల్లోనూ అనుమతించరాదని స్పష్టం చేశారు.జిల్లాలో చేపడుతున్న అన్ని అభివృద్ధి పనులను నిర్ణీత గడువులో పూర్తి చేయాలని మంత్రి ఆదేశించారు. అభివృద్ధి పనులకు అవసరమైన భూసేకరణను ప్రాధాన్యత క్రమంలో వేగవంతం చేయాలని, భూసేకరణ ప్రక్రియలో రైతులు, స్థానిక ప్రజాప్రతినిధుల అభిప్రాయాలను పరిగణనలోకి తీసుకుంటూ పారదర్శకంగా ముందుకు సాగాలని సూచించారు.

*ప్రభుత్వ విప్ చింతకుంట విజయరమణారావు మాట్లాడుతూ,* వానాకాలంలో సన్న రకాల వరి సాగు చేసిన రైతులకు ప్రభుత్వం అందిస్తున్న బోనస్ ద్వారా వచ్చిన అదనపు ఆదాయం, గత ప్రభుత్వం రైతుబంధు కింద అందించిన మొత్తాన్ని మించిందని  అన్నారు.

 రైతులు మార్కెట్‌లో మంచి డిమాండ్ ఉన్న సన్న రకాల వరిని సాగు చేసి అధిక లాభాలు పొందాలని పిలుపునిచ్చారు.

మార్కెట్‌లో మంచి డిమాండ్ ఉన్న ఏడు రకాల వరి వంగడాలను ప్రభుత్వం ముందుగానే గుర్తించి వాటికి బోనస్ ప్రకటించిందని తెలిపారు.

 రైతులు కూడా ఆయా ఏడు రకాల వరి వంగడాలనే సాగు చేసి ప్రభుత్వ ప్రోత్సాహకాన్ని సద్వినియోగం చేసుకోవాలని సూచించారు.

గతంలో రైతులు ధాన్యం విక్రయించిన తర్వాత కూడా 45 రోజుల వరకు చెల్లింపులు అందని పరిస్థితులు ఉండేవని, ప్రస్తుతం జిల్లా కలెక్టర్ కోయ శ్రీహర్ష పర్యవేక్షణలో ధాన్యం కొనుగోలు చేసిన 48 గంటల్లోపే రైతుల బ్యాంకు ఖాతాల్లో ప్రభుత్వం నేరుగా నగదు జమ చేస్తోందని తెలిపారు. 

రైతులకు మద్దతు ధరతో పాటు బోనస్ అందిస్తూ వ్యవసాయాన్ని మరింత లాభసాటిగా మార్చేందుకు రాష్ట్ర ప్రభుత్వం కృషి చేస్తోందని, రైతులు నాణ్యమైన విత్తనాలతో ప్రభుత్వం సూచించిన వరి వంగడాలను సాగు చేసి అధిక ఆదాయం పొందాలని ప్రభుత్వ విప్ పిలుపునిచ్చారు.

జిల్లా కలెక్టర్ కోయ శ్రీ హర్ష మాట్లాడుతూ యూరియా  యాప్ వినియోగంతో గత యాసంగిలో జిల్లాలో యూరియా వినియోగం 19 శాతం తగ్గిందని తెలిపారు. వానాకాలం సీజన్‌కు అవసరమైన యూరియా నిల్వలు సమృద్ధిగా అందుబాటులో ఉన్నాయని, ఇప్పటివరకు 21,126 మంది రైతులకు యాప్ ద్వారా 2,453 మెట్రిక్ టన్నుల యూరియాను పంపిణీ చేశామని అన్నారు.

సూపర్ ఎల్‌నినో పరిస్థితులను దృష్టిలో ఉంచుకుని రైతులను ప్రత్యామ్నాయ పంటల వైపు మళ్లించేందుకు రైతు వేదికల ద్వారా అవగాహన కార్యక్రమాలు నిర్వహిస్తున్నామని తెలిపారు. ఆయిల్ పామ్ సాగు విస్తరణకు ప్రత్యేక ప్రణాళికతో ముందుకు సాగుతున్నామని, గత మూడు సంవత్సరాల్లో 3,572 ఎకరాల్లో ఆయిల్ పామ్ సాగు విస్తరించగా రూ.5.43 కోట్ల సబ్సిడీ అందించామని చెప్పారు.

పీఎం కుసుమ్ పథకం కింద నాలుగు మెగావాట్ల సామర్థ్యంతో సోలార్ విద్యుత్ ప్లాంట్ల ఏర్పాటుకు చర్యలు తీసుకుంటున్నామని, ఎలిగేడు వద్ద ప్రపంచ స్థాయి గోదాముల నిర్మాణానికి భూమి కేటాయించామని తెలిపారు.

గత యాసంగిలో రికార్డు స్థాయిలో 65,129 మంది రైతుల నుంచి 4.46 లక్షల మెట్రిక్ టన్నుల ధాన్యాన్ని కొనుగోలు చేసి రూ.1,057 కోట్లను రైతుల ఖాతాల్లో జమ చేశామని పేర్కొన్నారు.

ఇందిరమ్మ ఇండ్ల మొదటి విడతలో 6,276 ఇళ్లను మంజూరు చేయగా 1,909 గృహప్రవేశాలు పూర్తయ్యాయని, రూ.130.24 కోట్లను లబ్ధిదారుల ఖాతాల్లో జమ చేశామని తెలిపారు. రెండో విడతకు సంబంధించి క్షేత్రస్థాయిలో సర్వే పూర్తి చేసి అర్హులను గుర్తిస్తున్నామని చెప్పారు. డబుల్ బెడ్‌రూమ్ ఇళ్ల నిర్మాణం కూడా వేగంగా కొనసాగుతోందన్నారు.

మంచిర్యాల–వరంగల్ గ్రీన్‌ఫీల్డ్ జాతీయ రహదారి, మేడిపల్లి పరిశ్రమల పార్కు, శ్రీపాద మార్గం–మంథని నాలుగు లైన్ల రహదారి, పెద్దపల్లి బైపాస్ తదితర ప్రధాన ప్రాజెక్టులకు అవసరమైన భూసేకరణను వేగవంతం చేస్తున్నామని తెలిపారు.

సాదా బైనామా దరఖాస్తుల పరిష్కారానికి ప్రత్యేక చర్యలు చేపట్టామని, ఎస్‌ఐఆర్‌లో 90 శాతం ఎన్యూమరేషన్ ఫారాల పంపిణీ పూర్తయిందని చెప్పారు. అర్హులైన కుటుంబాలకు కొత్త రేషన్ కార్డులు మంజూరు చేస్తూ ప్రతి నెల ఉచిత సన్నబియ్యం పంపిణీ చేస్తున్నామని తెలిపారు.

ఉపాధి హామీ పథకం కింద జిల్లాలో 14 లక్షలకుపైగా ఉపాధి దినాలు కల్పించామని, మహిళా సంఘాలకు బ్యాంకు లింకేజీ, ఉపాధి అవకాశాలు, శిక్షణ కార్యక్రమాలు విస్తృతంగా అమలు చేస్తున్నామని పేర్కొన్నారు.

జిల్లాలో తాగునీటి సమస్య తలెత్తకుండా అవసరమైన పనులను చేపట్టామని, చెరువుల్లో నీటి నిల్వలు ఆశాజనకంగా ఉన్నాయని తెలిపారు.

వైద్య రంగంలో మంథని 50 పడకల ఆసుపత్రి, రామగుండం మెడికల్ కళాశాల హాస్టల్ నిర్మాణ పనులు కొనసాగుతున్నాయని, పెద్దపల్లి జిల్లా ఆసుపత్రి రాష్ట్రస్థాయిలో అవార్డులు సాధించిందని పేర్కొన్నారు. గతంతో పోలిస్తే ఓపీ, ఇన్‌పేషెంట్లు, ప్రసవాలు, శస్త్రచికిత్సలు, వైద్య పరీక్షలు గణనీయంగా పెరిగాయని తెలిపారు.

ఎఫ్‌ఆర్‌ఎస్‌ ఆధారిత విద్యార్థులు, ఉపాధ్యాయుల హాజరు నమోదు పైలట్ ప్రాజెక్టు పెద్దపల్లి జిల్లాలో విజయవంతం కావడంతో రాష్ట్రవ్యాప్తంగా అమలు చేస్తున్నారని తెలిపారు. ప్రభుత్వ పాఠశాలల్లో మౌలిక వసతుల కల్పనకు ప్రాధాన్యత ఇస్తున్నామని చెప్పారు.

ఎంఎస్‌ఎంఈల ఏర్పాటుకు ప్రోత్సాహకాలు అందిస్తూ పరిశ్రమల అభివృద్ధికి చర్యలు తీసుకుంటున్నామని, మెగా జాబ్ మేళా ద్వారా యువతకు ఉపాధి అవకాశాలు కల్పించామని తెలిపారు. సీఎం కప్ క్రీడల్లో జిల్లా క్రీడాకారులు రాష్ట్రస్థాయిలో ప్రతిభ కనబరిచారని పేర్కొన్నారు.

పోషకాహార లోపం నిర్మూలనకు ప్రత్యేక చర్యలు చేపట్టామని, అంగన్‌వాడీ కేంద్రాల్లో పిల్లల ఎదుగుదలను నిరంతరం పర్యవేక్షిస్తున్నామని, అంగన్‌వాడీ కేంద్రాలకు అవసరమైన మౌలిక సదుపాయాలు కల్పించామని తెలిపారు. పెద్దపల్లి జిల్లాను బాల్య వివాహాల రహిత జిల్లాగా తీర్చిదిద్దేందుకు సమిష్టి కృషి ఫలించిందన్నారు.

పట్టణాభివృద్ధి కార్యక్రమాల కింద అమృత్–2.0, టీయూఎఫ్‌ఐడీసీ తదితర పథకాల ద్వారా తాగునీరు, సీసీ రోడ్లు, డ్రైన్లు, వీధి దీపాలు, మార్కెట్లు, ఇతర మౌలిక వసతుల అభివృద్ధి పనులు వేగంగా కొనసాగుతున్నాయని తెలిపారు. రామగుండం, పెద్దపల్లి, సుల్తానాబాద్ మున్సిపాలిటీల్లో భారీ ఎత్తున అభివృద్ధి పనులు చేపట్టి ఎక్కువ శాతం పూర్తిచేశామని పేర్కొన్నారు.

సమీక్ష సమావేశానికి ముందు  మంత్రులు దుద్దిళ్ల శ్రీధర్ బాబు,  అడ్లూరి లక్ష్మణ్ కుమార్, ప్రభుత్వ సలహాదారు హర్కర వేణుగోపాల్, ప్రభుత్వ విప్ చింతకుంట విజయరమణారావు, జిల్లా కలెక్టర్ కోయ శ్రీహర్షతో కలిసి సమీకృత జిల్లా కలెక్టరేట్‌లో తెలంగాణ ఉద్యమ అమరవీరులు దొడ్డి కొమురయ్య, మాజీ ముఖ్యమంత్రి రోశయ్య  చిత్రపటాలకు పూలమాలలు వేసి ఘనంగా నివాళులర్పించారు. అనంతరం "ప్రజాపాలన ప్రగతి ప్రణాళిక" పుస్తకాన్ని ఆవిష్కరించారు.

అంతకు ముందు కలెక్టరేట్ ఆవరణలో నూతన అంబులెన్స్‌ను మంత్రి దుద్దిళ్ల శ్రీధర్ బాబు ప్రారంభించి, ప్రజలకు మరింత మెరుగైన అత్యవసర వైద్య సేవలు అందించే దిశగా ఈ అంబులెన్స్ ఉపయోగపడుతుందని తెలిపారు.

ఈ సమావేశంలో స్థానిక సంస్థల అదనపు కలెక్టర్  జె.అరుణ శ్రీ, జిల్లా రెవెన్యూ అధికారి రాజేశ్వరి, ఆర్ డి వో లు సురేష్, గంగయ్య, జిల్లా గ్రంధాలయ సంస్థ చైర్మన్ ఎ. అన్నయ్య గౌడ్, రామగుండం మేయర్ మహంకాళి స్వామి, పెద్దపల్లి మున్సిపల్ చైర్మన్ ఎన్. మల్లయ్య,  జిల్లా అధికారులు సంబంధిత అధికారులు తదితరులు పాల్గొన్నారు.

హెల్త్ ఇన్సూరెన్స్.. కార్పొరేట్ వైద్యం..!

ఒకప్పుడు ఇంటి స్థలం అమ్ముకుని ఆపరేషన్ చేయించుకునే పరిస్థితి ఉండేది. ఇప్పుడు హెల్త్ ఇన్సూరెన్స్ ఉండటంతో అదే చికిత్స క్యాష్‌లెస్‌గా అందుతోంది. ఇది ఆరోగ్య రంగంలో పెద్ద మార్పే. అయితే ఇదే సమయంలో మరో ప్రశ్న కూడా వినిపిస్తోంది. ఇన్సూరెన్స్ ఉండటం వల్ల అవసరం లేని ఆపరేషన్లు పెరుగుతున్నాయా?

దేశంలో ఆరోగ్య బీమా విస్తరించిన తర్వాత ప్రైవేట్, కార్పొరేట్ ఆసుపత్రుల్లో శస్త్రచికిత్సల సంఖ్య గణనీయంగా పెరిగింది. దీనికి ప్రధాన కారణం గతంలో ఖర్చుకు భయపడి చికిత్స వాయిదా వేసుకున్న వారు ఇప్పుడు ధైర్యంగా ముందుకు రావడమేనని ఆసుపత్రులు చెబుతున్నాయి. కానీ వినియోగదారుల సంఘాలు, కొందరు వైద్య నిపుణులు మాత్రం మరో కోణాన్ని ప్రస్తావిస్తున్నారు. బీమా ఉందని తెలిసిన తర్వాత ఖరీదైన పరీక్షలు, ప్యాకేజీ చికిత్సలు, వెంటనే ఆపరేషన్ చేయాలనే సూచనలు ఎక్కువవుతున్నాయని వారు అంటున్నారు.

గతంలో దేశంలోని కొన్ని రాష్ట్రాల్లో గర్భాశయ తొలగింపు, మోకాలి మార్పిడి, గుండె సంబంధిత చికిత్సలు, వెన్నెముక శస్త్రచికిత్సల విషయంలో అనవసర ఆపరేషన్లు జరిగాయనే ఆరోపణలపై ప్రభుత్వాలు విచారణలు జరిపిన సందర్భాలు ఉన్నాయి. కొన్ని ఆసుపత్రులపై చర్యలు కూడా తీసుకున్నారు. అదే సమయంలో వేలాది మంది రోగులకు సమయానికి చికిత్స అందించి ప్రాణాలు కాపాడిన సందర్భాలు కూడా ఉన్నాయి. అందువల్ల మొత్తం కార్పొరేట్ వైద్య వ్యవస్థపై ఒకే ముద్ర వేయడం సరైంది కాదని నిపుణులు చెబుతున్నారు.

ఇన్సూరెన్స్ కంపెనీలు కూడా అనుమానాస్పద క్లెయిమ్‌లను అడ్డుకునేందుకు ప్రీ-ఆథరైజేషన్, మెడికల్ ఆడిట్లు, ఫ్రాడ్ డిటెక్షన్ వ్యవస్థలను అమలు చేస్తున్నాయి. అయినప్పటికీ అధిక బిల్లింగ్, అవసరం లేని పరీక్షలు, తప్పుడు క్లెయిమ్‌ల వంటి ఘటనలు అప్పుడప్పుడు బయటపడుతూనే ఉన్నాయి.

వైద్య నిర్ణయం పూర్తిగా రోగి ఆరోగ్యాన్ని దృష్టిలో పెట్టుకుని ఉండాలి. శస్త్రచికిత్సకు ముందు అన్ని ప్రత్యామ్నాయాలను వివరించడం, అవసరమైతే రెండో వైద్యాభిప్రాయం తీసుకునే అవకాశం కల్పించడం, ప్రభుత్వ నియంత్రణను మరింత బలోపేతం చేయడం ద్వారా మాత్రమే ప్రజల్లో విశ్వాసం పెరుగుతుంది.

హెల్త్ ఇన్సూరెన్స్ ప్రజలకు భరోసా కావాలి. అది అనవసర చికిత్సలకు ప్రోత్సాహకంగా మారకుండా పారదర్శక వ్యవస్థ ఉండాలని ఆరోగ్య రంగ నిపుణులు సూచిస్తున్నారు.

రోగులు పాటించాల్సిన జాగ్రత్తలు

• శస్త్రచికిత్స అవసరాన్ని పూర్తిగా తెలుసుకోండి.
• వీలైతే మరో నిపుణుడి (సెకండ్ ఒపీనియన్) అభిప్రాయం తీసుకోండి.
• ఇన్సూరెన్స్ కవర్ ఉందని అనవసర పరీక్షలకు వెంటనే అంగీకరించవద్దు.
• చికిత్స, ఖర్చుల వివరాలను లిఖితపూర్వకంగా తీసుకోండి.
• సందేహం ఉంటే ఇన్సూరెన్స్ కంపెనీతో నేరుగా మాట్లాడండి.

నియంత్రణ బలోపేతం కావాలంటే...

• హై రిస్క్ ఆపరేషన్లపై స్వతంత్ర మెడికల్ ఆడిట్లు.
• అనవసర శస్త్రచికిత్సలు నిరూపితమైతే కఠిన చర్యలు.
• ఆసుపత్రుల చికిత్స విధానాల్లో పారదర్శకత.
• రోగుల ఫిర్యాదుల పరిష్కారానికి వేగవంతమైన వ్యవస్థ.
• బీమా కంపెనీలు–ఆసుపత్రుల లావాదేవీలపై క్రమం తప్పకుండా పర్యవేక్షణ.

ఫ్యాక్ట్ ఫైల్

 హెల్త్ ఇన్సూరెన్స్ వల్ల లాభాలు

• చికిత్స భారం తగ్గుతుంది.
• క్యాష్‌లెస్ వైద్యం అందుబాటులోకి వస్తుంది.
• సమయానికి చికిత్స పొందే అవకాశం పెరుగుతుంది.

సవాళ్లు

• అధిక బిల్లింగ్ ఆరోపణలు.
• అవసరం లేని పరీక్షలు, చికిత్సలపై ఫిర్యాదులు.
• తప్పుడు బీమా క్లెయిమ్‌ల ప్రయత్నాలు.
• పారదర్శకతపై ప్రశ్నలు.

ఎగుమతుల వృద్ధికి పూర్తి సహకారం

బోర్డ్ ఆఫ్ ట్రేడ్ సమావేశంలో తెలంగాణకు ప్రాతినిధ్యం వహించిన శ్రీధర్ బాబు

న్యూఢిల్లీ: కేంద్ర వాణిజ్య, పరిశ్రమల శాఖ మంత్రి పీయూష్ గోయల్ అధ్యక్షతన శనివారం న్యూఢిల్లీలోని వాణిజ్య భవన్‌లో నిర్వహించిన బోర్డ్ ఆఫ్ ట్రేడ్ (Board of Trade) సమావేశంలో తెలంగాణ ప్రభుత్వ తరఫున రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు పాల్గొన్నారు.

దేశ ఎగుమతుల వ్యవస్థను మరింత బలోపేతం చేయడమే లక్ష్యంగా జరిగిన ఈ సమావేశంలో పలు కీలక అంశాలపై విస్తృతంగా చర్చించారు. ముఖ్యంగా లాజిస్టిక్స్ వ్యవస్థను మెరుగుపరచడం, స్వేచ్ఛా వాణిజ్య ఒప్పందాల (FTA) వినియోగాన్ని పెంచడం, జిల్లాలను ఎగుమతి కేంద్రాలుగా తీర్చిదిద్దడం, డిజిటల్ టెక్నాలజీని వినియోగించి వ్యాపార సౌలభ్యాన్ని పెంపొందించడం, భారత ఎగుమతుల పోటీతత్వాన్ని మరింత బలోపేతం చేయడంపై అభిప్రాయాలు పంచుకున్నారు.

ఈ సందర్భంగా మంత్రి శ్రీధర్ బాబు తెలంగాణ ప్రభుత్వం భారత ఎగుమతుల వృద్ధికి పూర్తి స్థాయిలో సహకరిస్తుందని స్పష్టం చేశారు. రాష్ట్ర పారిశ్రామిక వ్యవస్థను మరింత బలోపేతం చేయడం, ఆవిష్కరణలకు ప్రోత్సాహం ఇవ్వడం, ప్రపంచ మార్కెట్లలో తెలంగాణ పోటీతత్వాన్ని పెంచడం ద్వారా దేశ ఎగుమతుల వృద్ధిలో కీలక పాత్ర పోషిస్తామని ఆయన తెలిపారు.

సమావేశంలో ప్రధాన చర్చాంశాలు

• లాజిస్టిక్స్ వ్యవస్థ ఆధునీకరణ, వ్యయభారం తగ్గింపు
• స్వేచ్ఛా వాణిజ్య ఒప్పందాల (FTA) సమర్థ వినియోగం
• జిల్లాలను ఎగుమతి హబ్‌లుగా అభివృద్ధి చేయడం
• డిజిటల్ టెక్నాలజీతో వ్యాపార సౌలభ్యాన్ని పెంపొందించడం
• భారత ఎగుమతుల పోటీతత్వాన్ని ప్రపంచ స్థాయిలో మరింత బలోపేతం చేయడం
• రాష్ట్రాల భాగస్వామ్యంతో ఎగుమతుల వృద్ధికి కార్యాచరణ

చట్టవ్యతిరేక కార్యకలాపాలకు పాల్పడేవారికి పోలీసులంటే భయం ఉండాలి

  పోలీస్ కమిషనర్ అంబర్ కిశోర్ ఝా

దిక్సూచి, రామగుండం, జూలై 3: రామగుండం పోలీస్ కమిషనరేట్ పరిధిలో చట్టవ్యతిరేక కార్యకలాపాలకు పాల్పడే వ్యక్తులకు పోలీసులంటే భయం కలిగేలా అధికారులు సమర్థవంతంగా విధులు నిర్వహించాలని పోలీస్ కమిషనర్ అంబర్ కిశోర్ ఝా అన్నారు.

రామగుండం పోలీస్ కమిషనరేట్‌లోని వివిధ విభాగాల్లో నూతనంగా బాధ్యతలు చేపట్టిన సీసీఎస్ ఏసీపీలు కె. రవీందర్, టి. ప్రవీణ్ కుమార్, టాస్క్ ఫోర్స్ ఏసీపీ బి. శ్రీనివాస్ శుక్రవారం పోలీస్ కమిషనర్‌ను మర్యాదపూర్వకంగా కలిసి మొక్కలను అందజేశారు.

ఈ సందర్భంగా పోలీస్ కమిషనర్ మాట్లాడుతూ, కమిషనరేట్ పరిధిలో శాంతిభద్రతల పరిరక్షణకు అత్యంత ప్రాధాన్యత ఇవ్వాలని సూచించారు. నేరాల నియంత్రణ, చట్టవ్యతిరేక కార్యకలాపాల నిర్మూలన, నేరస్తులపై కఠిన చర్యలు తీసుకోవడంలో అధికారులు పరస్పర సమన్వయంతో పనిచేయాలని ఆదేశించారు.

ప్రజల్లో పోలీసులపై విశ్వాసాన్ని మరింత పెంపొందించేలా వ్యవహరించడంతో పాటు, నేరాలకు పాల్పడే వ్యక్తుల్లో చట్టం పట్ల భయం నెలకొనే విధంగా చర్యలు చేపట్టాలని సూచించారు. బాధ్యతలు చేపట్టిన అధికారులు తమ విధులను నిబద్ధతతో నిర్వహిస్తూ కమిషనరేట్ ప్రతిష్ఠను మరింత పెంచాలని ఆకాంక్షించారు.

మంథనిలో సమైర ఎనర్జీ సొల్యూషన్స్ ప్రారంభం

 
ప్రారంభోత్సవంలో పాల్గొన్న టీపీసీసీ రాష్ట్ర ప్రధాన కార్యదర్శి దుద్దిళ్ల శ్రీను బాబు

దిక్సూచి, మంథని, జూలై 3: 

మంథని పట్టణంలో సూరయ్యపల్లి గ్రామానికి చెందిన యువ పారిశ్రామికవేత్త ఆర్ల వినీత్ ఏర్పాటు చేసిన సమైర ఎనర్జీ సొల్యూషన్స్ సంస్థను టీపీసీసీ రాష్ట్ర ప్రధాన కార్యదర్శి దుద్దిళ్ల శ్రీను బాబు శుక్రవారం ప్రారంభించారు.

ఈ సందర్భంగా సంస్థను ప్రారంభించిన అనంతరం శ్రీను బాబు మాట్లాడుతూ యువ పారిశ్రామికవేత్తలు కొత్త వ్యాపారాలను ప్రారంభించి ఉపాధి అవకాశాలను సృష్టించడం సమాజ అభివృద్ధికి ఎంతో దోహదపడుతుందని అన్నారు. యువత స్వయం ఉపాధి వైపు అడుగులు వేస్తూ ఇతరులకు కూడా ఉపాధి కల్పించడం అభినందనీయమని పేర్కొన్నారు.

సమైర ఎనర్జీ సొల్యూషన్స్ సంస్థ విజయవంతంగా ముందుకు సాగి, వినియోగదారులకు నాణ్యమైన సేవలు అందించడంతో పాటు మరింత మంది యువతకు స్ఫూర్తిగా నిలవాలని ఆకాంక్షించారు. ఈ సందర్భంగా సంస్థ నిర్వాహకుడు ఆర్ల వినీత్‌కు శుభాకాంక్షలు తెలియజేస్తూ, వ్యాపారంలో మరిన్ని విజయాలు సాధించాలని ఆకాంక్షించారు.

ప్రారంభోత్సవ కార్యక్రమంలో స్థానిక నాయకులు, ప్రజాప్రతినిధులు, వ్యాపారవేత్తలు, కుటుంబ సభ్యులు, స్నేహితులు, అభిమానులు తదితరులు పాల్గొని నూతన సంస్థ విజయవంతం కావాలని ఆకాంక్షించారు.

విదేశీ ఉద్యోగాల కోసం దరఖాస్తు చేసుకోండి

పెద్దపల్లి జిల్లా కలెక్టర్ కోయ శ్రీహర్ష*

*జర్మనీ, ఒమాన్, ఖతార్, ఇజ్రాయెల్, దుబాయ్ సహా పలు దేశాల్లో ఉద్యోగ అవకాశాలు*

*18 నుండి 40 సంవత్సరాల మధ్య వయస్సు గల అభ్యర్థులు దరఖాస్తు చేసుకోవాలి*

దిక్సూచి, పెద్దపల్లి, జూలై 03:

తెలంగాణ ఓవర్సీస్ మానపవర్ కంపెనీ ద్వారా విదేశాల్లో ఉపాధి అవకాశాల కోసం అర్హులైన అభ్యర్థుల నుండి దరఖాస్తులు ఆహ్వానిస్తున్నట్లు *జిల్లా కలెక్టర్ కోయ శ్రీ హర్ష*  శుక్రవారం ఒక ప్రకటనలో తెలిపారు.

వివిధ దేశాల్లో అందుబాటులో ఉన్న ఉద్యోగాలకు అర్హులైన అభ్యర్థులు 2026 జూలై 20వ తేదీలోపు దరఖాస్తు చేసుకోవాలని కలెక్టర్ సూచించారు.

జర్మనీ లో ట్రాన్స్‌మిషన్ లైన్ టెక్నీషియన్/ఎలక్ట్రీషియన్, రిజిస్టర్డ్ నర్సులు, నాన్-హెల్త్ ఆస్బిల్డుంగ్, ఫిజియోథెరపిస్టులు, కమర్షియల్ వెహికల్ టెక్నీషియన్.

ఒమాన్ లో ఎంబ్రాయిడరీ టైలర్, అగ్రికల్చర్ & లాండ్రీ వర్కర్లు, ఇండస్ట్రియల్ నర్సులు.

ఖతార్ లో హోమ్ కేర్ నర్సులు, సివిల్ ఇంజినీర్లు, సివిల్ సూపర్వైజర్లు, కాస్టింగ్ ఆఫీసర్లు.

ఇజ్రాయెల్: హోమ్ బేస్డ్ కేర్ గివర్స్, దుబాయ్ లో బైక్, టాక్సీ డ్రైవర్లు, స్టీల్ ఫిక్సర్, ఆర్‌సీసీ వర్కర్, టైల్ మేసన్, షట్టరింగ్ కార్పెంటర్, సివిల్ ఫోర్‌మన్, సివిల్ సైట్ ఇంజినీర్, హెల్పర్.

జపాన్ లో హోమ్ కేర్ నర్సులు,

కెనడా లో హోమ్ కేర్ నర్సులు,

సౌదీ అరేబియా లో టెక్నీషియన్లు,

రష్యా లో టెక్స్‌టైల్స్, ఫుడ్ ప్రాసెసింగ్, ఏసీ టెక్నీషియన్, ఫిట్టర్, ఎలక్ట్రీషియన్, వెల్డర్.

గ్రీస్ లో హౌస్ కీపింగ్, వెయిటర్లు, రిసెప్షనిస్టులు, పెయింటర్లు, టైల్ మేసన్లు.

మారిషస్ లో హౌస్ కీపింగ్, క్యాషియర్, షెల్ఫ్స్ వర్కర్లు ఉద్యోగాలు ఖాళీగా ఉన్నాయని,

ఈ ఉద్యోగాలకు 18 నుండి 40 సంవత్సరాల మధ్య వయస్సు గల అభ్యర్థులు అర్హులని తెలిపారు.

ఆసక్తి గల అభ్యర్థులు 2026 జూలై 20వ తేదీలోపు సమీకృత కలెక్టరేట్ లోని జిల్లా ఉపాధి కార్యాలయం, రూమ్ 233,  పెద్దపల్లిలో సంప్రదించాలని, మరిన్ని వివరాలకు www.tomcom.telangana.gov.in వెబ్‌సైట్‌ను సందర్శించవచ్చని, ఇతర వివరాలకు 7382452944 నంబర్‌ను సంప్రదించవచ్చని తెలిపారు.

విదేశాల్లో ఉపాధి అవకాశాలను సద్వినియోగం చేసుకొని యువత తమ భవిష్యత్తును మెరుగుపరచుకోవాలని జిల్లా కలెక్టర్  ఒక  ప్రకటనలో పేర్కొన్నారు.

బిఆర్ఎస్ చేసిన అప్పుల భారాన్ని మోస్తున్నాం

 టీపీసీసీ రాష్ట్ర అధ్యక్షులు మహేష్ కుమార్ గౌడ్

బీఆర్ఎస్, బీజేపీలపై  విమర్శల వెల్లువ

దిక్సూచి, కరీంనగర్: 

రాష్ట్రంలో గత బీఆర్ఎస్ ప్రభుత్వం తీసుకున్న అప్పుల భారాన్ని ప్రస్తుతం కాంగ్రెస్ ప్రభుత్వం మోస్తోందని టీపీసీసీ రాష్ట్ర అధ్యక్షులు మహేష్ కుమార్ గౌడ్ ఆరోపించారు. కరీంనగర్ లో విలేకరుల సమావేశంలో ఆయన మాట్లాడుతూ బీఎస్ఎస్, బీజేపీ పార్టీ నాయకుల తీరుపై తీవ్ర స్థాయిలో ధ్వజమెత్తారు. కార్పొరేషన్లు, సొసైటీల పేరుతో ముందస్తు ప్రణాళిక లేకుండా భారీగా అప్పులు చేయడంతో రాష్ట్ర ఆర్థిక పరిస్థితిపై తీవ్ర ప్రభావం పడిందన్నారు. గత ప్రభుత్వం చేసిన అప్పుల వడ్డీలు, వాయిదాలకే నెలకు సుమారు రూ.6 వేల కోట్ల వరకు చెల్లించాల్సి వస్తోందని, మొత్తం అప్పులు రూ.8 లక్షల కోట్లకు పైగా ఉన్నాయని పేర్కొన్నారు.

ప్రజలు బీఆర్ఎస్ పాలనను తిరస్కరించి అధికారానికి దూరం చేశారని, అనంతరం జరిగిన పార్లమెంట్ ఎన్నికల్లో కూడా ఆ పార్టీకి ఒక్క సీటు కూడా ఇవ్వలేదని గుర్తు చేశారు. పదేళ్ల పాలనలో డబుల్ బెడ్‌రూమ్ ఇళ్లు, ప్రభుత్వ ఉద్యోగాల పేరుతో ప్రజలను మోసం చేశారని విమర్శించారు.

ప్రస్తుత కాంగ్రెస్ ప్రభుత్వం ప్రజలకు ఇచ్చిన హామీల అమలుపై దృష్టి పెట్టిందని తెలిపారు. ప్రతి నియోజకవర్గంలో మూడు వేలకుపైగా ఇందిరమ్మ ఇళ్ల నిర్మాణం చేపడుతున్నామని, ఇప్పటికే సుమారు 70 వేల ప్రభుత్వ ఉద్యోగాలను భర్తీ చేశామని పేర్కొన్నారు. 200 యూనిట్ల వరకు ఉచిత విద్యుత్, రైతులకు రూ.2 లక్షల వరకు ఏకకాలంలో రుణమాఫీ అమలు చేశామని వివరించారు.

కాలేశ్వరం ప్రాజెక్టు పేరుతో రూ.1.20 లక్షల కోట్ల ప్రజాధనాన్ని వృథా చేశారని బీఆర్ఎస్‌పై విమర్శలు గుప్పించారు. సిరిసిల్లలో ఇసుక మాఫియా, నేరెళ్ల ఘటనలు, పోలీసుల దౌర్జన్యాలు ప్రజలు మరచిపోలేదని అన్నారు.

రాష్ట్రంలో కాంగ్రెస్ ప్రభుత్వం సమర్థవంతమైన పాలన అందిస్తోందని, పదేళ్ల బీఆర్ఎస్ పాలనలో విదేశీ పెట్టుబడులు ఆశించిన స్థాయిలో రాలేదని, ప్రస్తుతం కాంగ్రెస్ ప్రభుత్వం దాదాపు రూ.6 లక్షల కోట్ల పెట్టుబడులను ఆకర్షించిందని తెలిపారు. అభివృద్ధి, సంక్షేమాన్ని సమానంగా కొనసాగిస్తున్నామని పేర్కొన్నారు.

బీజేపీ, బీఆర్ఎస్ ఒకరికొకరు వ్యతిరేకులుగా నటించినప్పటికీ, కేంద్రంలో కీలక బిల్లులు, రాష్ట్రపతి, ఉపరాష్ట్రపతి, పార్లమెంట్ స్పీకర్ ఎన్నికల సమయంలో బీఆర్ఎస్ బీజేపీకి మద్దతు ఇచ్చిందని ఆరోపించారు. ఢిల్లీలో రెండు పార్టీలు అవగాహనతో వ్యవహరించాయని, రాష్ట్రంలో మాత్రం రాజకీయంగా పరస్పరం విమర్శించుకున్నాయని అన్నారు.

కేంద్రంలో 11 సంవత్సరాలుగా అధికారంలో ఉన్న బీజేపీ సామాన్య ప్రజలకు చేసిందేమిటో చెప్పాలని ప్రశ్నించారు. రెండు కోట్ల ఉద్యోగాల హామీ అమలు కాలేదని, ప్రభుత్వ రంగ సంస్థలను బలహీనపరిచారని, పెట్రోల్, డీజిల్ ధరల పెంపుతో ప్రజలపై తీవ్ర భారం పడిందని విమర్శించారు. అంతర్జాతీయ మార్కెట్లో క్రూడ్ ఆయిల్ ధరలు తగ్గినా దేశంలో ఇంధన ధరలు తగ్గకపోవడంతో నిత్యావసరాల ధరలు పెరిగి ప్రజలు ఇబ్బందులు పడుతున్నారని పేర్కొన్నారు.

అదానీ, అంబానీల వంటి పారిశ్రామికవేత్తలకు మాత్రమే కేంద్ర ప్రభుత్వం ప్రయోజనం చేకూర్చిందని, మతాలు, కులాల మధ్య విభేదాలు సృష్టించి రాజకీయ లబ్ధి పొందాలని బీజేపీ ప్రయత్నిస్తోందని ఆరోపించారు. తెలంగాణ ప్రజలు అలాంటి రాజకీయాలను తిరస్కరించారని అన్నారు.

రాష్ట్రంలో కాంగ్రెస్ పార్టీ పేద ప్రజల సంక్షేమం, అభ్యున్నతినే లక్ష్యంగా పనిచేస్తోందని, ఇటీవల జరిగిన స్థానిక సంస్థల ఎన్నికల్లో ప్రజలు కాంగ్రెస్‌కు మద్దతు ఇచ్చారని తెలిపారు. రానున్న ఎన్నికల్లో కూడా కాంగ్రెస్ అత్యధిక స్థానాల్లో విజయం సాధించి మరోసారి అధికారంలోకి వస్తుందని ధీమా వ్యక్తం చేశారు.

ఈ విలేకరుల సమావేశంలో చొప్పదండి ఎమ్మెల్యే, జిల్లా కాంగ్రెస్ అధ్యక్షుడు డా. మేడిపల్లి సత్యం, సుడా చైర్మన్ కోమటిరెడ్డి నరేందర్ రెడ్డి, మున్నూరు కాపు కార్పొరేషన్ చైర్మన్ బొమ్మ శ్రీరామ్ చక్రవర్తి, మానకొండూర్ మాజీ ఎమ్మెల్యే ఆరేపెల్లి మోహన్, కరీంనగర్ కాంగ్రెస్ అధ్యక్షుడు వైద్యుల అంజన్ కుమార్, ఆల్ఫోర్స్ నరేందర్ రెడ్డి, ఆర్టీఏ సభ్యుడు పడాల రాహుల్ గౌడ్‌తో పాటు పలువురు కాంగ్రెస్ ప్రజాప్రతినిధులు, నాయకులు, కార్యకర్తలు పాల్గొన్నారు.

దిక్సూచిలో ఈ రోజు వార్తలు

 

1.  కరీంనగర్‌: కరీంనగర్​ వైదిక భవనంలో వైభవంగా సామూహిక ఉపనయన ఉత్సవం 

https://telanganadikhsoochi.blogspot.com/2026/07/blog-post_560.html

2. కరీంనగర్ జ్యోతినగర్‌లోని శ్రీ వెంకటేశ్వర స్వామి ఆలయంలో శుక్రవారం తిరుకల్యాణ మహోత్సవాన్ని భక్తిశ్రద్ధలతో నిర్వహించారు.

 https://telanganadikhsoochi.blogspot.com/2026/07/blog-post_03.html

3. కరీంనగర్​:   కరీంనగర్ కు టీపీసీసీ అధ్యక్షుడు రాక 

https://telanganadikhsoochi.blogspot.com/2026/07/blog-post_390.html

4. కరీంనగర్​:  4న సమైక్య సాహితీ విశిష్ట పురస్కారాల ప్రదానం

https://telanganadikhsoochi.blogspot.com/2026/07/4.html  

5. ఖమ్మం: మధిర నియోజకవర్గంలోని చింతకాని, ముదిగొండ మండల కేంద్రాల్లో సర్​ అవగాహన సమావేశంలో పాల్గొన్న టీపీసీసీ ప్రధాన కార్యదర్శి శ్రీనుబాబు   

https://telanganadikhsoochi.blogspot.com/2026/07/blog-post_880.html

6. మంథని: వైభవంగా హరే రామ స్వామి జయంతోత్సవాలు 

https://telanganadikhsoochi.blogspot.com/2026/07/blog-post_76.html

7. పెద్దపల్లి: మున్సిపాలిటీ పరిధిలోని బంధంపల్లి చెరువు వద్ద కొనసాగుతున్న అభివృద్ధి పనులను జిల్లా కలెక్టర్ కోయ శ్రీహర్ష  పరిశీలించారు. 

https://telanganadikhsoochi.blogspot.com/2026/07/blog-post_02.html

8.  యాదాద్రి శ్రీ లక్ష్మీనరసింహస్వామి దేవస్థానం పాలక మండలిని (ట్రస్ట్ బోర్డు)   సభ్యులుగా మెట్రో ఇండియా ఎండీ చిలప్పగారి విజయ రాజం కు అవకాశం 

https://telanganadikhsoochi.blogspot.com/2026/07/blog-post_01.html

కమనీయం శ్రీనివాస కళ్యాణం

శ్రవణ నక్షత్రం సందర్భంగా జ్యోతినగర్ శ్రీ వెంకటేశ్వర ఆలయంలో వైభవంగా తిరుకల్యాణ మహోత్సవం

కరీంనగర్, జూలై 3: కరీంనగర్ జ్యోతినగర్‌లోని శ్రీ వెంకటేశ్వర స్వామి ఆలయంలో శుక్రవారం శ్రవణ నక్షత్రం పురస్కరించుకుని స్వామివారి దివ్య తిరుకల్యాణ మహోత్సవాన్ని భక్తిశ్రద్ధలతో నిర్వహించారు. వేద మంత్రోచ్ఛారణలు, మంగళ వాయిద్యాల నడుమ జరిగిన ఈ వేడుకలో స్వామివారికి ప్రత్యేక పూజలు, అర్చనలు నిర్వహించి అనంతరం తిరుకల్యాణ మహోత్సవాన్ని వైభవంగా నిర్వహించారు.

ఈ సందర్భంగా అధిక సంఖ్యలో భక్తులు పాల్గొని శ్రీ వెంకటేశ్వర స్వామివారి దివ్య దర్శనం చేసుకుని ప్రత్యేక పూజల్లో పాల్గొన్నారు. ఆలయ ప్రాంగణం గోవింద నామస్మరణతో మారుమోగగా, ఆధ్యాత్మిక వాతావరణం నెలకొంది. కార్యక్రమం అనంతరం భక్తులకు తీర్థప్రసాదాలు, అన్నప్రసాదం పంపిణీ చేశారు.

వీడియో క్లిక్ చేయండి...

కరీంనగర్‌లో వైభవంగా సామూహిక ఉపనయన ఉత్సవం

రాష్ట్రవ్యాప్తంగా వటువులకు బ్రహ్మోపదేశం

కరీంనగర్, జూలై 2: కరీంనగర్ బ్రాహ్మణ సంఘం ఆధ్వర్యంలో నగరంలోని వేద భవన్‌లో గురువారం సామూహిక ఉపనయన మహోత్సవం భక్తిశ్రద్ధలతో, వైభవంగా నిర్వహించారు.

తెలంగాణ రాష్ట్రంలోని వివిధ ప్రాంతాల నుంచి వచ్చిన వటువులకు రెండు రోజుల పాటు ఉపనయనం, బ్రహ్మోపదేశం కార్యక్రమాలను ప్రముఖ వేద పండితుడు మల్లోజల రత్నాకర శర్మ ఆధ్వర్యంలో, వేద పండితుల పర్యవేక్షణలో శాస్త్రోక్తంగా నిర్వహించారు.

ఈ సందర్భంగా వేద మంత్రోచ్చారణల నడుమ వటువులకు యజ్ఞోపవీత ధారణ, గాయత్రీ మంత్ర బ్రహ్మోపదేశం, నిత్య సంధ్యావందన విధానాలను వివరించి ఆచరింపజేశారు. కార్యక్రమానికి వటువుల తల్లిదండ్రులు, కుటుంబ సభ్యులు, బ్రాహ్మణ సంఘం ప్రతినిధులు, వేద పండితులు, భక్తులు పెద్ద సంఖ్యలో హాజరై విజయవంతం చేశారు.

సనాతన ధర్మ పరిరక్షణలో భాగంగా ఇటువంటి సామూహిక ఉపనయన కార్యక్రమాలు యువతలో వేద సంప్రదాయాల పట్ల అవగాహన పెంపొందించడంలో కీలక పాత్ర పోషిస్తాయని నిర్వాహకులు పేర్కొన్నారు.

సర్​ ప్రక్రియపై అవగాహన

చింతకానిలో మాట్లాడుతున్న టీపీసీసీ రాష్ట్ర ప్రధాన కార్యదర్శి దుద్దిళ్ల శ్రీను బాబు

దిక్సూచి, ఖమ్మం, జూలై 2: 

ఓటర్ల జాబితా ప్రత్యేక సవరణ (SIR) ప్రక్రియను విజయవంతంగా నిర్వహించేందుకు కాంగ్రెస్ పార్టీ బూత్ లెవల్ ఏజెంట్ (BLA) సూపర్వైజర్లకు పూర్తి స్థాయి అవగాహన ఉండాలని టీపీసీసీ రాష్ట్ర ప్రధాన కార్యదర్శి దుద్దిళ్ల శ్రీను బాబు అన్నారు. ఖమ్మం జిల్లా మధిర నియోజకవర్గంలోని చింతకాని, ముదిగొండ మండల కేంద్రాల్లో   గురువారం కాంగ్రెస్ పార్టీ ఆధ్వర్యంలో నిర్వహించిన సర్​ ప్రక్రియపై BLA సూపర్వైజర్ల అవగాహన సమావేశంలో ఆయన పాల్గొన్నారు. ఈ సందర్భంగా శ్రీను బాబు మాట్లాడుతూ ఓటర్ల జాబితా ప్రత్యేక సవరణ ప్రక్రియలో ప్రతి బీఎల్ఏ సూపర్వైజర్ చురుకుగా పనిచేసి అర్హులైన ప్రతి ఓటరును జాబితాలో చేర్చేందుకు కృషి చేయాలని సూచించారు. ఎన్నికల సంఘం మార్గదర్శకాలపై పూర్తి అవగాహనతో పనిచేస్తూ, ప్రజలకు అవసరమైన సహకారం అందించాలని పిలుపునిచ్చారు. ఈ సమావేశంలో కాంగ్రెస్ పార్టీ నాయకులు, బీఎల్ఏ సూపర్వైజర్లు, పార్టీ కార్యకర్తలు తదితరులు పాల్గొన్నారు.

3న కరీంనగర్ కు టీపీసీసీ అధ్యక్షుడు రాక

దిక్సూచి, కరీంనగర్, జూలై 2: 

తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షులు, ఎమ్మెల్సీ బి. మహేష్ కుమార్ గౌడ్ శుక్రవారం (జూలై 3) కరీంనగర్ జిల్లాలో పర్యటించనున్నారు. ఈ పర్యటనలో భాగంగా ఆయన ఉదయం 8:00 గంటలకు హైదరాబాద్ నుంచి బయలుదేరి, 11:00 గంటలకు కరీంనగర్ చేరుకుంటారు. అనంతరం జగిత్యాల రోడ్డులోని రాజశ్రీ కన్వెన్షన్‌లో నిర్వహించే కార్యక్రమంలో పాల్గొంటారు. ఆ తర్వాత మధ్యాహ్నం 12:30 గంటలకు కరీంనగర్ నుంచి బయలుదేరి, 1:30 గంటలకు ధర్మపురి చేరుకుని ప్రసిద్ధ శ్రీ లక్ష్మీ నరసింహ స్వామి వారిని దర్శించుకుంటారు. ప్రత్యేక పూజల్లో పాల్గొన్న అనంతరం సాయంత్రం 5:00 గంటలకు ధర్మపురి నుంచి హైదరాబాద్‌కు తిరుగు ప్రయాణం కానున్నారు. ఈ సందర్భంగా కాంగ్రెస్ పార్టీ నాయకులు, కార్యకర్తలు పెద్ద సంఖ్యలో హాజరుకావాలని పార్టీ వర్గాలు కోరాయి.

4న సమైక్య సాహితి విశిష్ట పురస్కారాల ప్రదానం

కరీంనగర్ : కరీంనగర్ సమైక్య సాహితి, ఏటా నిర్వహించే విశిష్ట పురస్కారాల ప్రదానోత్సవంఈనెల 4 న శనివారం సా॥ 5.00 గంటలకు స్థానిక ఫిల్మ్ భవన్ లో నిర్వహించనున్నట్లు సంస్థ అధ్యక్ష కార్యదర్శులు మాడిశెట్టి గోపాల్, కె ఎస్ అనంతాచార్య లు తెలిపారు.ఈ సమావేశానికి ముఖ్య అతిథి గా ఐ.ఏ.ఎస్. అధికారి, రాష్ట్ర సివిల్ సప్లైస్ డైరెక్టర్ జి.వి. శ్యామ్ ప్రసాద్ లాల్ హాజరు కానున్నారు.అలాగే విశిష్ట అతిథులుగా కరీంనగర్ ఫిల్మ్ సొసైటీ అధ్యక్షులు, గద్దర్ అవార్డు గ్రహీత పొన్నం రవిచంద్ర, గౌరవ అతిథులుగా వాస్తు, జ్యోతిష్య పండితులు గోవర్ధనగిరి అనంతాచార్యులు నంది శ్రీనివాస్, సాహితీ గౌతమి అధ్యక్షులు హాజరు కానున్నారని వారు తెలిపారు.ఆచార్య రజనిశ్రీ పురస్కారాన్ని ప్రముఖ నృత్య కళాకారులు, ఆదివాసీ నృత్య నికేతన్ అధ్యక్షులు జె. రతన్ కుమార్ కు అందించనున్నారు.ఈ పురస్కార ప్రదాతగా జి.వి. శ్యామ్ ప్రసాద్ లాల్ వ్యవహరిస్తున్నారు.డాక్టర్ దారం నాగభూషణం పురస్కారాన్ని, ప్రముఖ చరిత్ర పరిశోధకులు, కవి కరిపె రాజ్ కుమార్ కు ప్రదానం చేస్తారు.ఈ పురస్కార ప్రదాత గాసీనియర్ ఫిజీషియన్ డాక్టర్. డి. రఘురామన్ , అందిస్తున్నారు.మాడిశెట్టి మల్లయ్య ఉపాధ్యాయ పురస్కారాన్ని ఉస్మానియా విశ్వవిద్యాలయం తెలుగు శాఖ అసోసియేట్ ప్రొఫెసర్, ఛైర్మన్ బోర్డు ఆఫ్ స్టడీస్, ఎస్. రఘు కు అందించనున్నారు.ఈ పురస్కారాన్ని సమైక్య సాహితి అధ్యక్షులు మాడిశెట్టి గోపాల్ అందిస్తున్నారు.రావికంటి రామయ్య గుప్త పురస్కారాన్ని ప్రముఖ పద్యకవి, చతుర, విపుల పూర్వ ఎడిటర్ చంద్ర ప్రతాప్ కంతేటి కి అందజేయనున్నారు.పురస్కార ప్రదాత గా ఈనాడు పూర్వ డిప్యూటి న్యూస్ ఎడిటర్ రావికంటి శ్రీనివాస్ వ్యవహరిస్తున్నారు.సంపత్ కుమారాచార్య పురస్కారాన్ని ప్రముఖ మృదంగ కళాకారులు నమిలికొండ వేణుగోపాల్ కు ప్రదానం చేస్తున్నారు. పురస్కార ప్రదాతగా సమైక్య సాహితి ప్రధాన కార్యదర్శి ఎస్.అనంతాచార్య వ్యవహరిస్తున్నారు. ఈ కార్యక్రమం లో సాంస్కృతిక కార్యక్రమాలు ఉంటాయని, అందరూ ఆహ్వానితులేనని వారు తెలిపారు.

వైభవంగా హరే రామ స్వామి జయంతోత్సవాలు

రామకృష్ణానంద ఆశ్రమంలో స్వామివారి విగ్రహం వద్ద హరేరామ భజన చేస్తున్న భక్తులు

వీడియో కోసం క్లిక్​ చేయండి

 

https://youtu.be/-WOgpwNG6ck

మంథని, జూలై 2: పెద్దపల్లి జిల్లా మంథనిలో శ్రీ శ్రీ శ్రీ రామకృష్ణానంద స్వామీజీ జయంతి ఉత్సవాలు భక్తిశ్రద్ధలతో వైభవంగా కొనసాగుతున్నాయి. ఉత్సవాల్లో భాగంగా రెండో రోజు గురువారం లోకకళ్యాణార్థం శ్రీమద్భగవద్గీత పారాయణాన్ని నిర్వహించారు.

ఈ సందర్భంగా వేద పండితులు, భక్తులు సామూహికంగా భగవద్గీత పారాయణంలో పాల్గొని ప్రపంచ శాంతి, ప్రజల ఆయురారోగ్యాలు, సుఖసంతోషాల కోసం ప్రత్యేక ప్రార్థనలు చేశారు. అనంతరం స్వామీజీ ఆశీస్సులతో భక్తులకు అన్నప్రసాదాన్ని సమర్పించారు.

ఈ కార్యక్రమంలో ఆశ్రమ నిర్వాహకులు, వేద పండితులు, స్థానిక ప్రజాప్రతినిధులు, భక్తులు పెద్ద సంఖ్యలో పాల్గొని ఉత్సవాలను విజయవంతం చేశారు. స్వామీజీ జయంతి ఉత్సవాలు మరికొన్ని రోజుల పాటు వివిధ ఆధ్యాత్మిక కార్యక్రమాలతో కొనసాగనున్నట్లు నిర్వాహకులు తెలిపారు.

బంధంపల్లి చెరువును మినీ ట్యాంక్‌బండ్ తరహాలో అభివృద్ధి చేయాలి

  

పెద్దపల్లి పట్టణంలోని బంధంపల్లి చెరువు అభివృద్ధి పనులను పరిశీలిస్తున్న జిల్లా కలెక్టర్  కోయ శ్రీహర్ష

అమృత్ 2.0 పథకం కింద రూ.2.50 కోట్లతో చేపట్టిన అభివృద్ధి పనులను వేగవంతంగా పూర్తి చేయాలి

జిల్లా ప్రజలకు ఆహ్లాదాన్ని పంచే విహార కేంద్రంగా చెరువును తీర్చిదిద్దాలి

జిల్లా కలెక్టర్  కోయ శ్రీహర్ష

 

దిక్సూచి, పెద్దపల్లి, జూలై 02:

 అమృత్ 2.0 పథకం కింద పెద్దపల్లి పట్టణంలోని బంధంపల్లి చెరువును మినీ ట్యాంక్‌బండ్ తరహాలో అభివృద్ధి చేస్తూ, జిల్లా ప్రజలకు ఆహ్లాదాన్ని పంచే విహార కేంద్రంగా తీర్చిదిద్దాలని జిల్లా కలెక్టర్ కోయ శ్రీహర్ష సంబంధిత అధికారులను ఆదేశించారు. గురువారం పెద్దపల్లి మున్సిపాలిటీ 1వ వార్డులోని బంధంపల్లి చెరువు వద్ద కొనసాగుతున్న అభివృద్ధి పనులను జిల్లా కలెక్టర్  పరిశీలించారు.  ఈ సందర్భంగా పనుల పురోగతిని అధికారులను అడిగి తెలుసుకుని, చేపడుతున్న పనులు నాణ్యత ప్రమాణాలకు అనుగుణంగా ఉండేలా చూడాలని సూచించారు. ఈ సందర్భంగా మాట్లాడుతూ  అమృత్ 2.0 పథకం కింద రూ.2.50 కోట్లతో చేపట్టిన అభివృద్ధి పనులను నిర్ణీత గడువులోగా పూర్తి చేయాలని తెలిపారు. చెరువు పరిసరాలను ప్రజలు సేదతీరే విధంగా అందంగా తీర్చిదిద్దడంతో పాటు, మినీ ట్యాంక్‌బండ్ తరహాలో అభివృద్ధి చేసి జిల్లాకు ప్రత్యేక ఆకర్షణగా నిలిచేలా చర్యలు చేపట్టాలని సూచించారు. శాంతినగర్ వైపు నుంచి సందర్శకులు సులభంగా చేరుకునేలా అవసరమైన మౌలిక వసతులు కల్పించాలని, అవసరమైతే అదనపు నిధులు సమీకరించి మరిన్ని అభివృద్ధి పనులు చేపట్టాలని అధికారులను ఆదేశించారు. ప్రజలకు ఆహ్లాదాన్ని పంచే విధంగా పార్కులు, నడక మార్గాలు, విశ్రాంతి సదుపాయాలు తదితర మౌలిక వసతులను సమకూర్చాలని సూచించారు. పనుల అమలులో నాణ్యతకు అత్యంత ప్రాధాన్యత ఇవ్వాలని, ప్రజలకు దీర్ఘకాలం ఉపయోగపడే విధంగా అభివృద్ధి పనులు చేపట్టాలని కలెక్టర్ పేర్కొన్నారు.  ఈ పరిశీలనలో పెద్దపల్లి మున్సిపల్ చైర్మన్, నూగిళ్ల మల్లయ్య,రెవెన్యూ డివిజనల్ అధికారి బి. గంగయ్య,  మున్సిపల్ కమిషనర్ వెంకటేష్,1 వ వార్డు కౌన్సిలర్ శైలజ సుధాకర్,  సంబంధిత శాఖల అధికారులు తదితరులు పాల్గొన్నారు.

బీఎల్ఏ లు బాధ్యతాయుతంగా వ్యవహరించాలి

టీపీసీసీ రాష్ట్ర ప్రధాన కార్యదర్శి దుద్దిళ్ల శ్రీను బాబు

SIR ప్రక్రియపై BLA సూపర్వైజర్ల అవగాహన సమావేశంలో పాల్గొన్న వైనం

వరంగల్:

బీఎల్ఏ లు బాధ్యతాయుతంగా వ్యవహరించాలని టీపీసీసీ రాష్ట్ర ప్రధాన కార్యదర్శి దుద్దిళ్ల శ్రీను బాబు పిలుపునిచ్చారు.

జనగాం జిల్లా స్టేషన్ ఘన్‌పూర్ నియోజకవర్గంలోని ఎస్ కన్వెన్షన్ హాల్‌లో స్థానిక శాసనసభ్యులు కడియం శ్రీహరి గారి అధ్యక్షతన ఓటర్ల జాబితా ప్రత్యేక సవరణ (SIR) ప్రక్రియపై కాంగ్రెస్ పార్టీ బూత్ లెవెల్ ఏజెంట్ల (BLA) సూపర్వైజర్లకు అవగాహన సమావేశం నిర్వహించారు.

ఈ కార్యక్రమంలో  పాల్గొని మాట్లాడుతూ ప్రత్యేక ఓటర్ల జాబితా సవరణ ప్రక్రియలో BLAలు అత్యంత బాధ్యతాయుతంగా వ్యవహరించాలని, ప్రతి బూత్ పరిధిలో క్షేత్రస్థాయిలో ప్రజలకు అందుబాటులో ఉంటూ అర్హులైన ప్రతి ఓటరు పేరు ఓటర్ల జాబితాలో నమోదయ్యేలా కృషి చేయాలని సూచించారు.

అలాగే, అర్హులైన కొత్త ఓటర్ల నమోదు, చిరునామా మార్పులు, తప్పుల సవరణలు, మరణించిన వారి పేర్ల తొలగింపు వంటి అంశాల్లో  నిబంధనల మేరకు పార్టీ కార్యకర్తలు సమన్వయంతో పనిచేయాలని పిలుపునిచ్చారు.

ఘనంగా తెలంగాణ రాష్ట్ర బ్రాహ్మణ సంక్షేమ పరిషత్ చైర్మన్ జన్మదిన వేడుకలు

డాక్టర్ అజయ్ కుమార్ ను సన్మానిస్తున్న  విజయ్ కుమార్

కరీంనగర్:

తెలంగాణ బ్రాహ్మణ సంక్షేమ పరిషత్ చైర్మన్ మరియు తెలంగాణ బ్రాహ్మణ సేవా సమైక్య కన్వీనర్ అయిన బసవరాజు శ్రీనివాస్ జన్మదినము మరియు జాతీయ డాక్టర్స్ దినోత్సవాన్ని యువజన నాయకులు పామరాజ్ విజయ్ కుమార్ ఆధ్వర్యంలో కరీంనగర్ జిల్లా కేంద్రం లోని సీనియర్ వైద్యులు అజయ్ కుమార్ ను సన్మానించారు.  28 సంవత్సరాలుగా పేద ప్రజలకు వైద్య సేవలు అందిస్తూ ఉత్తమ వైద్య అధికారిగా పేరొందిన అజయ్ కుమార్ (పిల్లల వైద్య నిపుణులు) ను సంఘ సేవకులు నిస్వార్థ ప్రజా నాయకులు నిరంతరం ఎంతోమందికి విద్య వైద్యం కొరకు సంస్థ ద్వారా విరాళాలు అందిస్తూ ఇత్తోదికంగా సేవ చేస్తున్న బసవరాజు శ్రీనివాస్ గారి జన్మదినం సందర్భంగా సన్మానించడం ఎంతో గర్వంగా ఉందని విజయకుమార్ పేర్కొన్నారు. అనంతరం స్థానిక వన్ టౌన్ పోలీస్ స్టేషన్  చౌరస్తాలో పేదలకు మిఠాయి పంపిణీ చేయడం జరిగింది. ఈ కార్యక్రమంలో యువజన నాయకులు దేవరాజు వెంకటేశ్వరరావు ప్రతాప రాజేశ్వరరావు చేపూరి రామారావు గూడూరి సంతోష్ కుమార్ గజవెళ్లి నవీన్ రేప్రవీణ్ ప్రశాంత్ ప్రసాద్ మహిధర్ యుగంధర్ బసవరాజు అభిమానులు తదితరులు పాల్గొన్నారు

యాదాద్రి శ్రీ లక్ష్మీనరసింహస్వామి దేవస్థానం పాలక మండలి సభ్యురాలిగా విజయ రాజం

హైదరాబాద్: తెలంగాణ ప్రభుత్వం యాదాద్రి శ్రీ లక్ష్మీనరసింహస్వామి దేవస్థానం పాలక మండలిని (ట్రస్ట్ బోర్డు) అధికారికంగా ఏర్పాటు చేసింది. ఈ కొత్త పాలక మండలిలో మెట్రో ఇండియా మేనేజింగ్ డైరెక్టర్ సీ. విజయ రాజంకు సభ్యురాలిగా అవకాశం కల్పించింది. ప్రముఖ నటుడు చిరంజీవి సతీమణి కొణిదెల సురేఖతో పాటు పలువురు ప్రముఖులకు కూడా బోర్డులో స్థానం దక్కింది.

ప్రభుత్వం జారీ చేసిన ఉత్తర్వుల ప్రకారం, ఎం. సత్యనారాయణ రెడ్డిని పాలక మండలి ఛైర్మన్‌గా నియమించింది. సభ్యులుగా వినోద్ వెంకటస్వామి (ఎమ్మెల్యే), విజయేందర్ తుల్లా, పోచబోయిన ఈశ్వరమ్మ యాదవ్, గుండు మల్లయ్య, స్వాతి కాంతామణి, ఎం. రాఘవేందర్ రావు, సీ. విజయ రాజంలను నామినేట్ చేసింది. అలాగే డాక్టర్ లక్ష్మీనారాయణ నాయక్ వ్యవస్థాపక ట్రస్టీ గా కొనసాగనున్నారు.

దేవస్థానం పాలనలో భాగంగా పలువురు ఉన్నతాధికారులు ఎక్స్-ఆఫిషియో సభ్యులుగా వ్యవహరించనున్నారు. వీరిలో తెలంగాణ ప్రభుత్వ ప్రధాన కార్యదర్శి, రెవెన్యూ (దేవాదాయ శాఖ) ముఖ్య కార్యదర్శి, దేవాదాయ శాఖ కమిషనర్, యాదాద్రి భువనగిరి జిల్లా కలెక్టర్, యాదాద్రి టెంపుల్ డెవలప్‌మెంట్ అథారిటీ, వైస్ చైర్మన్, దేవస్థానం కార్యనిర్వాహణాధికారి (ఈవో), స్థానాచార్య సీనియర్ ప్రధాన అర్చకులు సభ్యులుగా ఉంటారు.

ప్రభుత్వ ఉత్తర్వుల ప్రకారం, ఛైర్మన్‌తో పాటు నామినేటెడ్ సభ్యుల పదవీకాలం నియామక తేదీ నుంచి రెండేళ్లు లేదా ప్రభుత్వం తదుపరి ఉత్తర్వులు జారీ చేసే వరకు, ఏది ముందుగా అమల్లోకి వస్తే అప్పటి వరకు కొనసాగుతుంది. అయితే ఎక్స్-ఆఫిషియో సభ్యులు, వ్యవస్థాపక ట్రస్టీకి ఈ నిబంధన వర్తించదు.

కొత్తగా ఏర్పాటైన పాలక మండలి సభ్యులతో పదవీ ప్రమాణం, గోప్యతా ప్రమాణం చేయించే బాధ్యతను యాదాద్రి శ్రీ లక్ష్మీనరసింహస్వామి దేవస్థానం కార్యనిర్వాహణాధికారి (ఈవో)కి ప్రభుత్వం అప్పగించింది.

యాదాద్రి దేవస్థానం తెలంగాణలో అత్యంత ప్రముఖ ఆధ్యాత్మిక క్షేత్రాల్లో ఒకటి. ఆలయ అభివృద్ధి, భక్తులకు మెరుగైన సౌకర్యాల కల్పన, ఆలయ పరిపాలన, ఆర్థిక వ్యవహారాల నిర్వహణలో ఈ పాలక మండలి కీలక పాత్ర పోషించనుంది.

వాక్-ఇన్ ఇంటర్వ్యూ

​రామగుండం ప్రభుత్వ జనరల్ ఆసుపత్రిలో 

మెడికల్ ఆఫీసర్ పోస్టుకు వాక్-ఇన్ ఇంటర్వ్యూ 

- మెడికల్ సూపరింటెండెంట్ డాక్టర్. హిమబిందు సింగ్

​రామగుండం:

​రామగుండం ప్రభుత్వ జనరల్ ఆసుపత్రిలో అడిక్షన్ ట్రీట్‌మెంట్ ఫెసిలిటీ ప్రోగ్రాంలో ఖాళీగా ఉన్న ఒక (01)మెడికల్ ఆఫీసర్ పోస్టును కాంట్రాక్టు ప్రాతిపదికన భర్తీ చేసేందుకు వాక్-ఇన్ ఇంటర్వ్యూ నిర్వహిస్తున్నామని, అర్హత గల అభ్యర్థులు హాజరుకావాలని రామగుండం ప్రభుత్వ జనరల్ ఆసుపత్రి మెడికల్ సూపరింటెండెంట్ డాక్టర్. హిమబిందు సింగ్  ఒక ప్రకటనలో తెలిపారు.

ఈ పోస్టుకు దరఖాస్తు చేసుకునే అభ్యర్థులు ఎంబీబీఎస్  ఉత్తీర్ణులై ఉండాలని, తెలంగాణ మెడికల్ కౌన్సిల్ లేదా నేషనల్ మెడికల్ కమిషన్‌లో చెల్లుబాటు అయ్యే రిజిస్ట్రేషన్ కలిగి ఉండాలని, జూలై, 7 ఉదయం 11:00 గంటలకు ప్రభుత్వ జనరల్ ఆసుపత్రి, రామగుండం, ​నందు అభ్యర్థులు తమ విద్యార్హతలు, రిజిస్ట్రేషన్ ధృవీకరణ పత్రం, ఇతర సంబంధిత అన్ని ఒరిజినల్ ధృవీకరణ పత్రాలతో ఇంటర్వ్యూకు హాజరు కావాలని, పూర్తి వివరాల కోసం రామగుండం ప్రభుత్వ జనరల్ ఆసుపత్రిని సంప్రదించాలని మెడికల్ సూపరింటెండెంట్ ఆ పేర్కొన్నారు.