తెలంగాణ రైజింగ్‌ గ్లోబల్‌ సమ్మిట్‌ ఏర్పాట్లు పకడ్బందీగా చేపట్టాలి

 

పెట్టుబడులు, పరిశ్రమలు, యువతకు ఉపాధే లక్ష్యం: మంత్రి శ్రీధర్‌బాబు

దిక్సూచి, హైదరాబాద్‌:

రాష్ట్ర ప్రభుత్వం డిసెంబర్‌ 7, 8, 9 తేదీల్లో ప్రతిష్ఠాత్మకంగా నిర్వహించనున్న ‘తెలంగాణ రైజింగ్‌ గ్లోబల్‌ సమ్మిట్‌–2026’ ఏర్పాట్లపై ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు ఉన్నతస్థాయి సమీక్ష నిర్వహించారు. శనివారం ఆబిడ్స్‌లోని ఇండస్ట్రీస్‌ డైరెక్టర్‌ కార్యాలయంలో జరిగిన సమావేశంలో సమ్మిట్‌ ఏర్పాట్లు, రోడ్‌షోలు, ఎంవోయూలు, ప్రచారం, లాజిస్టిక్స్‌, ప్రోటోకాల్‌ తదితర అంశాలపై అధికారులకు దిశానిర్దేశం చేశారు. 

ప్రపంచస్థాయి పెట్టుబడులను ఆకర్షించి, కొత్త పరిశ్రమల ఏర్పాటుతో రాష్ట్ర యువతకు భారీగా ఉపాధి అవకాశాలు కల్పించడమే ప్రభుత్వ ప్రధాన సంకల్పమని శ్రీధర్‌బాబు తెలిపారు. తెలంగాణను పెట్టుబడులకు మరింత ఆకర్షణీయ గమ్యస్థానంగా తీర్చిదిద్దేందుకు గ్లోబల్‌ సమ్మిట్‌ను పూర్తిస్థాయిలో సద్వినియోగం చేసుకోవాలని సూచించారు.

ఈజ్‌ ఆఫ్‌ డూయింగ్‌ బిజినెస్‌లో తెలంగాణను ఇతర రాష్ట్రాలకు రోల్‌మోడల్‌గా నిలిపేలా కొత్త విధానాలను రూపొందిస్తున్నామని మంత్రి తెలిపారు. తెలంగాణ బ్రాండ్‌ ఇమేజ్‌ను అంతర్జాతీయ స్థాయికి తీసుకెళ్లేలా దేశీయ, విదేశీ స్థాయిలో విస్తృత ప్రచారం కల్పించేందుకు ప్రత్యేక రోడ్‌షోలు నిర్వహించనున్నట్లు వెల్లడించారు.

సమ్మిట్‌ వేదికగా తెలంగాణలో పెట్టుబడులకు ఉన్న అవకాశాలు, పరిశ్రమల ఏర్పాటుకు అనుకూల పరిస్థితులను పారిశ్రామికవేత్తలకు వివరించేలా ప్రత్యేక ఏర్పాట్లు చేస్తున్నామని చెప్పారు. గతంలో కుదిరిన ఎంవోయూలు కేవలం ఒప్పందాలకే పరిమితం కాకుండా క్షేత్రస్థాయిలో పెట్టుబడులుగా, పరిశ్రమలుగా రూపుదిద్దుకునేలా ప్రత్యేక చర్యలు తీసుకుంటున్నామని తెలిపారు. ప్రతి ఎంవోయూపై ఎప్పటికప్పుడు పకడ్బందీగా ఫాలోఅప్‌ చేయాలని అధికారులను ఆదేశించారు.

భారీగా ఉద్యోగ, ఉపాధి అవకాశాలు కల్పించే రంగా
లకు సమ్మిట్‌లో అత్యధిక ప్రాధాన్యం ఇవ్వనున్నట్లు మంత్రి వెల్లడించారు. విదేశీ ప్రతినిధులు, పారిశ్రామిక దిగ్గజాలకు ఎలాంటి అసౌకర్యం కలగకుండా లాజిస్టిక్స్‌, ప్రోటోకాల్‌, హాస్పిటాలిటీ ఏర్పాట్లపై ప్రత్యేక దృష్టి సారించాలని సూచించారు.

శాఖల మధ్య సమన్వయం లోపించకుండా ప్రతి శాఖకు స్పష్టమైన బాధ్యతలు, టైమ్‌లైన్లు నిర్దేశించామని, ప్రత్యేక కమిటీలను ఏర్పాటు చేసినట్లు తెలిపారు. సమ్మిట్‌ ఏర్పాట్లపై ఎప్పటికప్పుడు సమీక్ష నిర్వహిస్తూ, నిర్దేశిత గడువులో అన్ని పనులు పూర్తయ్యేలా ప్రత్యేక కార్యాచరణ అమలు చేస్తున్నామని శ్రీధర్‌బాబు పేర్కొన్నారు.

వర్షాకాల అసెంబ్లీ సమావేశాలకు పకడ్బందీ ఏర్పాట్లు

 

5 నుంచి ప్రారంభం

నిర్వహణ, వసతులు, భద్రతపై ఉన్నతస్థాయి సమీక్ష

దిక్సూచి ప్రతినిధి, హైదరాబాద్‌, సెప్టెంబర్‌ 5: సోమవారం నుంచి ప్రారంభం కానున్న తెలంగాణ శాసనసభ వర్షాకాల సమావేశాల నేపథ్యంలో సభ నిర్వహణకు సంబంధించిన ఏర్పాట్లపై ప్రభుత్వం ప్రత్యేక దృష్టి సారించింది. సమావేశాల నిర్వహణ, శాసనసభ్యులకు అవసరమైన వసతులు, భద్రతా చర్యలు, ఇతర శాఖల సమన్వయంపై శనివారం ఉన్నతస్థాయి సన్నాహక సమావేశం నిర్వహించారు.  

శాసనసభ వ్యవహారాల శాఖ మంత్రి దుద్దిళ్ల శ్రీధర్‌బాబు ఆధ్వర్యంలో జరిగిన ఈ సమావేశంలో శాసనసభాపతి గడ్డం ప్రసాద్‌కుమార్, శాసనమండలి చైర్మన్ గుత్తా సుఖేందర్‌రెడ్డి, మండలి డిప్యూటీ చైర్మన్ బండా ప్రకాశ్, మండలి చీఫ్‌విప్ పట్నం మహేందర్‌రెడ్డి, రాష్ట్ర ప్రభుత్వ ప్రధాన కార్యదర్శి సంజయ్‌ జాజుతో పాటు వివిధ శాఖల ఉన్నతాధికారులు పాల్గొన్నారు.

సమావేశాల్లో ఎలాంటి ఇబ్బందులు తలెత్తకుండా అన్ని ఏర్పాట్లను ముందుగానే పూర్తి చేయాలని అధికారులు, సంబంధిత శాఖలకు సూచనలు చేశారు. శాసనసభ, శాసనమండలి సమావేశాలు సజావుగా సాగేందుకు అవసరమైన మౌలిక వసతులు, సభ్యులకు కల్పించాల్సిన సౌకర్యాలు, సభా ప్రాంగణంలో నిర్వహణ తదితర అంశాలపై చర్చించారు.

అదేవిధంగా సమావేశాల సందర్భంగా భద్రతకు అత్యంత ప్రాధాన్యం ఇవ్వాలని నిర్ణయించారు. శాసనసభ ప్రాంగణం, పరిసర ప్రాంతాల్లో భద్రతా ఏర్పాట్లను పటిష్టం చేయడంతో పాటు ట్రాఫిక్‌ నియంత్రణ, వాహనాల రాకపోకలు, ప్రజలు, సందర్శకుల భద్రతకు సంబంధించిన అంశాలపై కూడా అధికారులు సమన్వయంతో పనిచేయాలని సూచించారు.

వర్షాకాల సమావేశాలకు హాజరయ్యే మంత్రులు, ఎమ్మెల్యేలు, ఎమ్మెల్సీలు, అధికారులు, మీడియా ప్రతినిధులకు అవసరమైన సౌకర్యాలు అందుబాటులో ఉండేలా చర్యలు చేపట్టాలని సమావేశంలో సూచించినట్లు సమాచారం. వివిధ ప్రభుత్వ శాఖల మధ్య సమన్వయం కొనసాగిస్తూ సమావేశాలు ప్రశాంతంగా, సమర్థవంతంగా జరిగేలా ముందస్తు చర్యలు తీసుకోవాలని నిర్ణయించారు.

ప్రజా సమస్యలు, ప్రభుత్వ విధానాలు, వివిధ అంశాలపై చర్చకు వేదిక కానున్న శాసనసభ వర్షాకాల సమావేశాలను విజయవంతంగా నిర్వహించేందుకు ప్రభుత్వం అన్ని ఏర్పాట్లను పూర్తి చేస్తోంది.

నిరుపేద కుటుంబానికి ఇందిరమ్మ ఇల్లు.. నూతన గృహప్రవేశం

 

దిక్సూచి, మంథని, సెప్టెంబర్‌ 5: 

కాంగ్రెస్‌ ప్రజా ప్రభుత్వం నిరుపేదల సంక్షేమానికి ప్రాధాన్యం ఇస్తోందని మండల కాంగ్రెస్‌ అధ్యక్షుడు అయిలి ప్రసాద్ అన్నారు. మంత్రి దుద్దిళ్ల శ్రీధర్‌బాబు ఆశీస్సులతో మంథని నియోజకవర్గం కాకర్లపల్లి గ్రామానికి చెందిన దివంగత దొబ్బల చంద్రయ్య కుటుంబానికి ఇందిరమ్మ ఇల్లు మంజూరైంది. ఇందిరమ్మ ఇంటి నిర్మాణం పూర్తికావడంతో శనివారం కుటుంబ సభ్యులతో కలిసి నిర్వహించిన నూతన గృహప్రవేశ కార్యక్రమాన్ని అయిలి ప్రసాద్ ప్రారంభించారు. ఈ సందర్భంగా ఆయన మాట్లాడుతూ.. నిరుపేద కుటుంబాల్లో ఆనందం నింపడమే కాంగ్రెస్‌ ప్రజా ప్రభుత్వ లక్ష్యమన్నారు.   

ఇందిరమ్మ ఇళ్ల మంజూరు విషయంలో ఎవరూ లంచం ఇవ్వొద్దని, ఎవరైనా ఇబ్బందులకు గురిచేస్తే క్యాంపు కార్యాలయంలో లేదా తనను నేరుగా సంప్రదించాలని సూచించారు. మంత్రి శ్రీధర్‌బాబు మంథని ప్రాంత అభివృద్ధికి నిరంతరం కృషి చేస్తున్నారని తెలిపారు.

ప్రజలకు తెల్ల రేషన్‌ కార్డులు, ఇందిరమ్మ ఇళ్లు, 200 యూనిట్ల ఉచిత విద్యుత్‌, రూ.10 లక్షల ఆరోగ్యశ్రీ, రూ.2 లక్షల రుణమాఫీ వంటి సంక్షేమ పథకాలు అందుతున్నాయని, రానున్న రోజుల్లో మరిన్ని అభివృద్ధి కార్యక్రమాలు చేపడతామని పేర్కొన్నారు.

కార్యక్రమంలో సోషల్‌ మీడియా ఇన్‌చార్జి ఆరెల్లి కిరణ్‌గౌడ్‌, ఉపసర్పంచ్‌ ఆకుల ప్రత్యూష సాయి, మార్కెట్‌ కమిటీ డైరెక్టర్‌ కన్నెబోయిన ఓదెలు, మాజీ చైర్మన్‌ ఆకుల కిరణ్‌, కాంగ్రెస్‌ నాయకులు, యువజన నాయకులు, కార్యకర్తలు పాల్గొన్నారు.

నిరుద్యోగులను ఉద్యోగులుగా తీర్చిదిద్దడమే లక్ష్యం

 

కాటారం: నిరుద్యోగ యువతకు నాణ్యమైన ఉచిత శిక్షణ అందించి వారిని ఉద్యోగులుగా తీర్చిదిద్దడమే లక్ష్యమని టీపీసీసీ రాష్ట్ర ప్రధాన కార్యదర్శి దుద్దిళ్ల శ్రీను బాబు అన్నారు. మంథని నియోజకవర్గ నిరుద్యోగ యువత కోసం మంత్రి దుద్దిళ్ల శ్రీధర్‌బాబు ఆధ్వర్యంలో చేపట్టిన ‘మన ఊరు–మన కోచింగ్‌ సెంటర్‌’ కార్యక్రమంలో భాగంగా కాటారం మండల కేంద్రంలోని సువిద్య స్కూల్‌లో శ్రీ విశ్వ అకాడమీ ఆధ్వర్యంలో ఏర్పాటు చేసిన ఎస్‌ఐ, కానిస్టేబుల్‌ ఉచిత శిక్షణ తరగతులను ఆయన ప్రారంభించారు.

ఈ సందర్భంగా శ్రీను బాబు మాట్లాడుతూ.. పోలీస్‌ ఉద్యోగాలను లక్ష్యంగా పెట్టుకున్న యువతకు నిపుణులైన అధ్యాపకులతో నాణ్యమైన శిక్షణ అందించేందుకు ఈ కార్యక్రమాన్ని ప్రారంభించినట్లు తెలిపారు. యువతలోని ప్రతిభను వెలికితీసి, వారు కోరుకున్న ఉద్యోగాలు సాధించేలా ప్రోత్సహించడమే ఉచిత కోచింగ్‌ ప్రధాన ఉద్దేశమన్నారు.

మంథని నియోజకవర్గంలోని నిరుద్యోగ యువత ఈ అవకాశాన్ని సద్వినియోగం చేసుకుని కష్టపడి చదివి ఎస్‌ఐ, కానిస్టేబుల్‌ ఉద్యోగాలు సాధించాలని ఆకాంక్షించారు. ఉద్యోగాలు సాధించి తమ కుటుంబాలతో పాటు మంథని నియోజకవర్గానికి గర్వకారణంగా నిలవాలని శ్రీను బాబు కోరారు.

ఉట్టి కొట్టి ఉత్సాహం నింపిన దుద్దిళ్ల శ్రీను బాబు

 

దిక్సూచి,  మహాదేవపూర్: 

జయశంకర్‌ భూపాలపల్లి జిల్లా మహాదేవపూర్‌ మండల కేంద్రంలో అఖిల భారత యాదవ సంఘం ఆధ్వర్యంలో శ్రీకృష్ణ జన్మాష్టమి వేడుకలను ఘనంగా నిర్వహించారు. ఈ కార్యక్రమానికి టీపీసీసీ రాష్ట్ర ప్రధాన కార్యదర్శి దుద్దిళ్ల శ్రీను బాబు ముఖ్య అతిథిగా హాజరై వేడుకల్లో పాల్గొన్నారు.

ఈ సందర్భంగా శ్రీకృష్ణుడి విగ్రహానికి ప్రత్యేక పూజలు నిర్వహించి, ప్రజలకు జన్మాష్టమి శుభాకాంక్షలు తెలిపారు. శ్రీకృష్ణుడి బోధనలు సమాజానికి స్ఫూర్తిదాయకమని, ధర్మం, సత్యం, న్యాయం కోసం ఆయన చూపిన మార్గం ప్రతి ఒక్కరికీ ఆదర్శమని శ్రీను బాబు అన్నారు. శ్రీకృష్ణుడి ఆశీస్సులతో ప్రజలంతా సుఖసంతోషాలతో, ఆయురారోగ్యాలతో జీవించాలని ఆకాంక్షించారు.

అనంతరం వేడుకల్లో భాగంగా నిర్వహించిన ఉట్టి కొట్టే కార్యక్రమంలో శ్రీను బాబు ఉత్సాహంగా పాల్గొని ఉట్టి కొట్టారు. దీంతో వేడుకల ప్రాంగణంలో సందడి నెలకొంది. యాదవ సంఘం ప్రతినిధులు, నాయకులు, భక్తులు, స్థానిక ప్రజలు పెద్ద సంఖ్యలో పాల్గొన్నారు.

కృష్ణాష్టమి వేడుకల్లో భక్తుల సందడి

 

మంథని: మున్సిపల్‌ పరిధిలోని రావులచెరువు కట్ట ప్రాంతంలోని శ్రీ మంత్రకూట గోపిజన వల్లభ మందిరంలో శుక్రవారం కృష్ణాష్టమి వేడుకలు భక్తిశ్రద్ధలతో జరిగాయి. ఉదయం నుంచే ఆలయంలో ప్రత్యేక పూజలు నిర్వహించగా, పెద్ద సంఖ్యలో భక్తులు తరలివచ్చారు.

ఈ సందర్భంగా ఆలయ ప్రధాన అర్చకులు, వేదమూర్తులు అవుదానుల శ్రీకాంత్‌ శర్మ మాట్లాడుతూ.. ఈ మందిరం ఎంతో పవిత్రమైనదని, శ్రీకృష్ణుడి మహోన్నత మహిమకు ప్రతీకగా నిలుస్తోందని తెలిపారు. ప్రతి కృష్ణాష్టమి రోజున స్వామివారికి ప్రత్యేకంగా వెన్నను నైవేద్యంగా సమర్పిస్తామని చెప్పారు. ఆ వెన్నను మూడు నెలల అనంతరం తిరిగి తీస్తామని, అప్పటివరకు అది కరగకుండా ముద్దగా ఉంటుందని పేర్కొన్నారు. ఇది శ్రీకృష్ణుడి లీలా మహిమకు నిదర్శనమని, ఆలయంలో ఎన్నో అద్భుతాలను స్వయంగా చూశామని తెలిపారు.

కృష్ణాష్టమి సందర్భంగా చిన్నారులు శ్రీకృష్ణుడి వేషధారణలో అలరించగా, మహిళలు, పురుషులు పెద్ద సంఖ్యలో పాల్గొని ప్రత్యేక పూజలు నిర్వహించారు. సాయంత్రం ప్రత్యేక పూజలు, భజన కార్యక్రమాలు నిర్వహించనున్నట్లు ఆలయ అర్చకులు తెలిపారు.

కొండా సురేఖకు ఉద్వాసన?

బర్తరఫ్‌ తర్వాత బీసీ మహిళలకు కీలక పదవులపై కాంగ్రెస్‌ కసరత్తు!

దిక్సూచి ప్రత్యేక కథనం

తెలంగాణ కాంగ్రెస్‌లో మరోసారి రాజకీయ కలకలం రేగుతున్నదా..? మంత్రి కొండా సురేఖను మంత్రివర్గం నుంచి తప్పించే అంశంపై అధిష్ఠానం కీలక నిర్ణయానికి చేరుకుందా..? సీఎం రేవంత్‌రెడ్డి హైదరాబాద్‌కు తిరిగి వచ్చిన వెంటనే లోక్‌భవన్‌కు బర్తరఫ్‌ లేఖ పంపే అవకాశముందన్న చర్చ రాజకీయ వర్గాల్లో జోరందుకుంది.

కొండా సురేఖ వ్యవహారంపై గత కొంతకాలంగా పార్టీలో తీవ్ర చర్చ జరుగుతున్న నేపథ్యంలో.. ఇప్పుడు తదుపరి పరిణామాలపై కాంగ్రెస్‌ అధిష్ఠానం దృష్టి సారించినట్లు తెలుస్తోంది. ఒకవేళ బర్తరఫ్‌ జరిగితే దాని ప్రభావం పార్టీపై ఎలా ఉంటుంది? వరంగల్‌ రాజకీయాల్లో ఎలాంటి సమీకరణాలు మారతాయి? కొండా వర్గం స్పందన ఎలా ఉండొచ్చు? అనే అంశాలపై సీనియర్‌ నేతల నుంచి అధిష్ఠానం వివరాలు సేకరిస్తున్నట్లు సమాచారం.

బర్తరఫ్‌ తర్వాతే అసలు లెక్కలు?

సురేఖను మంత్రివర్గం నుంచి తప్పించే పరిస్థితి ఏర్పడితే.. కేవలం ఒక మంత్రి మార్పుతోనే వ్యవహారం ముగించకుండా, దాని ద్వారా ఏర్పడే రాజకీయ ఖాళీని ఎలా భర్తీ చేయాలనే దానిపై కూడా కాంగ్రెస్‌ పెద్దలు దృష్టి పెట్టినట్లు ప్రచారం జరుగుతోంది.

ప్రత్యేకంగా బీసీ మహిళలకు ప్రాధాన్యం ఇవ్వాలనే ఆలోచన పార్టీ వర్గాల్లో చర్చకు వచ్చినట్లు సమాచారం. ఇప్పటికే మహిళలు, బీసీలకు ప్రాతినిధ్యం పెంచాల్సిన అవసరంపై పార్టీలో చర్చ జరుగుతున్న నేపథ్యంలో.. ఈ పరిణామాన్ని రాజకీయంగా అనుకూలంగా మలుచుకునే వ్యూహంపై కసరత్తు సాగుతున్నట్లు తెలుస్తోంది.

ముగ్గురు బీసీ మహిళలు.. మూడు కీలక పదవులు?

బీసీ మహిళా నేతలకు మూడు కీలక అవకాశాలు కల్పించే అంశం పరిశీలనలో ఉన్నట్లు కాంగ్రెస్‌ వర్గాల్లో చర్చ జరుగుతోంది.

మంత్రివర్గంలో మార్పులు జరిగితే ఒక బీసీ మహిళకు అవకాశం కల్పించడంతో పాటు.. పార్టీ, ప్రభుత్వంలో మరో రెండు కీలక పదవులను బీసీ మహిళలకు కేటాయించే అంశాన్ని కూడా పరిశీలిస్తున్నట్లు సమాచారం.

అయితే ఎవరెవరికి ఏ పదవులు దక్కుతాయన్నది ఇంకా స్పష్టతకు రాలేదు. సామాజిక సమీకరణాలు, ప్రాంతీయ ప్రాతినిధ్యం, పార్టీకి చేసిన సేవలు, రాబోయే ఎన్నికల రాజకీయ లెక్కలను పరిగణనలోకి తీసుకుని పేర్లను పరిశీలిస్తున్నట్లు తెలుస్తోంది.

చిన్నారెడ్డి స్థానంలోనూ బీసీ మహిళ?

ఇక మరో ఆసక్తికరమైన అంశం ప్లానింగ్‌ కమిషన్‌ వైస్‌ ఛైర్మన్‌ పదవి.

ప్రస్తుతం ఉన్న పరిణామాల్లో మార్పులు చోటుచేసుకుంటే.. చిన్నారెడ్డి స్థానంలో బీసీ మహిళను నియమించే అవకాశంపైనా పార్టీ వర్గాల్లో చర్చ జరుగుతున్నట్లు సమాచారం. అంటే కేవలం మంత్రివర్గ పునర్వ్యవస్థీకరణకే పరిమితం కాకుండా.. నామినేటెడ్‌ పదవుల్లోనూ బీసీ సామాజిక వర్గానికి ప్రాధాన్యం ఇచ్చే దిశగా కాంగ్రెస్‌ వ్యూహం ఉండవచ్చన్న సంకేతాలు వెలువడుతున్నాయి.

అధిష్ఠానం ఆరా.. నేతల నుంచి సమాచారం

ఈ మొత్తం వ్యవహారంలో మరో కీలక పరిణామం.. రాష్ట్రంలోని సీనియర్‌ కాంగ్రెస్‌ నేతల అభిప్రాయాలను అధిష్ఠానం సేకరిస్తున్నట్లు జరుగుతున్న ప్రచారం.

ఎవరికి ప్రజల్లో ఆదరణ ఉంది? ఎవరు పార్టీకి ఉపయోగపడతారు? ఏ నియామకం ఏ ప్రాంతంలో రాజకీయ సమీకరణాలను ప్రభావితం చేస్తుంది? బీసీ మహిళలకు ప్రాధాన్యం ఇస్తే పార్టీకి వచ్చే రాజకీయ ప్రయోజనం ఏమిటి? వంటి అంశాలపై సమాచారాన్ని సేకరిస్తున్నట్లు తెలుస్తోంది.

సురేఖ ఎపిసోడ్‌.. విస్తృత వ్యూహంలో భాగమేనా?

అందుకే కొండా సురేఖ అంశాన్ని కేవలం ఒక మంత్రి భవిష్యత్తుకు సంబంధించిన వ్యవహారంగా చూడటం సరిపోదన్న అభిప్రాయం కాంగ్రెస్‌ వర్గాల్లో వినిపిస్తోంది.

ఒకవైపు సురేఖపై చర్య.. మరోవైపు బీసీ మహిళలకు కీలక పదవులు.. ఈ రెండింటినీ కలిపి చూస్తే సామాజిక సమీకరణాలను కొత్తగా మలచే ప్రయత్నం జరుగుతోందా అన్న ప్రశ్న తలెత్తుతోంది.

అయితే బర్తరఫ్‌ లేఖ, కొత్త నియామకాలు, పేర్ల ఖరారు వంటి అంశాలపై అధికారిక ప్రకటన వెలువడే వరకు ఇవన్నీ రాజకీయ వర్గాల్లో జరుగుతున్న చర్చలుగానే చూడాల్సి ఉంటుంది.

ఇక సీఎం రేవంత్‌రెడ్డి హైదరాబాద్‌కు చేరుకున్న తర్వాత ఏం జరుగుతుంది?
లోక్‌భవన్‌కు బర్తరఫ్‌ లేఖ వెళ్తుందా?
ముగ్గురు బీసీ మహిళలకు కీలక పదవులు దక్కుతాయా?
కొండా సురేఖ ఎపిసోడ్‌ కాంగ్రెస్‌లో కొత్త రాజకీయ సమీకరణాలకు తెరతీస్తుందా?

తెలంగాణ రాజకీయాల్లో ఇప్పుడు ఈ ప్రశ్నలే హాట్‌టాపిక్‌గా మారాయి.

గ్లోబల్ సమ్మిట్- రక్ష ఎక్స్‌పోలో భాగ‌స్వాములు కండి

* దేవ‌ర‌క‌ద్ర డీఆర్‌డీఎల్ ప్రాజెక్టుకు ఉచితంగా భూ కేటాయింపు

* ఇన్వెస్ట్ తెలంగాణ గ్లోబ‌ల్ స‌మ్మిట్‌-2026కు ఆహ్వానం

* ర‌క్ష‌ణ శాఖ మంత్రి రాజ్‌నాథ్ సింగ్‌తో ముఖ్య‌మంత్రి రేవంత్ రెడ్డి

దిక్సూచి ప్రతినిధి , న్యూ ఢిల్లీ: 

తెలంగాణ ప్రభుత్వం ప్రతిష్టాత్మకంగా నిర్వహించనున్న ఇన్వెస్ట్‌ తెలంగాణ గ్లోబల్‌ సమ్మిట్‌-2026కు హాజ‌రుకావాల‌ని రక్షణ శాఖ మంత్రి రాజ్‌నాథ్ సింగ్‌ను ముఖ్యమంత్రి ఎ. రేవంత్‌రెడ్డి ఆహ్వానించారు. ఢిల్లీలో ర‌క్ష‌ణ శాఖ మంత్రి రాజ్‌నాథ్ సింగ్‌తో ముఖ్య‌మంత్రి ఎ.రేవంత్ రెడ్డి బుధ‌వారం భేటీ అయ్యారు.

 భారత్‌ ఫ్యూచర్‌ సిటీలో డిసెంబర్ 7 నుంచి 9 వరకు స‌ద‌స్సు నిర్వ‌హించ‌నున్న‌ట్లు తెలిపారు. స‌దస్సులో భాగంగా నిర్వహించే రక్షణ ఎక్స్‌పో-2026ను ప్రారంభించాలని కేంద్ర మంత్రి రాజ్‌నాథ్ సింగ్‌ను సీఎం రేవంత్ రెడ్డి కోరారు.  ఈ సంద‌ర్భంగా ప‌లు అంశాల‌పై కేంద్ర మంత్రితో ముఖ్య‌మంత్రి చ‌ర్చించారు. రక్షణ ఎక్స్‌పో లో ఏరోస్పేస్‌, డిఫెన్స్‌, స్పేస్‌ రంగాలకు సంబంధించిన ప్రత్యేక సదస్సుతో పాటు ప్రతిష్టాత్మక ఎయిర్‌షో, పారిశ్రామిక ప్రదర్శన, భూ రక్షణ వ్యవస్థల ప్రత్యక్ష ప్రదర్శనలు నిర్వహించనున్నట్లు సీఎం తెలిపారు. దేశవ్యాప్తంగా రక్షణ రంగ పరిశ్రమలు, స్టార్టప్‌లు, యువ శాస్త్రవేత్తలు పాల్గొనే రక్షణ ఎక్స్‌పోకు ర‌క్ష‌ణ శాఖ మంత్రి హాజరై మార్గనిర్దేశం చేస్తే, వారికి ఎంతో స్ఫూర్తిదాయ‌కంగా ఉంటుంద‌ని తెలిపారు. హైదరాబాద్‌లో నిర్వహించే రక్షణ ఎక్స్‌పో-2026కు స్వాగతం పలికేందుకు త‌మ ప్రభుత్వం ఎదురుచూస్తోందని రాజ్‌నాథ్ సింగ్‌కు వివరించారు. 

రక్షణ ఎక్స్‌పో-2026ను అంతర్జాతీయ ప్రమాణాలతో విజయవంతంగా నిర్వహించేందుకు రక్షణ శాఖ సహ‌క‌రించాల‌ని కేంద్ర మంత్రికి విజ్ఞ‌ప్తి చేశారు. ఎయిర్‌షో నిర్వహణకు అవసరమైన గగనతల అనుమతులు ఇవ్వడంతో పాటు భారత వైమానిక దళానికి చెందిన విమానాలు, సూర్యకిరణ్‌, సారంగ్‌ ఏరోబాటిక్‌ బృందాలు ప్రదర్శనలో పాల్గొనేలా సహకరించాలని కోరారు. స్టాటిక్‌ ఎయిర్‌క్రాఫ్ట్‌ ప్రదర్శనకు కూడా సహక‌రించాల‌న్నారు. భూ, నౌకా, వైమానిక దళాలకు చెందిన అత్యాధునిక రక్షణ వ్యవస్థలను ప్ర‌ద‌ర్శ‌న‌లో ఏర్పాటు చేయాల‌ని, త్రివిధ దళాల ఉన్నతాధికారులు, ప్రతినిధులు భాగ‌స్వాములు కావాల‌ని సీఎం విజ్ఞ‌ప్తి చేశారు.

హెచ్‌ఏఎల్‌, బీఈఎల్‌, బీడీఎల్‌, ఎండీఎల్‌ తదితర రక్షణ ప్రభుత్వ రంగ సంస్థలు, డీఆర్‌డీవో ప్రయోగశాలలు రక్షణ ఎక్స్‌పోలో విస్తృతంగా పాల్గొని స్వదేశీ రక్షణ సాంకేతికతను ప్రదర్శించాల‌ని కేంద్ర మంత్రిని సీఎం కోరారు. విదేశీ రక్షణ శాఖ ప్రతినిధులు, ద్వైపాక్షిక రక్షణ ప్రతినిధి బృందాలు, అంతర్జాతీయ రక్షణ సంస్థల ప్రముఖులతో సమావేశాలు నిర్వహించేందుకు కేంద్ర రక్షణ శాఖ సహకరించాలని సీఎం విజ్ఞ‌ప్తి చేశారు. 

ఆదిలాబాద్ విమానాశ్ర‌యానికి సంబంధించి రాష్ట్ర ప్ర‌భుత్వం ఇప్ప‌టికే 750 ఎక‌రాలు భూ సేక‌ర‌ణ చేపట్టింద‌ని ర‌క్ష‌ణ శాఖ మంత్రి రాజ్‌నాథ్ సింగ్‌కు ముఖ్య‌మంత్రి ఎ.రేవంత్ రెడ్డి తెలియ‌జేశారు. ర‌క్ష‌ణ శాఖ కోరిన‌ట్లు మొత్తం 1500 ఎక‌రాలు కోరినందున‌, మ‌రో 750 ఎక‌రాలు సేక‌రించే ఇచ్చేందుకు ముఖ్య‌మంత్రి అంగీకారం తెలిపారు. 

మహబూబ్‌నగర్‌ జిల్లా దేవరకద్ర మండలంలో రక్షణ పరిశోధన, అభివృద్ధి ప్రయోగశాల (డీఆర్‌డీఎల్‌) ఆధ్వర్యంలో చేప‌ట్ట‌నున్న ప్రతిష్టాత్మక ప్రాజెక్టుకు 416.18 ఎకరాల భూమిని కేటాయించేందుకు ఇప్ప‌టికే టీజీఐఐసీ అంగీక‌రించింద‌ని రేవంత్ రెడ్డి తెలియ‌జేశారు. ఎకరానికి కాకుండా మొత్తం భూమికి సంవత్సరానికి కేవలం రూ.1 నామమాత్రపు లీజు అద్దెతో 33 సంవత్సరాల కాలానికి భూమిని కేటాయించనున్నట్లు తెలిపారు. అవ‌స‌ర‌మైతే దానిని మ‌రో రెండుసార్లు లీజు పొడిగించుకునే అవ‌కాశం ఉంద‌ని తెలిపారు. స‌మావేశంలో రాష్ట్ర శ‌క్తి శాఖ మంత్రి జి.వివేక్ వెంక‌ట‌స్వామి, ఎంపీలు ఎం.అనిల్ కుమార్ యాద‌వ్‌, డాక్ట‌ర్ మ‌ల్లు రవి, సురేశ్ షెట్కార్‌, పోరిక బ‌ల‌రాం నాయ‌క్‌, రాష్ట్ర ప్ర‌భుత్వ స‌ల‌హాదారు (ప్రొటోకాల్‌) హ‌ర్కార వేణుగోపాల్ పాల్గొన్నారు.

పేదల గుండెల్లో చెరగని ముద్ర.. వైఎస్ఆర్

 

నేడు మహానేత వైఎస్‌ రాజశేఖరరెడ్డి 17వ వర్ధంతి

దిక్సూచి, హైదరాబాద్‌:

తెలుగు రాష్ట్రాల రాజకీయ చరిత్రలో తనదైన ముద్ర వేసుకున్న మాజీ ముఖ్యమంత్రి డాక్టర్‌ వైఎస్‌ రాజశేఖరరెడ్డి (వైఎస్ఆర్‌) వర్ధంతి నేడు. 2009 సెప్టెంబర్‌ 2న ముఖ్యమంత్రిగా ఉన్న సమయంలో హెలికాప్టర్‌ ప్రమాదంలో ఆయన మృతి చెందారు. నల్లమల అటవీ ప్రాంతంలో జరిగిన ఈ ప్రమాదంలో వైఎస్ఆర్‌తో పాటు మరో నలుగురు ప్రాణాలు కోల్పోయారు.

ఆయన మరణించి 17 ఏళ్లు గడిచినా.. రాజకీయ నాయకుడిగా, ముఖ్యమంత్రిగా వైఎస్ఆర్‌ అందించిన పాలన, ప్రవేశపెట్టిన సంక్షేమ కార్యక్రమాలు, రైతులు–పేదల పట్ల ఆయన అనుసరించిన విధానం ఇప్పటికీ రాజకీయ చర్చల్లో కనిపిస్తూనే ఉన్నాయి.

పాదయాత్రతో ప్రజల్లోకి..

వైఎస్ఆర్‌ రాజకీయ ప్రస్థానంలో 2003లో చేపట్టిన సుదీర్ఘ పాదయాత్ర కీలక మలుపుగా నిలిచింది. మండుటెండల్లో వేల కిలోమీటర్లు నడుస్తూ గ్రామీణ ప్రాంతాల్లో ప్రజలను కలుసుకున్నారు. రైతులు, కూలీలు, మహిళలు, విద్యార్థులు, పేదల సమస్యలను నేరుగా తెలుసుకున్నారు.

ఆ పాదయాత్ర ద్వారా ప్రజల కష్టాలను దగ్గరగా చూసిన వైఎస్ఆర్‌.. అధికారంలోకి వచ్చిన తర్వాత తన పాలనలో సంక్షేమానికి పెద్దపీట వేశారు. రాజ్యసభ నివాళి సందర్భంగా కూడా ఆయన పాదయాత్ర, రైతులు–బలహీన వర్గాల కోసం పనిచేసిన నాయకత్వాన్ని ప్రత్యేకంగా ప్రస్తావించారు.

రైతే రాజు అన్న నినాదానికి ఆచరణ

2004లో ముఖ్యమంత్రిగా బాధ్యతలు చేపట్టిన వైఎస్ఆర్‌ తొలి రోజుల్లోనే రైతులకు ఉచిత విద్యుత్‌ అందించే నిర్ణయం తీసుకున్నారు. రైతుల బకాయిలను మాఫీ చేయడంతో పాటు సాగునీటి ప్రాజెక్టులకు ప్రాధాన్యం ఇచ్చారు.

రైతులకు నీరు అందించాలనే లక్ష్యంతో చేపట్టిన జలయజ్ఞం ఆయన ప్రభుత్వానికి ప్రధాన కార్యక్రమంగా నిలిచింది. ముఖ్యంగా వెనుకబడిన ప్రాంతాలకు సాగునీటిని అందించాలన్న లక్ష్యంతో భారీ నీటిపారుదల ప్రాజెక్టులను ముందుకు తీసుకెళ్లారు.

ఆరోగ్యం.. విద్యకు కొత్త దిశ

పేద కుటుంబాలకు ఖరీదైన వైద్యం భారంగా మారకూడదన్న ఉద్దేశంతో ఆరోగ్యశ్రీ పథకాన్ని తీసుకురావడం వైఎస్ఆర్‌ పాలనలో కీలక నిర్ణయంగా గుర్తింపు పొందింది.

అదే సమయంలో ఉన్నత విద్యను పేద విద్యార్థులకు అందుబాటులోకి తీసుకురావడానికి ఫీజు రీయింబర్స్‌మెంట్‌ వంటి కార్యక్రమాలు అమలు చేశారు.

ఈ రెండు కార్యక్రమాలు తరువాతి ప్రభుత్వాల పాలనలో కూడా కొనసాగడం.. వాటి సామాజిక ప్రభావాన్ని సూచిస్తుందని ప్రస్తుత తెలంగాణ ప్రభుత్వం కూడా పేర్కొంది.

సంక్షేమమే రాజకీయ బ్రాండ్‌గా..

వైఎస్ఆర్‌ పాలనలో సంక్షేమ పథకాలు రాజకీయానికి ప్రధాన అజెండాగా మారాయి. రైతులకు ఉచిత విద్యుత్‌, ఆరోగ్యశ్రీ, ఫీజు రీయింబర్స్‌మెంట్‌, పేదలకు గృహాలు, సాగునీటి ప్రాజెక్టులు వంటి అంశాలు ఆయన పాలనకు గుర్తింపుగా నిలిచాయి.

ప్రజలతో ఆయనకు ఉన్న వ్యక్తిగత అనుబంధం కూడా వైఎస్ఆర్‌ రాజకీయ శైలిలో మరో ప్రత్యేకత. సాధారణ ప్రజలను ఆప్యాయంగా పలకరించడం, వారి సమస్యలను వినడం ఆయనకు ప్రత్యేక గుర్తింపును తెచ్చింది.

రాజకీయ ప్రత్యర్థులు.. విమర్శలు కూడా

అయితే వైఎస్ఆర్‌ పాలన పూర్తిగా వివాదరహితం కాదు. ఆయన ప్రభుత్వ కాలంలో తీసుకున్న కొన్ని నిర్ణయాలు, భూకేటాయింపులు, ప్రాజెక్టులు, పారిశ్రామిక అనుమతులపై రాజకీయ విమర్శలు వచ్చాయి. ఆయన కుటుంబానికి సంబంధించిన ఆస్తుల వ్యవహారాలపై తరువాత దర్యాప్తులు, న్యాయపరమైన పరిణామాలు కూడా చోటుచేసుకున్నాయి.

అందువల్ల వైఎస్ఆర్‌ రాజకీయ వారసత్వాన్ని అంచనా వేయాలంటే కేవలం సంక్షేమ పథకాలను మాత్రమే కాకుండా.. ఆయన పాలనపై వచ్చిన విమర్శలు, ఆర్థిక విధానాలు, పరిపాలనా నిర్ణయాలు, రాజకీయ పరిణామాలను కూడా పరిగణనలోకి తీసుకోవాల్సి ఉంటుంది.

ఆకస్మిక మరణం.. రాజకీయ ప్రకంపనలు

2009 సెప్టెంబర్‌ 2న హైదరాబాద్‌ నుంచి చిత్తూరు జిల్లా పర్యటనకు బయలుదేరిన ప్రభుత్వ హెలికాప్టర్‌ నల్లమల ప్రాంతంలో అదృశ్యమైంది. ప్రతికూల వాతావరణ పరిస్థితుల మధ్య భారీ గాలులు, దట్టమైన అటవీ ప్రాంతం కారణంగా భారీ శోధన చేపట్టారు. సెప్టెంబర్‌ 3న హెలికాప్టర్‌ ప్రమాదానికి గురైనట్లు, అందులో ప్రయాణిస్తున్న వారంతా మృతి చెందినట్లు అధికారికంగా నిర్ధారించారు.

వైఎస్ఆర్‌ ఆకస్మిక మరణం అప్పటి ఆంధ్రప్రదేశ్‌ రాజకీయాలను తీవ్రంగా కుదిపేసింది. ఆయన మృతితో కాంగ్రెస్‌ పార్టీలో నాయకత్వ మార్పు చోటుచేసుకుంది. అనంతర కాలంలో వైఎస్ఆర్‌ రాజకీయ వారసత్వం చుట్టూ కొత్త రాజకీయ శక్తులు కూడా ఏర్పడ్డాయి.

తెలంగాణలోనూ ప్రత్యేక గుర్తింపు

ఉమ్మడి ఆంధ్రప్రదేశ్‌ ముఖ్యమంత్రిగా పనిచేసిన వైఎస్ఆర్‌కు తెలంగాణ ప్రాంతంలోనూ ప్రత్యేక రాజకీయ గుర్తింపు ఉంది. ముఖ్యంగా ఆరోగ్యశ్రీ, ఫీజు రీయింబర్స్‌మెంట్‌, ఉచిత విద్యుత్‌, రైతు సంక్షేమం వంటి పథకాల లబ్ధిదారుల్లో ఆయన పాలనపై ఇప్పటికీ సానుకూల అభిప్రాయం వ్యక్తమవుతుంటుంది.

ప్రస్తుత తెలంగాణ ప్రభుత్వం కూడా పలు సందర్భాల్లో వైఎస్ఆర్‌ ప్రారంభించిన సంక్షేమ కార్యక్రమాలను ప్రస్తావిస్తూ, ఆయన పాలనలోని కొన్ని విధానాలను కొనసాగిస్తున్నామని చెబుతోంది.

ఒక నాయకుడు.. అనేక జ్ఞాపకాలు

వైఎస్ఆర్‌ను అభిమానించే వారికి ఆయన “మహానేత”. రైతులకు ఉచిత విద్యుత్‌ ఇచ్చిన నాయకుడు. పేదలకు కార్పొరేట్‌ వైద్యం అందించిన ముఖ్యమంత్రి. విద్యార్థులకు ఉన్నత విద్యకు మార్గం చూపిన నేత.

అయితే ఆయన రాజకీయ జీవితాన్ని విమర్శనాత్మకంగా చూసేవారికి ఆయన పాలనలోని కొన్ని నిర్ణయాలు, వివాదాలు కూడా గుర్తుకొస్తాయి.

కానీ ఒక విషయం మాత్రం స్పష్టం..

వైఎస్‌ రాజశేఖరరెడ్డి పేరు తెలుగు రాష్ట్రాల రాజకీయ చరిత్రలో ఒక ప్రత్యేక అధ్యాయంగా నిలిచిపోయింది.

అధికారంలో ఉన్న సమయం ఎక్కువ కాకపోయినా.. ప్రజల జీవితాలను ప్రభావితం చేసిన కొన్ని సంక్షేమ విధానాలు, రైతు–పేదలతో ఆయన ఏర్పరచుకున్న అనుబంధం, ఆయన ఆకస్మిక మరణం కారణంగా వైఎస్ఆర్‌ రాజకీయ జ్ఞాపకం ఇప్పటికీ సజీవంగానే ఉంది.

వర్ధంతి సందర్భంగా వైఎస్ఆర్‌ను స్మరించుకోవడం అంటే.. ఒక వ్యక్తిని మాత్రమే గుర్తు చేసుకోవడం కాదు; సంక్షేమ రాజకీయాలు, రైతు సమస్యలు, పేదల ఆరోగ్యం, విద్య వంటి అంశాలపై తెలుగు రాష్ట్రాల్లో జరిగిన ఒక కీలక రాజకీయ ప్రయోగాన్ని మరోసారి చర్చించుకోవడం కూడా.

సర్వేనా..? తీర్పా..?

 

చాణక్య అంచనాలను ఎలా చూడాలి.. తెలంగాణ రాజకీయాలపై సర్వేల ప్రభావం ఎంత?

దిక్సూచి, హైదరాబాద్‌:

ఎన్నికలకు ఇంకా సమయం ఉన్నప్పుడే రాజకీయ సర్వేలు తెరపైకి వస్తున్నాయి. ఏ పార్టీకి ఎంత శాతం ఓటు మద్దతు ఉంది..? ఎవరి గ్రాఫ్‌ పెరుగుతోంది..? ఎవరి గ్రాఫ్‌ పడిపోతోంది..? ఏ వర్గం ఏ పార్టీ వైపు చూస్తోంది..? వంటి అంశాలపై సర్వే సంస్థలు అంచనాలు వెల్లడిస్తున్నాయి. తాజాగా చాణక్య స్ట్రాటజీస్‌ పేరుతో వెలువడిన తెలంగాణ సర్వే రాజకీయ వర్గాల్లో చర్చనీయాంశంగా మారింది.

తాజా సర్వేలో బీఆర్ఎస్‌కు 40.7 శాతం, కాంగ్రెస్‌కు 37.1 శాతం, బీజేపీకి 14.1 శాతం మద్దతు ఉన్నట్లు పేర్కొంది. 2023తో పోలిస్తే బీఆర్ఎస్‌ ఓటు శాతం పెరిగిందని, కాంగ్రెస్‌ కొంత తగ్గిందని సర్వే అంచనా వేసింది.

అయితే ఈ గణాంకాలను ఎన్నికల ఫలితంగా చూడాలా? అంటే సమాధానం.. కాదు.

సర్వే అంటే ఏమిటి?

సర్వే అనేది ఒక నిర్దిష్ట సమయంలో, ఎంపిక చేసిన ఓటర్ల అభిప్రాయాలను సేకరించి, మొత్తం ప్రజాభిప్రాయాన్ని అంచనా వేసే ప్రయత్నం. ఎన్నికల నాటికి ఓటర్ల ఆలోచనలు మారే అవకాశం ఉంటుంది. రాజకీయ పరిణామాలు, ప్రభుత్వ నిర్ణయాలు, స్థానిక సమస్యలు, అభ్యర్థుల ఎంపిక, పొత్తులు, ప్రచారం వంటి అనేక అంశాలు తుది ఫలితాన్ని ప్రభావితం చేస్తాయి.

అందువల్ల సర్వేను “ప్రస్తుత ప్రజాభిప్రాయానికి అద్దం”గా చూడాలి కానీ “ఎన్నికల తీర్పు”గా కాదు.

సంఖ్యల కంటే సర్వేలోని కారణాలు ముఖ్యం

ఒక పార్టీకి 40 శాతం, మరో పార్టీకి 37 శాతం మద్దతు ఉందని చెప్పడం ఆసక్తికరమే. కానీ అసలు ప్రశ్న..

ఆ 40 శాతం ఎందుకు?
ఆ 37 శాతం ఎందుకు?

అనేది.

ఓటర్లు ప్రభుత్వ పనితీరును ఎలా అంచనా వేస్తున్నారు? రైతులు ఏం ఆలోచిస్తున్నారు? యువతలో ఉద్యోగాలపై అభిప్రాయం ఏమిటి? మహిళలు ప్రభుత్వ పథకాలపై సంతృప్తిగా ఉన్నారా? పట్టణ, గ్రామీణ ప్రాంతాల్లో పరిస్థితి ఒకేలా ఉందా? ఇవే రాజకీయ పార్టీలకు ఉపయోగపడే అసలు సమాచారం.

రాజకీయ పార్టీలకు సర్వేలు ఎందుకు కీలకం?

సర్వేలు ప్రధానంగా రాజకీయ పార్టీలకు వ్యూహాత్మక సాధనాలు.

ఏ నియోజకవర్గంలో పార్టీ బలంగా ఉంది? ఎక్కడ బలహీనంగా ఉంది? ఏ నాయకుడికి ప్రజాదరణ ఉంది? ఎక్కడ వ్యతిరేకత ఉంది? ఏ సామాజిక వర్గం దూరమవుతోంది? ఏ సమస్యను ప్రచార అంశంగా తీసుకోవాలి? వంటి విషయాలను గుర్తించడానికి పార్టీలు సర్వేలను ఉపయోగించుకుంటాయి.

అంటే సర్వేలో పార్టీ వెనుకబడి ఉందని తేలితే.. అది ఆ పార్టీకి ఒక హెచ్చరిక కూడా కావచ్చు.

ప్రజలను ప్రభావితం చేసే ప్రచార సాధనంగా మారే అవకాశం

ఇక్కడే అసలు జాగ్రత్త అవసరం.

అనుకూల సర్వే వచ్చినప్పుడు ఒక పార్టీ దాన్ని విస్తృతంగా ప్రచారం చేసుకుంటుంది. ప్రతికూల సర్వే వచ్చినప్పుడు అదే పార్టీ దాన్ని నకిలీదిగా కొట్టిపారేయవచ్చు.

దీంతో సర్వే కేవలం ప్రజాభిప్రాయాన్ని కొలిచే సాధనం కాకుండా.. ప్రజాభిప్రాయాన్ని ప్రభావితం చేసే ప్రచార సాధనంగా కూడా మారే ప్రమాదం ఉంది.

అందుకే మీడియా సర్వేలను ప్రచురించేటప్పుడు సంస్థ పేరు, సర్వే నిర్వహించిన కాలం, నమూనా పరిమాణం, పద్ధతి, ప్రధాన ప్రశ్నలు, మార్జిన్‌ ఆఫ్‌ ఎర్రర్‌ వంటి వివరాలను అందుబాటులో ఉంటే స్పష్టంగా ఇవ్వాలి.

మంథనికి రాష్ట్ర సర్వేను వర్తింపజేయలేం

ఇదే విషయం నియోజకవర్గాల విషయంలో మరింత ముఖ్యమైనది.

తెలంగాణలో బీఆర్ఎస్‌ 40.7 శాతం అని ఒక రాష్ట్రస్థాయి సర్వే చెబితే.. మంథనిలో కూడా బీఆర్ఎస్‌కు 40.7 శాతం ఓట్లు వస్తాయని అర్థం కాదు.

మంథని రాజకీయాలు స్థానిక సమీకరణాలపై ఆధారపడి ఉంటాయి. అభ్యర్థి వ్యక్తిగత బలం, గత ఎన్నికల ఫలితాలు, గ్రామాల వారీగా ఉన్న రాజకీయ పరిస్థితి, స్థానిక సమస్యలు, ప్రభుత్వ పనితీరుపై అభిప్రాయం, ప్రత్యర్థి బలం, పార్టీ క్యాడర్‌ పరిస్థితి వంటి అంశాలు అక్కడి ఫలితాన్ని నిర్ణయిస్తాయి.

కాబట్టి రాష్ట్రస్థాయి సర్వే ఒక సూచిక మాత్రమే.. నియోజకవర్గ ఫలితానికి అది నేరుగా కొలమానం కాదు.

జర్నలిస్టు ఎలా చూడాలి?

సర్వేను చూసిన వెంటనే “ఎవరు గెలుస్తారు?” అని తేల్చేయడం కంటే..

సర్వే ఏమంటోంది?
ఎందుకు అలా అంటోంది?
గత ఎన్నికలతో పోలిస్తే మార్పు ఏమిటి?
గ్రౌండ్‌లో పరిస్థితి కూడా అదేనా?
ఇతర సర్వేలు ఏం చెబుతున్నాయి?

అనే ఐదు ప్రశ్నలు వేసుకోవాలి.

ఒక సర్వేను మరో సర్వేతో పోల్చాలి. ఆ తర్వాత గత ఎన్నికల ఓటింగ్‌ సరళిని పరిశీలించాలి. చివరగా క్షేత్రస్థాయిలో ప్రజల అభిప్రాయాన్ని తెలుసుకోవాలి.

సర్వే కంటే ఓటరు మనసే తుది తీర్పు

రాజకీయ సర్వేలు ఎంత అధునాతనంగా ఉన్నా.. ఎన్నికల రోజున ఓటరు వేసే ఓటును ముందుగానే ఖచ్చితంగా చెప్పలేవు.

ఈ రోజు ప్రభుత్వంపై సానుకూలంగా ఉన్న ఓటరు.. రేపు ఏదైనా నిర్ణయంతో అసంతృప్తి చెందవచ్చు. అదే విధంగా ప్రస్తుతం వెనుకబడిన పార్టీ ఎన్నికల నాటికి బలమైన ప్రచారంతో పరిస్థితిని మార్చుకోవచ్చు.

అందుకే రాజకీయ సర్వేలను గెలుపు–ఓటముల తుది తీర్పుగా కాకుండా.. రాజకీయ పార్టీలకు హెచ్చరికలు, మీడియాకు విశ్లేషణకు ఆధారం, ప్రజలకు ఒక సూచికగా చూడాలి.

సర్వే ఒక ఫొటో అయితే.. ఎన్నికల ఫలితం పూర్తి సినిమా.

అందులో ఆ ఫొటోకు విలువ ఉంది. కానీ మొత్తం కథను ఆ ఒక్క ఫొటోతోనే చెప్పలేం.

గణేష్‌ ఉత్సవాల బందోబస్తుపై సమీక్ష

 

లా అండ్‌ ఆర్డర్‌కు పటిష్ట చర్యలు చేపట్టాలి

 అదనపు సీపీ తఫ్సీర్‌ ఇక్బాల్‌

హైదరాబాద్, సెప్టెంబర్ 1: రాబోయే గణేష్‌ చతుర్థి, నవరాత్రి ఉత్సవాల సందర్భంగా ఎలాంటి అవాంఛనీయ ఘటనలు చోటుచేసుకోకుండా పటిష్టమైన బందోబస్తు, భద్రతా చర్యలు చేపట్టాలని అడిషనల్‌ కమిషనర్‌ ఆఫ్‌ పోలీస్‌ (లా అండ్‌ ఆర్డర్‌), జాయింట్‌ కమిషనర్‌ ఆఫ్‌ పోలీస్‌ (సౌత్‌ రేంజ్‌) తఫ్సీర్‌ ఇక్బాల్‌ ఐపీఎస్‌ అధికారులను ఆదేశించారు.

రాజేంద్రనగర్‌ డివిజన్‌ ఏసీపీ కార్యాలయాన్ని ఆయన తనిఖీ చేసి, రాబోయే గణేష్‌ ఉత్సవాల నేపథ్యంలో శాంతిభద్రతల పరిస్థితి, బందోబస్తు ఏర్పాట్లు, పెండింగ్‌ కేసుల దర్యాప్తుపై అధికారులతో సమీక్ష నిర్వహించారు.

పెండింగ్‌లో ఉన్న ఎస్సీ, ఎస్టీ కేసులపై ప్రత్యేక దృష్టి సారించి దర్యాప్తును వేగవంతం చేసి త్వరగా పరిష్కరించాలని ఆదేశించారు. పెండింగ్‌ ట్రయల్‌ (పీటీ) కేసులను త్వరితగతిన విచారణకు వచ్చేలా చర్యలు తీసుకోవాలని సూచించారు.

గణేష్‌ ఉత్సవాల బందోబస్తుతో పాటు సాధారణ విధులకు ఎలాంటి ఇబ్బంది కలగకుండా సిబ్బందిని సమర్థవంతంగా వినియోగించుకోవాలని, మాన్‌పవర్‌ మేనేజ్‌మెంట్‌పై ప్రత్యేక దృష్టి పెట్టాలని తెలిపారు.

గణేష్‌ నవరాత్రుల నేపథ్యంలో స్థానికంగా విజిలెన్స్‌, సెక్యూరిటీ కమిటీలను వెంటనే ఏర్పాటు చేయాలని ఆదేశించారు. జీహెచ్‌ఎంసీతో పాటు ఇతర పౌర విభాగాలతో సమన్వయం చేసుకుంటూ ఉత్సవాల నిర్వహణ, నిరంతర పర్యవేక్షణకు చర్యలు చేపట్టాలని సూచించారు.

అలాగే గణేష్‌ మండపాల నిర్వాహకులు, ఉత్సవ కమిటీ ప్రతినిధులతో సమావేశం ఏర్పాటు చేసి భద్రతా నిబంధనలు, మార్గదర్శకాలు, ట్రాఫిక్‌, శాంతిభద్రతల పరిరక్షణకు సంబంధించిన సూచనలు వివరించాలని అధికారులను ఆదేశించారు.

ఈ తనిఖీలో రాజేంద్రనగర్‌ జోన్‌ డీసీపీ ఎస్. శ్రీనివాస్‌ ఐపీఎస్, అదనపు డీసీపీ ఏఎస్‌ రావు, ఏసీపీ శ్రీనివాస్‌, అత్తాపూర్‌ పీఎస్‌ ఎస్‌హెచ్‌ఓ సీతయ్య, రాజేంద్రనగర్‌ పీఎస్‌ ఎస్‌హెచ్‌ఓ వెంకటేష్‌ తదితరులు పాల్గొన్నారు.

మైనారిటీ మహిళలను ఆర్థికంగా, సామాజికంగా బలోపేతం చేయడమే లక్ష్యం

 

ఇందిరమ్మ మైనారిటీ మహిళా యోజనతో స్వయం ఉపాధికి చేయూత 

 మంత్రి దుద్దిళ్ల శ్రీధర్‌బాబు

దిక్సూచి,  మేడ్చల్, సెప్టెంబర్ 1: మైనారిటీ మహిళలు ఆర్థికంగా, సామాజికంగా బలోపేతం కావడానికి రాష్ట్ర ప్రభుత్వం అమలు చేస్తున్న ఇందిరమ్మ మైనారిటీ మహిళా యోజన ఎంతో దోహదపడుతుందని రాష్ట్ర ఐటీ, ఎలక్ట్రానిక్స్ అండ్ కమ్యూనికేషన్, పరిశ్రమలు, వాణిజ్యం, శాసనసభ వ్యవహారాల శాఖ మంత్రి, జిల్లా ఇన్‌చార్జి మంత్రి దుద్దిళ్ల శ్రీధర్‌బాబు అన్నారు. మహిళలు స్వయం ఉపాధి పొందుతూ ఆర్థిక స్వావలంబన సాధించాలన్నదే ముఖ్యమంత్రి రేవంత్‌రెడ్డి ఆలోచన అని తెలిపారు.

మంగళవారం మేడ్చల్ జిల్లా కలెక్టరేట్ సమావేశ మందిరంలో నిర్వహించిన ఇందిరమ్మ మైనారిటీ మహిళా యోజన చెక్కుల పంపిణీ కార్యక్రమానికి ఎమ్మెల్సీ పట్నం మహేందర్‌రెడ్డి, ఎమ్మెల్యే అరికెపూడి గాంధీ, హజ్ కమిటీ సభ్యుడు మహమ్మద్ ముజుబుద్దీన్, మైనారిటీ ఫైనాన్స్ కార్పొరేషన్ చైర్మన్ ఒబేదుల్లా కొత్వాల్, జిల్లా కలెక్టర్ మను చౌదరి, అదనపు కలెక్టర్ ఫైజాన్ అహ్మద్‌తో కలిసి మంత్రి శ్రీధర్‌బాబు హాజరయ్యారు.

225 మంది మహిళలకు రూ.50 వేల చొప్పున సాయం

ఇందిరమ్మ మైనారిటీ మహిళా యోజన కింద మేడ్చల్ జిల్లాలో 225 మంది మైనారిటీ మహిళా లబ్ధిదారులకు ఒక్కొక్కరికి రూ.50 వేల చొప్పున ఆర్థిక సహాయం అందిస్తున్నట్లు మంత్రి తెలిపారు. లబ్ధిదారుల ఖాతాల్లో నేరుగా నగదు జమ చేయడం ద్వారా పథకంలో పారదర్శకతకు ప్రభుత్వం పెద్దపీట వేస్తోందన్నారు.

ఈ ఆర్థిక సహాయాన్ని మహిళలు స్వయం ఉపాధి, చిన్న వ్యాపార కార్యకలాపాలకు వినియోగించుకుని కుటుంబ ఆదాయాన్ని పెంచుకోవాలని సూచించారు. మహిళలకు అందించే ప్రతి రూపాయి కుటుంబ సంక్షేమానికి ఉపయోగపడుతుందని, అందుకే ప్రజా ప్రభుత్వం మహిళలకు అధిక ప్రాధాన్యం ఇస్తోందని మంత్రి పేర్కొన్నారు.

వృత్తి ఆధారిత ఉపాధికి ప్రోత్సాహం

మైనారిటీ వర్గాల్లో సంప్రదాయ వృత్తులపై ఆధారపడే వారికి కూడా ప్రభుత్వం ప్రత్యేకంగా ఆర్థిక చేయూత అందిస్తోందని శ్రీధర్‌బాబు తెలిపారు. తుర్క కాశీ ముస్లిం వర్గానికి చెందిన 57 మంది లబ్ధిదారులకు రూ.60 వేల విలువైన జనరేటర్లు, టూల్‌కిట్లను పంపిణీ చేశారు.

అలాగే ‘రేవంత్ అన్న సహారా–మిస్కీనో కే లియే’ పథకం ద్వారా మైనారిటీల జీవనోపాధికి అవసరమైన మోపెడ్లను అందిస్తున్నామని, స్వయం ఉపాధి కింద మహిళలకు కుట్టు మిషన్లు అందిస్తున్నామని తెలిపారు.

మైనారిటీల విద్య, ఉపాధి, సామాజిక అభివృద్ధి కోసం ప్రభుత్వం అనేక సంక్షేమ కార్యక్రమాలను అమలు చేస్తోందన్నారు. మత, సామాజిక, మౌలిక సదుపాయాల కోసం ఆర్థిక సహాయం అందించడంతో పాటు, విదేశాల్లో ఉన్నత విద్యను అభ్యసించాలనుకునే మైనారిటీ విద్యార్థులకు ముఖ్యమంత్రి ఓవర్సీస్ స్కాలర్‌షిప్ ద్వారా ఆర్థిక సహాయం అందిస్తున్నామని తెలిపారు.

ఆరు గ్యారంటీలను అమలు చేస్తున్నాం

ప్రజా ప్రభుత్వం 1,000 రోజుల పాలనను పూర్తి చేసుకున్న సందర్భంగా మహిళలకు ఆర్థిక చేయూత అందించడం గర్వంగా ఉందని మంత్రి శ్రీధర్‌బాబు అన్నారు. ప్రభుత్వం ప్రకటించిన ఆరు గ్యారంటీలను చిత్తశుద్ధితో అమలు చేస్తోందని తెలిపారు.

గృహజ్యోతి పథకం కింద అర్హులైన కుటుంబాలకు 200 యూనిట్ల వరకు ఉచిత విద్యుత్, మహాలక్ష్మి పథకం ద్వారా మహిళలకు ఉచిత బస్సు ప్రయాణ సౌకర్యం కల్పిస్తున్నామని వివరించారు. ఇందిరమ్మ ఇళ్ల పథకం ద్వారా పేదలకు సొంతింటి కలను నెరవేర్చేందుకు చర్యలు చేపడుతున్నామని, సీయూఆర్‌ఈ పరిధిలో ఇందిరమ్మ టవర్ల నిర్మాణం చేపడుతున్నట్లు తెలిపారు.

విద్య, రైతులు, యువతకు ప్రాధాన్యం

పేద విద్యార్థులకు అంతర్జాతీయ ప్రమాణాలతో కూడిన నాణ్యమైన విద్యను అందించేందుకు తెలంగాణ ప్రభుత్వం యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్ ఏర్పాటు చేస్తోందని మంత్రి తెలిపారు.

అర్హులైన ప్రతి కుటుంబానికి కొత్త స్మార్ట్ రేషన్ కార్డులు జారీ చేసి సన్నబియ్యం అందిస్తున్నామని చెప్పారు. రైతులు ఆర్థికంగా బలోపేతం కావడానికి వ్యవసాయ పనిముట్లు, రైతు భరోసా, రైతు బీమా వంటి పథకాలను అమలు చేస్తున్నామని పేర్కొన్నారు.

యువతకు ఉపాధి అవకాశాలు కల్పించేందుకు నైపుణ్యాభివృద్ధి కేంద్రాలను ఏర్పాటు చేస్తున్నామని, పరిశ్రమల అవసరాలకు అనుగుణంగా యువతకు శిక్షణ అందించి ఉద్యోగ అవకాశాలు కల్పించడమే ప్రభుత్వ లక్ష్యమని మంత్రి వివరించారు.

అనంతరం మంత్రి శ్రీధర్‌బాబు, ఎమ్మెల్సీ పట్నం మహేందర్‌రెడ్డి, ఎమ్మెల్యే అరికెపూడి గాంధీ తదితరులు లబ్ధిదారులకు చెక్కులు, జనరేటర్లు, టూల్‌కిట్లను అందజేశారు.

కార్యక్రమంలో గ్రంథాలయ చైర్మన్, వ్యవసాయ మార్కెట్ కమిటీ చైర్మన్, కమ్మ కార్పొరేషన్ చైర్మన్, ఆర్టీఏ సభ్యుడు, మున్సిపల్ చైర్‌పర్సన్లు, టీజీఎల్‌డీఏ చైర్మన్, జిల్లా మైనారిటీ సంక్షేమ అధికారి కాంతమ్మ, ప్రజాప్రతినిధులు, అధికారులు, లబ్ధిదారులు పాల్గొన్నారు.

గ్లోబల్‌ సమ్మిట్‌ పై విస్తృత అవగాహన కల్పించాలి

సెమీ కండక్టర్‌ తయారీలో పెట్టుబడులు పెట్టేలా జర్మనీ కంపెనీలను ప్రోత్సహించండి

తెలంగాణ–జర్మనీ లాజిస్టిక్‌ కారిడార్‌కు సహకరించండి

జర్మన్‌ ఇండియన్‌ బిజినెస్‌ అలయన్స్‌ ప్రతినిధులను కోరిన మంత్రి దుద్దిళ్ల శ్రీధర్‌బాబు 

దిక్సూచి, హైదరాబాద్‌:

రాష్ట్ర ప్రభుత్వం డిసెంబర్‌ 7, 8, 9 తేదీల్లో ప్రతిష్ఠాత్మకంగా నిర్వహించనున్న ‘తెలంగాణ రైజింగ్‌ గ్లోబల్‌ సమ్మిట్‌–2026’ గురించి జర్మనీ పారిశ్రామికవేత్తలు, పెట్టుబడిదారులకు విస్తృతంగా అవగాహన కల్పించాలని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు జర్మన్‌ ఇండియన్‌ బిజినెస్‌ అలయన్స్‌ (జీఐబీఏ) ప్రతినిధులను కోరారు.  తెలంగాణలో పెట్టుబడులకు ఉన్న అవకాశాలను ఈ సదస్సు ద్వారా ప్రపంచ పారిశ్రామికవేత్తలకు వివరించనున్నట్లు తెలిపారు.  తెలంగాణలో సెమీ కండక్టర్‌ తయారీ రంగంలో జర్మనీ కంపెనీలు పెట్టుబడులు పెట్టేలా ప్రోత్సహించాలని కోరుతూ, తెలంగాణను సెమీ కండక్టర్‌ తయారీకి ప్రధాన కేంద్రంగా తీర్చిదిద్దేందుకు ప్రభుత్వం ప్రణాళికాబద్ధంగా ముందుకు సాగుతోందని తెలిపారు. 

కెల్‌స్టర్‌బాక్‌ నగర మేయర్‌ మాన్‌ఫ్రెడ్‌ ఓకెల్‌ నేతృత్వంలోని జీఐబీఏ ప్రతినిధులు సోమవారం డా. బీఆర్‌ అంబేద్కర్‌ తెలంగాణ సచివాలయంలో మంత్రి శ్రీధర్‌బాబును మర్యాదపూర్వకంగా కలిశారు. ఈ సందర్భంగా తెలంగాణలో పెట్టుబడులకు ఉన్న అవకాశాలు, రాష్ట్ర ప్రభుత్వం కల్పిస్తున్న మౌలిక వసతులు, పరిశ్రమలకు అందిస్తున్న ప్రోత్సాహకాలను మంత్రి వారికి వివరించారు.

పలు రంగాల్లో పెట్టుబడులకు అవకాశాలు

సెమీ కండక్టర్స్‌తో పాటు లైఫ్‌ సైన్సెస్‌, ఏరోస్పేస్‌, డిఫెన్స్‌, ఎలక్ట్రానిక్స్‌, అధునాతన తయారీ, ప్రెసిషన్‌ ఇంజినీరింగ్‌, ఆటోమొబైల్‌, ఆటోమేషన్‌ వంటి రంగాల్లో తెలంగాణలో భారీ పెట్టుబడులకు అనుకూల పరిస్థితులు ఉన్నాయని శ్రీధర్‌బాబు తెలిపారు. ప్రపంచ స్థాయి పరిశ్రమలకు అవసరమైన నైపుణ్యం కలిగిన మానవ వనరులు, అభివృద్ధి చెందిన పారిశ్రామిక వ్యవస్థ, హైదరాబాద్‌ కేంద్రంగా ఉన్న సాంకేతిక నైపుణ్యం రాష్ట్రానికి బలమని పేర్కొన్నారు.

పరిశ్రమల ఏర్పాటుకు వేగవంతమైన అనుమతులు, మౌలిక వసతులు, పెట్టుబడి ప్రోత్సాహకాలు, నైపుణ్యాభివృద్ధి తదితర అంశాల్లో రాష్ట్ర ప్రభుత్వం పూర్తి సహకారం అందించేందుకు సిద్ధంగా ఉందన్నారు.

జర్మనీ సాంకేతికత–తెలంగాణ నైపుణ్యం అనుసంధానం

జర్మనీ కంపెనీల అధునాతన సాంకేతిక పరిజ్ఞానం, ప్రెసిషన్‌ ఇంజినీరింగ్‌, అడ్వాన్స్‌డ్‌ మ్యాన్యుఫ్యాక్చరింగ్‌ సామర్థ్యాలను తెలంగాణలోని నైపుణ్యవంతమైన మానవ వనరులు, పారిశ్రామిక వ్యవస్థతో అనుసంధానం చేయడానికి ప్రభుత్వం సిద్ధంగా ఉందని మంత్రి చెప్పారు. ఇరు ప్రాంతాల మధ్య సాంకేతిక, పారిశ్రామిక భాగస్వామ్యాన్ని మరింత బలోపేతం చేయాలని ఆకాంక్షించారు.

తెలంగాణ–జర్మనీ లాజిస్టిక్‌ కారిడార్‌

తెలంగాణలో తయారయ్యే ఉత్పత్తులు జర్మనీతో పాటు యూరప్‌ మార్కెట్లకు వేగంగా చేరుకునేలా ‘తెలంగాణ–జర్మనీ’ ప్రత్యేక లాజిస్టిక్‌ కారిడార్‌ ఏర్పాటుకు చొరవ చూపాలని జీఐబీఏ ప్రతినిధులను శ్రీధర్‌బాబు కోరారు. ఎగుమతుల రంగాన్ని మరింత బలోపేతం చేయడానికి మెరుగైన రవాణా, సరఫరా వ్యవస్థలు కీలకమని అన్నారు.

ఈ సమావేశంలో జీఐబీఏ ఛైర్మన్‌ సెల్వకుమార్‌ పెరియసామి, సీఈవో నిర్మల్‌ రామన్‌ కన్నయ్యన్‌, ఇన్నోవేషన్‌ హబ్‌ రైన్‌మెయిన్‌ సీఈవో స్టెఫాన్‌ విట్‌కిండ్ట్‌, ఎఫ్‌టీసీసీఐ ప్రతినిధులు కేకే మహేశ్వరి, శ్రీనివాస్‌ గరిమెళ్ల, వినోద్‌కుమార్‌ అగర్వాల్‌, లోకేష్‌ ఫతేపురియా తదితరులు పాల్గొన్నారు.

రైతు సంక్షేమమే కాంగ్రెస్ ప్రభుత్వ ధ్యేయం

 

మంత్రి దుద్దిళ్ల శ్రీధర్‌బాబు

దిక్సూచి, కొయ్యూరు:

రైతు సంక్షేమమే లక్ష్యంగా కాంగ్రెస్ ప్రభుత్వం పనిచేస్తోందని రాష్ట్ర ఐటీ, అసెంబ్లీ వ్యవహారాల శాఖ మంత్రి దుద్దిళ్ల శ్రీధర్‌బాబు అన్నారు. ఆదివారం కాటారం మండలం కొయ్యూరులో విద్యుత్ ట్రాన్స్‌ఫార్మర్ మరమ్మతు కేంద్రంతో పాటు నూతనంగా ఏర్పాటు చేసిన నయారా పెట్రోల్ బంక్‌ను మంత్రి ప్రారంభించారు.

ఈ సందర్భంగా మంత్రి మాట్లాడుతూ  గతంలో ఐదు మండలాలకు కాటారం కేంద్రంగా ఒకే ట్రాన్స్‌ఫార్మర్ మరమ్మతు కేంద్రం ఉండటంతో మరమ్మతుల్లో జాప్యం జరిగి రైతులు ఇబ్బందులు ఎదుర్కొంటున్నారని తెలిపారు. రైతులకు సత్వర సేవలు అందించాలనే ఉద్దేశంతో కొయ్యూరులో మరో మరమ్మతు కేంద్రాన్ని ఏర్పాటు చేసినట్లు చెప్పారు.

నాగులమ్మ నుంచి తాడిచెర్ల వరకు, తాడిచెర్ల నుంచి ఖమ్మంపల్లి బ్రిడ్జి వరకు రహదారి నిర్మాణానికి హైబ్రిడ్ యాన్యుటీ మోడల్  పథకం కింద నిధులు మంజూరయ్యాయని, త్వరలోనే పనులు ప్రారంభమవుతాయని తెలిపారు. మల్లారం ఎక్స్‌రోడ్‌ నుంచి పెద్దతూండ్ల వరకు, పెద్దతూండ్ల నుంచి చిన్నతూండ్ల మీదుగా మల్లారం వరకు రహదారి నిర్మాణానికి కూడా త్వరలో నిధులు మంజూరు చేయించేందుకు కృషి చేస్తానని పేర్కొన్నారు.

జెన్కో ఓపెన్‌కాస్ట్ డేంజర్ జోన్ నిర్వాసితుల సమస్యల పరిష్కారానికి చర్యలు తీసుకుంటున్నామని మంత్రి తెలిపారు. తాడిచెర్ల నుంచి భూపాలపల్లి పట్టణానికి రహదారి సౌకర్యం కల్పించడంపై గతంలో చేసిన కృషిని గుర్తుచేస్తూ.. ఈ ప్రాంత ప్రజల సంక్షేమం, అభివృద్ధే తన ప్రధాన లక్ష్యమని పునరుద్ఘాటించారు.

అనంతరం కొయ్యూరులో నూతనంగా ఏర్పాటు చేసిన నయారా పెట్రోల్ బంక్‌ను ప్రారంభించిన మంత్రి.. ప్రజలకు మెరుగైన సేవలు అందించాలని, నాణ్యమైన పెట్రోల్‌, డీజిల్‌ను సరఫరా చేయాలని సూచించారు. స్థానిక రైతులు, ప్రజలకు అందుబాటులో ఉండేలా పెట్రోల్ బంక్‌ను ఏర్పాటు చేసిన యజమాని సాయి కృష్ణను మంత్రి అభినందించారు.

 

నీట్-పీజీ పరీక్షా కేంద్రాలను సందర్శించిన పోలీస్ కమిషనర్

పెద్దపల్లిలో నీట్-పీజీ పరీక్షా కేంద్రాలను సందర్శించిన పోలీస్ కమిషనర్

దిక్సూచి, పెద్దపల్లి: 

పట్టణంలో ఆదివారం నిర్వహించిన నీట్-పీజీ 2026 పరీక్షల సందర్భంగా రామగుండం పోలీస్ కమిషనర్ అంబర్ కిషోర్ ఝా, పెద్దపల్లి డీసీపీతో కలిసి ట్రినిటీ ఇంజనీరింగ్ కళాశాలలో ఏర్పాటు చేసిన పరీక్షాకేంద్రాన్ని సందర్శించారు.

ఈ సందర్భంగా పరీక్షా కేంద్రం వద్ద ఏర్పాటు చేసిన పోలీసు బందోబస్తు, భద్రతా ఏర్పాట్లను సీపీ పరిశీలించారు. పరీక్షకు హాజరైన అభ్యర్థుల సంఖ్య, భద్రతా ఏర్పాట్ల గురించి సంబంధిత అధికారులను అడిగి తెలుసుకున్నారు. అలాగే,పరీక్షలు ముగిసిన అనంతరం ప్రశ్నపత్రాలు, ఇతర పరీక్షా సామగ్రిని సురక్షితంగా తరలించే విషయంలో తీసుకోవాల్సిన జాగ్రత్తలపై అధికారులకు పలు సూచనలు చేశారు.

ఈ సందర్భంగా సీపీ మాట్లాడుతూ పెద్దపల్లి జోన్ పరిధిలోని మూడు పరీక్షా కేంద్రాల్లో నీట్-పీజీ పరీక్ష నిర్వహిస్తున్నట్లు తెలిపారు. పెద్దపల్లి మండలం పెద్దకల్వలలోని మదర్ థెరిస్సా ఇంజనీరింగ్ కళాశాల, పెద్దపల్లిలోని బండారికుంట సమీపంలోని ట్రినిటీ ఇంజనీరింగ్ కళాశాల, రామగిరి మండలం సెంటినరీ కాలనీలోని జేఎన్‌టీయూ ఇంజనీరింగ్ కళాశాలలో పరీక్షలు నిర్వహిస్తున్నట్లు పేర్కొన్నారు.

పరీక్షలకు హాజరయ్యే అభ్యర్థులు ఎలాంటి ఇబ్బందులు లేకుండా పరీక్షా కేంద్రాలకు చేరుకునేలా ట్రాఫిక్ నిర్వహణతో పాటు పటిష్ఠమైన పోలీసు బందోబస్తు ఏర్పాటు చేసినట్లు తెలిపారు. పరీక్షలు ముగిసిన అనంతరం ప్రశ్నపత్రాలు,ఇతర పరీక్షా సామగ్రిని సురక్షితంగా గమ్యస్థానాలకు తరలించేందుకు అవసరమైన అన్ని ఏర్పాట్లు చేసినట్లు పేర్కొన్నారు.

ప్రస్తుతం అన్ని పరీక్షా కేంద్రాల్లో ప్రశాంత వాతావరణం నెలకొని ఉందని,అభ్యర్థులు ఎలాంటి ఆందోళన చెందకుండా ప్రశాంతంగా పరీక్షలు రాయాలని పోలీస్ కమిషనర్ కోరారు.

మంత్రి శ్రీధర్​బాబు ఆదివారం మంథని పర్యటన

దిక్సూచి, మంథని: 

రాష్ట్ర మంత్రి దుద్దిళ్ల శ్రీధర్‌బాబు ఆదివారం (ఆగస్టు 30) మలహర్‌రావు మండలంలో పర్యటించనున్నారు. మధ్యాహ్నం 12 గంటలకు కొయ్యూరులో ఏర్పాటు చేసిన నయారా నూతన పెట్రోల్ బంక్‌తో పాటు ఎస్‌పీఎం ట్రాన్స్‌ఫార్మర్ల మరమ్మతు కేంద్రాన్ని మంత్రి ప్రారంభించనున్నారు.

అనంతరం మలహర్‌రావు మండలంతో పాటు మంథని, కరీంనగర్ ప్రాంతాల్లో జరిగే పలు వివాహ శుభకార్యాల్లో మంత్రి పాల్గొననున్నారు.

మంత్రి శ్రీధర్‌బాబుతో మారిషస్ మంత్రి భేటీ

 

తెలంగాణ–మారిషస్ ద్వైపాక్షిక సంబంధాల బలోపేతంపై చర్చ

దిక్సూచి, హైదరాబాద్: 

మారిషస్ పబ్లిక్ సర్వీస్, అడ్మినిస్ట్రేటివ్ రిఫార్మ్స్ శాఖ మంత్రి లుచ్‌మనన్ పెంతియా శనివారం డా. బీఆర్ అంబేద్కర్ తెలంగాణ సచివాలయంలో రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబును మర్యాదపూర్వకంగా కలిశారు.

ఈ సందర్భంగా పరిపాలన, పర్యాటకం, ఐటీ/ఐటీఈఎస్, ఎమర్జింగ్ టెక్నాలజీస్, నైపుణ్యాభివృద్ధి, విద్య తదితర రంగాల్లో తెలంగాణ–మారిషస్ మధ్య ద్వైపాక్షిక సహకారాన్ని మరింత బలోపేతం చేసే అవకాశాలపై చర్చించారు. 

తెలంగాణను తమ దేశం అత్యంత నమ్మకమైన భాగస్వామిగా భావిస్తోందని మారిషస్ మంత్రి లుచ్‌మనన్ పెంతియా తెలిపారు. మారిషస్ ప్రభుత్వ ఉద్యోగుల సామర్థ్యాన్ని పెంచేందుకు, ఆధునిక పరిపాలనా విధానాలపై శిక్షణ అందించేందుకు సహకరించాలని శ్రీధర్‌బాబును కోరారు. రాష్ట్రంలోని ఎంసీహెచ్‌ఆర్డీ, యంగ్ ఇండియా స్కిల్స్ యూనివర్సిటీతో పాటు ప్రముఖ విద్యా సంస్థలతో కలిసి పనిచేయడానికి తమ ప్రభుత్వం ఆసక్తిగా ఉందన్నారు.

అన్ని రంగాల్లో మారిషస్‌కు సహాయ సహకారాలు అందించేందుకు తెలంగాణ ప్రభుత్వం సిద్ధంగా ఉందని శ్రీధర్‌బాబు తెలిపారు. అంతర్జాతీయ భాగస్వామ్యాలకు ప్రభుత్వం అత్యంత ప్రాధాన్యత ఇస్తోందన్నారు.

డిసెంబర్ 7, 8 తేదీల్లో నిర్వహించనున్న ‘తెలంగాణ రైజింగ్ గ్లోబల్ సమ్మిట్–2026’లో పాల్గొనాలని మారిషస్ మంత్రిని శ్రీధర్‌బాబు ఆహ్వానించారు.

ఈ సమావేశంలో మారిషస్ అధికారులు, తెలంగాణ పరిశ్రమలు, ఐటీ శాఖల ఉన్నతాధికారులు పాల్గొన్నారు.

‘చమ్కీల అంగీలేసి’ నుంచి ‘ఏష నాగుల కట్టమీద’ వరకు..

 

click below for song

https://youtu.be/JqFzhcWo3EU?si=ckrjeFPtoj8lu4yk

తెలంగాణను ఊపేయడానికి సిద్ధమైన ఓదెల-నాని కాంబో!

(నవీన్​)

దిక్సూచి, హైదరాబాద్‌:

‘చమ్కీల అంగీలేసి..’ ఒకప్పుడు ఉత్తర తెలంగాణను ఊపేసిన జానపద గీతం. ఇప్పుడు అదే తెలంగాణ ఫోక్‌ ఫ్లేవర్‌ను మరోసారి వెండితెరపైకి తీసుకొస్తున్నారు దర్శకుడు శ్రీకాంత్‌ ఓదెల, హీరో నాని. వీరి కాంబినేషన్‌లో తెరకెక్కుతున్న ‘ది ప్యారడైజ్‌’ నుంచి తాజాగా ‘ఏష నాగుల కట్టమీద’ పాట విడుదలై సోషల్‌ మీడియాలో సందడి చేస్తోంది.

సింగరేణి బొగ్గుగనుల ప్రాంతమైన గోదావరిఖనిలో పుట్టి పెరిగిన శ్రీకాంత్‌ ఓదెల.. తన తొలి చిత్రం **‘దసరా’**తోనే నాని కెరీర్‌లో భారీ విజయాన్ని అందించడమే కాకుండా, తనదైన రా అండ్‌ రస్టిక్‌ మేకింగ్‌తో ప్రత్యేక గుర్తింపు తెచ్చుకున్నారు. ఇప్పుడు అదే కాంబినేషన్‌లో ‘ది ప్యారడైజ్‌’ రూపొందుతోంది.

ఈ సినిమాకు అనిరుధ్‌ రవిచందర్‌ సంగీతం అందిస్తున్నారు. ఇప్పటికే ‘ఆయా షేర్‌’ పాట భారీ స్పందన అందుకోగా.. తాజాగా రెండో సింగిల్‌ **‘ఏష నాగుల కట్టమీద’**కు కూడా మంచి క్రేజ్‌ వచ్చింది.

అమెరికాలోని డల్లాస్‌లో జరిగిన అనిరుధ్‌ లైవ్‌ కాన్సర్ట్‌లో ఈ పాటను విడుదల చేయడం ప్రత్యేక ఆకర్షణగా నిలిచింది. అనిరుధ్‌ పాట పాడుతుండగా నాని అనూహ్యంగా స్టేజ్‌పైకి వచ్చి మాస్‌ స్టెప్పులతో అభిమానులను అలరించారు. ఈ వీడియోలు సోషల్‌ మీడియాలో వైరల్‌గా మారాయి.

తెలంగాణ జానపద నేటివిటీకి అనిరుధ్‌ మాస్‌ బీట్‌ తోడవడంతో ‘ఏష నాగుల కట్టమీద’ పాటకు ప్రత్యేకమైన ఊపు వచ్చింది. ఈ పాటలో కీర్తి సురేష్‌ ప్రత్యేకంగా కనిపించనున్నట్లు చిత్రబృందం వెల్లడించింది.

ఇప్పటికే ‘ఆయా షేర్‌’, ఇప్పుడు ‘ఏష నాగుల కట్టమీద’.. వరుసగా రెండు పాటలు అంచనాలు పెంచడంతో ‘ది ప్యారడైజ్‌’పై ఆసక్తి మరింత పెరిగింది. సెప్టెంబర్‌ 24న సినిమా థియేటర్లలోకి రానుంది.

సినిమా ఎలా ఉండబోతుందో తెలియాలంటే మరికొంత సమయం వేచి చూడాల్సిందే. కానీ తెలంగాణ జానపద బాణీ, అనిరుధ్‌ మాస్‌ బీట్‌, నాని ఎనర్జీ కలిసిన ‘ఏష నాగుల కట్టమీద’ మాత్రం వినాయక నిమజ్జనంలో  ఊపేయడం ఖాయమనే అంచనాలు ఇప్పటికే మొదలయ్యాయి.

అమెరికాలో మళ్లీ విజృంభిస్తున్న కోవిడ్‌-19

దిక్సూచి, వాషింగ్టన్​ డీసీ: 

అమెరికాలో కోవిడ్‌ కేసులు మళ్లీ పెరుగుతున్నాయి. తాజా CDC అంచనాల ప్రకారం ఆగస్టు 26 నాటికి 48 రాష్ట్రాల్లో కోవిడ్‌ ఇన్ఫెక్షన్లు పెరుగుతున్న లేదా పెరిగే అవకాశం ఉన్న పరిస్థితి కనిపిస్తోంది. ఏ రాష్ట్రంలోనూ ఇన్ఫెక్షన్లు తగ్గుతున్నట్లు అంచనా లేదు.  ఆగస్టు 21 నాటి CDC అంచనాల్లో 47 రాష్ట్రాల్లో పెరుగుదల నమోదవగా, తాజా అంచనాల్లో ఈ సంఖ్య 48 రాష్ట్రాలకు చేరింది.   వైరస్‌ వ్యాప్తి నేపథ్యంలో కొన్ని పాఠశాలలు కూడా తాత్కాలికంగా మూతపడ్డాయి. టెక్సాస్‌లోని San Perlita Independent School District ఆగస్టు 25–26 తేదీల్లో క్యాంపస్‌లను మూసివేసింది. లూసియానాలోని మరో పాఠశాల కూడా ఒక రోజు కార్యకలాపాలను నిలిపివేసింది. అయితే CDC ప్రకారం మొత్తం కోవిడ్‌ స్థాయి ప్రస్తుతం చాలా తక్కువగానే ఉంది.  

నేర నియంత్రణకు డేటా ఆధారిత పోలీసింగ్‌

 
యూనిట్‌ వారీగా ప్రత్యేక కార్యాచరణ చేపట్టాలి

డీజీపీ సీవీ ఆనంద్‌

దిక్సూచి, హైదరాబాద్‌, ఆగస్టు 28: 

తెలంగాణలో నేర నియంత్రణను మరింత సమర్థవంతంగా చేపట్టేందుకు డేటా ఆధారిత, యూనిట్‌-నిర్దిష్ట పోలీసింగ్‌ విధానాన్ని అవలంబించాలని డీజీపీ సీవీ ఆనంద్‌ పోలీసు అధికారులను ఆదేశించారు. నేర సమీక్షలు కేవలం గణాంకాలకే పరిమితం కాకుండా.. నేరాల కారణాలు, నిందితుల విధానం, దర్యాప్తు నాణ్యత, కేసుల పరిష్కారం తదితర అంశాలపై లోతైన విశ్లేషణ జరగాలని సూచించారు.

డీజీపీ కార్యాలయంలో శుక్రవారం అన్ని యూనిట్ల ఉన్నతాధికారులతో నిర్వహించిన అర్ధవార్షిక నేర సమీక్ష సమావేశంలో ఆయన మాట్లాడారు. సీసీటీఎన్‌ఎస్‌ డేటా నవీకరణలో పోలీసు సిబ్బంది పనితీరును డీజీపీ అభినందించారు. గతంలో 70–80 శాతంగా ఉన్న డేటా అప్‌డేట్‌ ఇప్పుడు 96 శాతానికి చేరిందని తెలిపారు.

నెలవారీ నేర సమీక్ష సమావేశాలకు అత్యధిక ప్రాధాన్యం ఇవ్వాలని, క్షేత్రస్థాయిలో ప్రాథమిక పోలీసింగ్‌ విధానాలను కచ్చితంగా పాటించాలని ఆదేశించారు. జిల్లా పర్యటనలు, పోలీస్‌స్టేషన్ల తనిఖీల్లో గుర్తించిన సమస్యలపై తక్షణ చర్యలు తీసుకోవాలని సూచించారు. భవిష్యత్తులో నేరాల ధోరణులను ముందుగానే గుర్తించి ప్రత్యేక కార్యాచరణ రూపొందించాలని చెప్పారు.

నేరాల్లో 7.15 శాతం పెరుగుదల

తెలంగాణలో 2023-24తో పోలిస్తే 2025-26లో మొత్తం నేరాలు 2,65,377 నుంచి 2,84,363కు పెరిగాయి. మొత్తంగా 7.15 శాతం వృద్ధి నమోదైంది. అయితే తీవ్రమైన నేరాలు 2024-25లోని 7,019 కేసుల నుంచి 2025-26లో 6,294కు తగ్గి 10.33 శాతం క్షీణించాయి.

మరోవైపు మాదకద్రవ్యాల కేసులు 46.10 శాతం, ట్రాఫిక్‌ నేరాలు 9.48 శాతం పెరిగాయి. అత్యంత ఆందోళన కలిగించే విధంగా వ్యవస్థీకృత నేరాల కేసులు 25 నుంచి 451కు పెరిగి 1,704 శాతం వృద్ధి నమోదైంది.

సైబర్‌, ఆర్థిక నేరాల్లో తగ్గుదల

సైబర్‌ నేరాలు 25,373 నుంచి 22,000కు తగ్గి 13.29 శాతం, ఆర్థిక నేరాలు 37,690 నుంచి 32,684కు తగ్గి 13.28 శాతం క్షీణించాయి. మహిళలు, చిన్నారులపై నేరాలు కూడా గత ఏడాదితో పోలిస్తే స్వల్పంగా తగ్గాయి.

మాదకద్రవ్యాలపై ప్రత్యేక నిఘా

మాదకద్రవ్యాల నియంత్రణపై ప్రత్యేక దృష్టి పెట్టాలని డీజీపీ ఆదేశించారు. రాష్ట్రవ్యాప్తంగా కేసులు 2,026 నుంచి 2,960కు పెరిగాయి. సైబరాబాద్‌లో 266 నుంచి 508కు, ఆదిలాబాద్‌లో 57 నుంచి 219కు కేసులు పెరగడం ఆందోళనకరంగా ఉందని సమీక్షలో గుర్తించారు.

ట్రాఫిక్‌ నేరాలు కూడా 29,130 నుంచి 31,891కు పెరిగాయి. ముఖ్యంగా కొమురం భీం ఆసిఫాబాద్‌లో 154 నుంచి 1,115 కేసులకు భారీగా పెరిగాయి.

AI ఆధారిత పోలీసింగ్‌, సీసీటీఎన్‌ఎస్‌, TG-COP, హాక్‌ఐ, కొత్త క్రిమినల్‌ చట్టాలు, ICJS, సైబర్‌ క్రైమ్‌, ఈగిల్‌, ఫోరెన్సిక్‌ సైన్స్‌ ల్యాబ్‌ పనితీరుపై సమావేశంలో సమీక్షించారు. యువ ఐపీఎస్‌ అధికారులు సాంకేతికత ఆధారిత కొత్త పోలీసింగ్‌ విధానాలను వివరించారు.

నేరాల స్వభావానికి అనుగుణంగా ప్రతి యూనిట్‌ తన ప్రాధాన్యతలను నిరంతరం మార్చుకోవాలని, క్షేత్రస్థాయితో నిరంతర సంబంధం కొనసాగించాలని డీజీపీ సీవీ ఆనంద్‌ సూచించారు. ప్రాథమిక పోలీసింగ్‌, డేటా విశ్లేషణ, సాంకేతిక పరిజ్ఞానం, నిరంతర పర్యవేక్షణతోనే సమర్థవంతమైన నేర నియంత్రణ సాధ్యమవుతుందని స్పష్టం చేశారు.