భవిష్యత్తు వైపు సాగిన అడుగులు

వేసవి సెలవులు ముగుస్తున్న సమయం. రవికి తన పదో తరగతి ఫలితాల కంటే, రేపు చేరబోయే కాలేజీ గురించిన ఆలోచనలే ఎక్కువగా ఉన్నాయి. పల్లెటూరులో చిన్న స్కూల్లో చదివిన అతనికి, ఇంటర్మీడియట్ తర్వాత మంచి కెరీర్ వైపు అడుగు వేయాలనే తపన బలంగా ఉంది.

​ఆ రోజు సాయంత్రం, రవి తన స్నేహితులతో కలిసి కరీంనగర్‌లోని మెయిన్ రోడ్డు మీదుగా నడుస్తుండగా, ఒక పెద్ద పోస్టర్ అతని దృష్టిని ఆకర్షించింది. అదే వాగ్దేవి డిగ్రీ & పీజీ కాలేజ్ అడ్మిషన్ ప్రకటన. ఆ పోస్టర్ మీద స్పష్టంగా 'అడ్మిషన్లు ప్రారంభం (2026-27)' అని రాసి ఉంది.

​పోస్టర్‌పై నవ్వుతూ నడుస్తున్న విద్యార్థులను చూసినప్పుడు, రవిలో కూడా తెలియని ఉత్సాహం కలిగింది. "చూడు రవి, అక్కడ అన్ని రకాల కోర్సులు ఉన్నాయట" అన్నాడు అతని స్నేహితుడు అశోక్. రవి ఆసక్తిగా పోస్టర్‌ను పరిశీలించాడు. B.Scలో 'డేటా సైన్స్', 'ఫుడ్ సైన్స్', అలాగే 'కంప్యూటర్ సైన్స్'తో కూడిన MPCs కోర్సులు అందుబాటులో ఉన్నాయి. 'B.Com (కంప్యూటర్ అప్లికేషన్స్)' కూడా ఉంది.

​కంప్యూటర్స్ పట్ల ఇష్టం ఉన్న రవికి 'డేటా సైన్స్' లేదా 'B.Com కంప్యూటర్స్'లో చేరాలనే కోరిక పెరిగింది. "కేవలం కోర్సులే కాదురా, ఇక్కడ మంచి అనుభవజ్ఞులైన ఫ్యాకల్టీ, క్యారియర్ గైడెన్స్ కూడా ఇస్తారని రాసి ఉంది. అలాగే, ప్లేస్‌మెంట్స్ సపోర్ట్ కూడా ఉందట!" అని రవి తన సందేహాలను పటాపంచలు చేసుకుంటూ చెప్పాడు. పోస్టర్‌పై ఉన్న "డ్రీమ్. లెర్న్. అచీవ్. (కలలు కను. నేర్చుకో. సాధించు.)" అనే స్లోగాన్ అతనికి చాలా స్పూర్తినిచ్చింది.

​పోస్టర్ కింద ఉన్న ఫోన్ నంబర్లు (93911151711, 7993438017) మరియు అడ్రస్ (ముకరంపురా, కరీంనగర్) నోట్ చేసుకుని, రవి వెంటనే తన తండ్రికి ఫోన్ చేశాడు. "నాన్నా, నేను రేపు వాగ్దేవి కాలేజీకి వెళ్ళి అడ్మిషన్ గురించి తెలుసుకుంటాను. అక్కడ నాకు నచ్చిన డేటా సైన్స్ కోర్సు ఉంది, మంచి ప్లేస్‌మెంట్స్ కూడా వస్తాయట," అని ఉత్సాహంగా చెప్పాడు.

​మరుసటి రోజు ఉదయం, తన కెరీర్ కలలను సాకారం చేసుకునే దిశగా, వాగ్దేవి కాలేజీ మెట్లు ఎక్కడానికి రవి సిద్ధమయ్యాడు. అతని భవిష్యత్తు కోసం మొదటి అడుగు ఇక్కడే పడిందని అతను బలంగా నమ్మాడు. కాలేజీ భవనం పైభాగంలో 'వాగ్దేవి డిగ్రీ & పీజీ కాలేజ్' అని రాసి ఉన్న బోర్డు, అతనికి స్వాగతం పలుకుతున్నట్లు అనిపించింది.

నేడే కళాశాలకు వెళ్లి వివరాలు తీసుకోండి.. మీ అబ్బాయి బంగారు భవిష్యత్ కు బాటలు వేయండి

టీజీ20 లీగ్ ఫ్రాంచైజీని దక్కించుకున్న మంథని ముద్దుబిడ్డ

వ్యాపార దిగ్గజం ముస్కుల శ్రావణ్ రెడ్డి సంచలనం..  మంథని ప్రాంత కీర్తిని మారుమోగించిన వైనం

(ప్రత్యేక ప్రతినిధి, మంథని న్యూస్ డెస్క్)

​ఐపీఎల్ (IPL) తరహాలోనే తెలంగాణ క్రికెట్‌లో సరికొత్త అధ్యాయానికి తెరలేపుతూ హైదరాబాద్ క్రికెట్ అసోసియేషన్ (HCA) ప్రతిష్టాత్మకంగా ప్రవేశపెట్టిన టోర్నమెంట్ "TG20 లీగ్". రాబోయే జూన్ 20 నుండి ప్రారంభం కానున్న ఈ మెగా లీగ్‌కు సంబంధించిన ఫ్రాంచైజీల ఎంపిక ప్రక్రియ అత్యంత ఉత్కంఠభరితంగా సాగింది. రాష్ట్రవ్యాప్తంగా ఎందరో కార్పొరేట్ దిగ్గజాలు, పారిశ్రామికవేత్తలు ఈ బిడ్డింగ్‌లో పోటీ పడగా.. మంథని గడ్డపై పుట్టిన వ్యాపార వేత్త, MNR (Levonor) సమూహాల అధినేత ముస్కుల శ్రావణ్ రెడ్డి అద్భుతమైన వ్యూహంతో ఒక లీగ్ ఫ్రాంచైజీని దక్కించుకుని క్రీడా ప్రపంచంలో హాట్ టాపిక్‌గా మారారు.

​మంథని నుంచి మెట్రో సిటీ వరకు.. 

​ముస్కుల శ్రావణ్ రెడ్డి మంథని నియోజకవర్గానికి చెందిన దివంగత నాయకుడు బ్లాక్ కాంగ్రెస్ అధ్యకుడు ముస్కుల నారాయణ రెడ్డి కుమారుడు. సాధారణ కుటుంబం నుండి వచ్చి, తన స్వయంకృషితో, అకుంఠిత దీక్షతో వ్యాపార రంగంలో శిఖరాగ్రానికి చేరారు. రియల్ ఎస్టేట్, ఇన్‌ఫ్రాస్ట్రక్చర్, టెక్నాలజీ రంగాformatలలో MNR గ్రూప్, లెవనోర్ (Levonor) సంస్థల ద్వారా వేగంగా ఎదుగుతూ సత్తా చాటారు. వ్యాపార రంగంలో ఎంతోమందికి ఉపాధి కల్పిస్తూ ఆదర్శంగా నిలిచిన ఆయన, ఇప్పుడు క్రీడా రంగంలోకి అడుగుపెట్టి తన సొంత ప్రాంత యువతకు సరికొత్త ఆశలు చిగురించేలా చేశారు.

​గ్రామీణ ప్రతిభకు దక్కనున్న అసలైన వేదిక

​TG20 లీగ్ నిబంధనల ప్రకారం ప్రతీ ఫ్రాంచైజీ జట్టులో కచ్చితంగా ఆయా జిల్లాలకు చెందిన ఇద్దరు స్థానిక గ్రామీణ ఆటగాళ్లకు అవకాశం కల్పించాల్సి ఉంటుంది. ముస్కుల శ్రావణ్ రెడ్డి గారు ఈ ఫ్రాంచైజీని దక్కించుకోవడం వల్ల మంథని, కరీంనగర్, పెద్దపల్లి పరిసర ప్రాంతాల్లోని ఎంతోమంది పేద, మధ్యతరగతి ప్రతిభావంతులైన యువ క్రికెటర్లకు నేరుగా ఉప్పల్ అంతర్జాతీయ స్టేడియంలో తమ ప్రతిభను నిరూపించుకునే సువర్ణావకాశం లభించనుంది.

​"మన ప్రాంతంలో క్రికెట్ ఆడే ఎంతోమంది ప్రతిభావంతులైన యువకులు ఉన్నారు. కానీ సరైన వేదిక, ప్రోత్సాహం లేక వారు వెనుకబడిపోతున్నారు. ఈ TG20 లీగ్ ద్వారా గ్రామీణ యువతను ప్రోత్సహించి, వారిని జాతీయ స్థాయికి చేర్చడమే నా ప్రధాన లక్ష్యం."

— ముస్కుల శ్రావణ్ రెడ్డి, అధినేత, MNR గ్రూప్

​మంథనిలో వెల్లువెరుస్తున్న ఆనందోత్సాహాలు

​సాంస్కృతిక, రాజకీయ చైతన్యానికి నిలయమైన మంథని ప్రాంత పేరును ఇప్పుడు క్రీడా రంగంలో కూడా మారుమోగేలా చేసిన శ్రావణ్ రెడ్డి గారిపై స్థానిక ప్రజలు, క్రీడాభిమానులు, యువత ప్రశంసల వర్షం కురిపిస్తున్నారు. జూన్ 7న జరగబోయే ఆటగాళ్ల వేలంలో ఈ ఫ్రాంచైజీ ఎలాంటి బలమైన జట్టును ఎంపిక చేసుకోబోతుందోనని అందరూ ఆసక్తిగా ఎదురుచూస్తున్నారు.

​రాష్ట్రస్థాయి మెగా లీగ్‌లో భాగస్వామి అయి, మంథని కీర్తి కిరీటంలో మరో విలక్షణమైన నెమలి పించాన్ని అద్దిన ముస్కుల శ్రావణ్ రెడ్డి గారి క్రీడా ప్రస్థానం విజయవంతంగా సాగాలని, ఆయన జట్టు రాబోయే లీగ్‌లో ఘనవిజయం సాధించాలని మనస్ఫూర్తిగా ఆకాంక్షిద్దాం!

డాలర్ కల చెదిరిపోతోంది...

 సరికొత్త గ్రీన్‌కార్డ్ రూల్‌తో కంపెనీల్లో వణుకు, ఐటీ నిపుణులలో ఆందోళన!

(నవీన్, ప్రత్యేక ప్రతినిధి)

​దశాబ్దాలుగా ప్రపంచవ్యాప్త ఐటీ నిపుణులకు, ముఖ్యంగా భారతీయులకు ‘అమెరికా’ ఒక కలల సౌధం. కానీ, ప్రస్తుత పరిస్థితులు చూస్తుంటే ఆ సౌధం పునాదులు కదులుతున్నట్లు కనిపిస్తోంది. ట్రంప్ ప్రభుత్వం ఇమ్మిగ్రేషన్ విధానాల్లో తీసుకొచ్చిన ఆకస్మిక మార్పులు ఉపాధి ఆధారిత (H-1B వంటివి), ఫ్యామిలీ ఆధారిత గ్రీన్‌కార్డ్ దరఖాస్తుదారుల పాలిట శరాఘాతంగా మారాయి. విదేశీ ప్రతిభను నమ్ముకున్న అమెరికన్ కంపెనీలు సైతం ఇప్పుడు కొత్తగా నిపుణులను నియమించుకోవడానికి వెనుకాడే (జంకే) పరిస్థితి ఏర్పడింది. అమెరికా వైఖరిపై భారతీయులలో విసుగు, నిరాశ తీవ్రస్థాయికి చేరుకుంటున్న తరుణంలో ఈ తాజా సంక్షోభంపై ఒక వివరణాత్మక కథనం:

​నిబంధన ఏంటి? నిపుణులకు వచ్చిన విఘాతం ఏంటి?

​యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ (USCIS) జారీ చేసిన సరికొత్త ఆర్డర్ ప్రకారం—అమెరికాలో ఉంటూ గ్రీన్‌కార్డ్ ప్రక్రియలో కీలకమైన ‘అడ్జస్ట్‌మెంట్ ఆఫ్ స్టేటస్’ (AOS) దరఖాస్తు చేసుకోవడానికి ఇకపై వీలుండదు.

• ​స్వదేశానికి తిరుగు పయనం: ఎవరైనా గ్రీన్‌కార్డ్ ప్రాసెస్ పూర్తి చేయాలంటే, వారు అమెరికాను విడిచిపెట్టి తమ స్వదేశానికి (భారతదేశం వంటి దేశాలకు) వెళ్లి, అక్కడ ఉన్న అమెరికన్ కాన్సులేట్ ద్వారా మాత్రమే (Consular Processing) ప్రక్రియను ముగించాల్సి ఉంటుంది.
• ​ప్రాజెక్టులు నిలిచే ప్రమాదం: అమెరికాలో కీలక ప్రాజెక్టులలో ఉన్న లీడ్ డెవలపర్లు, ఆర్కిటెక్ట్‌లు హఠాత్తుగా దేశం దాటాల్సి వస్తే, ఆయా కంపెనీల కార్యకలాపాలు స్తంభించిపోతాయి. వీసా ఇంటర్వ్యూలు, ప్రాసెసింగ్ ఆలస్యమైతే ఉద్యోగులు నెలల తరబడి అమెరికా వెలుపలే ఉండిపోవాల్సి వస్తుంది.

​కంపెనీల జంకుడు.. ఏఐ, టెక్ రంగాలపై దెబ్బ!

​ఈ కొత్త రూల్ కేవలం ఉద్యోగులకే కాదు, సిలికాన్ వ్యాలీలోని దిగ్గజ టెక్ కంపెనీలకు కూడా పెద్ద తలనొప్పిగా మారింది. విదేశీ నిపుణులకు గ్రీన్‌కార్డ్ స్పాన్సర్‌షిప్ ఇవ్వడం అనేది ఇప్పుడు అత్యంత సంక్లిష్టమైన వ్యవహారంగా మారింది.

• ​కొత్త నియామకాలకు బ్రేక్: భవిష్యత్తులో ఇమ్మిగ్రేషన్ చిక్కులు ఎదురవుతాయనే భయంతో విదేశీ టాలెంట్‌ను తీసుకోవడానికి కంపెనీలు వెనుకంజ వేస్తున్నాయి.
• ​టెక్ దిగ్గజాల హెచ్చరిక: లింక్డ్‌ఇన్ సహ వ్యవస్థాపకుడు రీడ్ హాఫ్‌మన్, ప్రముఖ కృత్రిమ మేధ (AI) శాస్త్రవేత్త ఆండ్రూ ఇంగ్ వంటి వారు ఈ నిర్ణయాన్ని తీవ్రంగా తప్పుపట్టారు. ఏఐ రంగంలో అమెరికా గ్లోబల్ లీడర్‌గా కొనసాగాలంటే ప్రపంచవ్యాప్త టాలెంట్ అవసరమని, ఈ ఆంక్షల వల్ల అమెరికా తన సాంకేతిక ఆధిపత్యాన్ని కోల్పోయే ప్రమాదం ఉందని వారు హెచ్చరిస్తున్నారు.

​అమెరికాపై పెరుగుతున్న విసుగు – 'స్వదేశానికి రండి' పిలుపులు

​భారతీయ ఐటీ నిపుణులు ఇప్పటికే దశాబ్దాల తరబడి గ్రీన్‌కార్డ్ బ్యాక్‌లాగ్‌తో నరకం చూస్తున్నారు. తాజా ఆంక్షలు వారి సహనానికి పరీక్షగా మారాయి. వీసా నిబంధనల చుట్టూ జీవితాన్ని నెట్టుకురావడం కన్నా స్వదేశంలోనే స్థిరపడటం మేలనే భావన ఇప్పుడు బలపడుతోంది.

​ఇదే తరుణంలో, ప్రముఖ టెక్ సంస్థ జోహో (Zoho) అధినేత శ్రీధర్ వెంబు చేసిన ట్వీట్ సోషల్ మీడియాలో విపరీతంగా వైరల్ అవుతోంది. ఆయన భారతీయ నిపుణులను ఉద్దేశించి భావోద్వేగ పూరిత పిలుపునిచ్చారు:

​"అమెరికాలో వీసా నిబంధనలతో సతమతమవుతున్న భారతీయ నిపుణులందరికీ నాదొక విన్నపం. దయచేసి స్వదేశానికి తిరిగి వచ్చేయండి. ఇక్కడ మన దేశాన్ని నిర్మించుకుందాం. ఇది కొంత కష్టంగా, త్యాగంతో కూడుకున్నదిగా అనిపించినా.. మన ఆత్మగౌరవమే మనకు ముఖ్యం. మన భారతదేశాన్ని గర్వపడేలా చేద్దాం."

​మరోవైపు అమెరికా సెక్రటరీ ఆఫ్ స్టేట్ మార్కో రూబియో ఈ నిర్ణయాన్ని సమర్థిస్తూ, ఇది ఏ ఒక్క దేశాన్ని టార్గెట్ చేసింది కాదని, అమెరికా వలస చట్టాలను క్రమబద్ధీకరించడానికేనని స్పష్టం చేశారు.

​భారత్‌కు ఇదొక 'రివర్స్ బ్రెయిన్ డ్రెయిన్' అవకాశమా?

​అమెరికా తీసుకుంటున్న ఈ కఠిన నిర్ణయాలు భారతీయ మేధో వలసలకు (Brain Drain) బ్రేక్ వేసేలా కనిపిస్తున్నాయి. ఒకవేళ అమెరికాలోని అత్యున్నత ప్రతిభావంతులు ఈ వీసా ఇబ్బందులు భరించలేక భారతదేశానికి తిరిగి వస్తే, అది భారత టెక్, స్టార్టప్ రంగానికి సరికొత్త ఊపును ఇస్తుందనడంలో సందేహం లేదు. ఏది ఏమైనా, "అమెరికా కల" ఇప్పుడు ప్రొఫెషనల్స్‌కు ఒక పెద్ద "విఘాతం"గా మారిందనేది జగమెరిగిన సత్యం.

మంథని: మాజీ స్పీకర్ శ్రీపాద రావు కు నివాళి

ఉమ్మడి ఆంధ్రప్రదేశ్ మాజీ స్పీకర్ స్వర్గీయ శ్రీ దుద్దిల్ల శ్రీపాదరావు గారి 89వ జయంతి సందర్భంగా సోమవారం మంథని పట్టణంలోని మండల మరియు పట్టణ కాంగ్రెస్ పార్టీ ఆధ్వర్యంలో శ్రీపాద చౌక్ మరియు రావులచెరువు కట్ట వద్ద ఏర్పాటు చేసిన శ్రీపాదరావు గారి విగ్రహాలకు టీపీసీసీ రాష్ట్ర ప్రధాన కార్యదర్శి శ్రీ దుద్దిల్ల శ్రీను బాబు పూలమాలలు వేసి ఘనంగా నివాళులర్పించారు.

ఈ సందర్భంగా శ్రీను బాబు గారు మాట్లాడుతూ, శ్రీపాదరావు గారు మంథని ప్రాంత అభివృద్ధికి విశేష కృషి చేశారని, వారి జీవితాన్ని ప్రజాసేవకు అంకితం చేశారని కొనియాడారు. వారి ఆశయ సాధన దిశగా తాము కట్టుబడి పనిచేస్తామని తెలిపారు. మంథని పట్టణంలో పలు సేవా కార్యక్రమాలు ఘనంగా నిర్వహించబడ్డాయి. మంథని ప్రభుత్వ ఆసుపత్రిలో ఎస్సీ సెల్ మంథని డివిజన్ అధ్యక్షులు మంథని సత్యం ఆధ్వర్యంలో రోగులకు పండ్ల పంపిణీ కార్యక్రమం నిర్వహించారు. అదేవిధంగా శానిటేషన్ సిబ్బందికి చీరలు పంపిణీ చేసి వారి సేవలను అభినందించారు. అనంతరం మంథని బస్టాండ్‌లో మంథని మండల యూత్ కాంగ్రెస్ అధ్యక్షులు సాధుల శ్రీకాంత్ ఆధ్వర్యంలో వివిధ ప్రాంతాలకు వెళ్లే ప్రయాణికులకు మజ్జిగ ప్యాకెట్లను పంపిణీ చేశారు.  మంథని వ్యవసాయ మార్కెట్ ఆవరణలో మార్కెట్ కమిటీ చైర్మన్ కుడుదుల వెంకన్న గారి ఆధ్వర్యంలో స్వర్గీయ శ్రీ దుద్దిల్ల శ్రీపాదరావు  చిత్రపటానికి  TPCC ప్రధాన కార్యదర్శి శ్రీ దుద్దిల్ల శ్రీనుబాబు పూలమాల వేసి ఘనంగా  నివాళులర్పించారు. అనంతరం కాంగ్రెస్ పార్టీ మంథని మండల అధ్యక్షులు ఆయిలి ప్రసాద్ మరియు మాజీ మండల యూత్ కాంగ్రెస్ అధ్యక్షులు ఎరుకల ప్రవీణ్ ఆధ్వర్యంలో 30మంది నిరుపేదలకు  దుద్దిల్ల శ్రీను బాబు గారి చేతుల మీదుగా నిత్యవసర సరుకులు పంపిణీ చేయడం జరిగింది. ఈ సందర్భంగా నాయకులు మాట్లాడుతూ శ్రీపాద రావు గారు సర్పంచ్ గా, సమితి అధ్యక్షునిగా  ఉమ్మడి ఆంధ్రప్రదేశ్ శాసనసభపతిగా శ్రీపాదరావు గారు మంథని ప్రాంతానికి ఎన్నో సేవలు అందించారని, రైతులకు లోన్లు, ట్రాన్స్ఫార్మర్లు ఇప్పించి,సాగునీరు అందించి రైతులకు అండగా నిలిచారని, ఈ ప్రాంతంలో ఉన్నటువంటి యువతీ యువకులకు మంచి విద్యా ఉద్యోగం కల్పించాలని, ప్రతి మారుమూల గ్రామానికి రోడ్డు సౌకర్యం, తాగునీరు అందించడం కోసం ఎంతగానో కృషి చేశారు. శాసనసభపతిగా ఎంతో హుందాగా వ్యవహరించి శాసనసభ పదవికి వన్నెతెచ్చారని కొనియాడారు. ఈ కార్యక్రమంలో మంథని పట్టణ,మండల నాయకులు, యూత్ కాంగ్రెస్,అనుబంధ సంఘాల నాయకులు, దుద్దిళ్ల కుటుంబ అభిమానులు పాల్గొన్నారు.

హైదరాబాద్: స్పీకర్ పదవికి వన్నె తెచ్చిన విలువల శిఖరం శ్రీపాద

మాట్లాడుతున్న కర్ణాటక అసెంబ్లీ స్పీకర్ ఖాదర్ ఫరీద్ 

* పదవి అంటే అధికారం కాదు... బాధ్యత అని చాటి చెప్పిన దార్శనికుడు

* దుద్దిళ్ల శ్రీపాద రావు రాజకీయం.. నేటి తరానికి స్ఫూర్తిదాయకం

* కర్ణాటక స్పీకర్ యూటీ ఖాదర్ ఫరీద్ 

స్పీకర్ వ్యవస్థకే వన్నె తెచ్చిన విలువల శిఖరం శ్రీపాదరావు అని కర్ణాటక స్పీకర్ యూటీ ఖాదర్ ఫరీద్ కొనియాడారు. రాజకీయాల్లో పదవి అనేది నెత్తిన పెట్టుకునే కిరీటం కాదు, అది బాధ్యత అని చాటిచెప్పిన దార్శనికుడన్నారు. సోమవారం హైటెక్ సిటీలోని శిల్పాకళా వేదికలో తెలంగాణ భాషా, సాంస్కృతిక శాఖ ఆధ్వర్యంలో నిర్వహించిన ఉమ్మడి ఆంధ్రప్రదేశ్ మాజీ స్పీకర్ దుద్దిళ్ల శ్రీపాద రావు 89వ జయంతి వేడుకలకు ఆయన ముఖ్య అతిథిగా హాజరయ్యారు. ఈ సందర్భంగా యూటీ ఖాదర్ ఫరీద్ మాట్లాడుతూ.. సర్పంచ్ నుంచి స్పీకర్ వరకు ఎదిగిన శ్రీపాద రావు రాజకీయ ప్రస్థానం ఎంతో స్ఫూర్తిదాయకమన్నారు. ప్రజాస్వామ్యంలో జవాబుదారీతనం లేకపోతే అది అధికారం అవుతుంది తప్ప సేవ కాదని బలంగా విశ్వసించారన్నారు. చివరి వరకూ.. ప్రజా సేవే శ్వాసగా విలువలతో కూడిన రాజకీయం చేశారన్నారు. ప్రజాప్రతినిధి సరిగ్గా పనిచేయకపోతే వెనక్కి పిలిచే "రీకాల్" విధానాన్ని మనస్ఫూర్తిగా సమర్థించిన గొప్ప ప్రజాస్వామ్యవాది శ్రీపాద రావు అని అన్నారు. స్పీకర్‌గా ఉన్నప్పుడు అధికార, ప్రతిపక్షాలకు సమాన అవకాశం కల్పించి ప్రజాస్వామ్య విలువల్ని కాపాడారన్నారు. ఒక నాయకుడు ఎలా బతకాలో మాత్రమే కాదు, చనిపోయిన తర్వాత కూడా ప్రజల గుండెల్లో ఎలా బతికి ఉండాలో నిరూపించిన ధన్యజీవన్నారు. రాజకీయాల్లో నైతికత, పార్లమెంటరీ విలువలు ప్రశ్నార్థకమవుతున్న ప్రస్తుత తరుణంలో ఇలాంటి మహనీయులు చూపిన అనుసరణీయమన్నారు. సభాపతి హోదాలో ఆయన నెలకొల్పిన ప్రమాణాలు నేటి తరుణంలో ఆచరించాల్సిన అవసరం ఉందన్నారు. అధికారం ఉన్నా లేకున్నా ప్రజల కోసం ఆయన పడిన తపన... నేటి తరం నాయకులకు ఒక పాఠ్యపుస్తకమన్నారు. శ్రీపాదరావు కేవలం చట్టసభకే పరిమితం కాలేదని, సామాజిక ఉద్రిక్తతలు నెలకొన్న సమయంలో కూడా అమాయకులను రక్షించేందుకు రాజ్యాంగ పరిధిలో ఉండి ధైర్యంగా పోరాడారని గుర్తు చేశారు. ఆయన చూపిన విలువల బాటలో పయనిస్తూ, తండ్రికి తగ్గ తనయుడిగా, నిబద్ధత గల నాయకుడిగా మంత్రి శ్రీధర్ బాబు ప్రజా సేవలో ముందుకు సాగుతున్నారని ప్రశంసించారు. ఇదే స్ఫూర్తిని రాబోయే రోజుల్లోనూ కొనసాగించాలని సూచించారు. "ప్రజా క్షేత్రంలో సాటి మనిషి కోసం ఎలా నిలబడాలి, కష్టాల్లో ఉన్నవారికి ఎలా అండగా నిలవాలనే నైతిక విలువల్ని మా నాన్న మాకు వారసత్వంగా ఇచ్చారు. తనను నమ్ముకున్న ఒక సామాన్య కార్యకర్త ఇంటికి వెళ్తూ, ప్రజల మధ్యే ఆయన అమరుడయ్యారు. తన ఊపిరి ఆగిపోయే వరకు ప్రతి అడుగు ప్రజల కోసమే వేశారు" అని శ్రీపాద రావు తనయుడు, రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు పేర్కొన్నారు. ఆయన ఆశయ సాధనకు చిత్తశుద్ధితో కృషి చేస్తానని, అదే నిబద్ధతతో ప్రజా సేవలో ముందుకు సాగుతానన్నారు. కార్యక్రమంలో శాసన మండలి చైర్మన్ గుత్తా సుఖేందర్ రెడ్డి, వైస్ చైర్మన్ బండా ప్రకాశ్, మంత్రులు పొన్నం ప్రభాకర్, అడ్లూరి లక్ష్మణ్ కుమార్, అజారుద్దీన్, ఎమ్మెల్యేలు విజయ రమణా రావు, రాజ్ ఠాకూర్ మక్కన్ సింగ్, ఆది శ్రీనివాస్, ప్రేమ్ సాగర్ రావు, గండ్ర సత్యనారాయణ, కుంభం అనిల్ కుమార్ రెడ్డి, అరికెపూడి గాంధీ, మల్ రెడ్డి రంగారెడ్డి, ఎమ్మెల్సీలు సురభి వాణిదేవి, బల్మూరి వెంకట్ తదితరులు పాల్గొన్నారు.

అజరామరుడు శ్రీపాద రావు

* నేడు శ్రీపాద రావు జయంతి

* రాష్ట్ర వ్యాప్తంగా ఉత్సవాలు

తెలుగు రాజకీయాల్లో దుద్దిళ్ల శ్రీపాదరావుది ప్రత్యేకమైన చరిత్ర. ఆయన వ్యక్తిత్వమే ప్రజలకు దగ్గర చేసింది. ఇప్పటికీ జనాల గుండెల్లో నిలిచేలా చేసింది. శ్రీపాదరావు 89వ జయంతి సందర్భంగా ఓసారి స్మరించుకుందాం..

తెలంగాణ రాజకీయ చరిత్రలో కొంతమంది నాయకులు పదవుల వల్ల కాదు, తమ వ్యక్తిత్వం వల్ల గుర్తుండిపోతారు. అధికారపు మెరుపులు క్రమంగా మసకబారినా, వారు అందించిన విలువల వెలుగు మాత్రం చిరస్థాయిగా నిలుస్తుంది. తెలుగు నేలపై అలాంటి వెలుగులు పంచిన నాయకుడు దుద్దిళ్ల శ్రీపాదరావు. మార్చి 2, 1935న కాటారం మండలం ధన్వాడ గ్రామంలో జన్మించిన ఆయన, ఒక సర్పంచ్ నుంచి ఉమ్మడి ఆంధ్రప్రదేశ్ శాసనసభాపతి వరకు ఎదిగారు. ఆయన జీవితం మన రాజకీయ సంస్కృతికి చూపిన మార్గాన్ని శ్రీపాదరావు 89వ జయంతి సందర్భంగా స్మరించుకోవాలి.

న్యాయవాదిగానూ సేవలు

ఒక సాధారణ రైతు కుటుంబంలో జన్మించిన శ్రీపాదరావు బాల్యమంతా పల్లెటూరులోనే గడిచింది. తల్లిదండ్రులు రాధాకృష్ణయ్య, కమలాబాయి ఇచ్చిన విలువలు ఆయన ప్రస్థానానికి పునాదిరాళ్లయ్యాయి. చిన్నప్పటి నుంచి చదువులో చురుకుగా ఉండే ఆయన ధన్వాడలో ప్రాథమిక విద్య, మంథనిలో ఎస్‌ఎస్‌సీ పూర్తి చేశారు. ఉన్నత విద్య కోసం హైదరాబాద్‌ చేరారు. ఆ తర్వాత ఆదిలాబాద్‌లో పంచాయతీ ఇన్‌స్పెక్టర్‌గా పనిచేశారు. పంచాయతీ ఇన్‌స్పెక్టర్‌గా పని చేసిన అనుభవం ఆయనకు గ్రామ పరిపాలనపై స్పష్టమైన అవగాహన ఇచ్చింది. అనంతరం నాగ్‌పూర్‌లో న్యాయశాస్త్రం చదివి న్యాయవాదిగా సేవలందించారు.

వ్యవసాయం చేస్తూ రాజకీయాల్లోకి

తండ్రి మరణం తర్వాత శ్రీపాదరావు తన స్వగ్రామానికి తిరిగి వచ్చి వ్యవసాయం చేశారు. ఆ వ్యవసాయమే ఆయన జీవితాన్ని మలుపు తిప్పింది. రైతు కష్టాలు, పల్లె ప్రజల ఆవేదనలు ఆయనకు ప్రత్యక్ష అనుభవాలయ్యాయి. రాజకీయాల్లోకి రావడానికి ఆయనకు పెద్ద వేదికలు అవసరం కాలేదు. ప్రజలే ఆయనను ముందుకు నెట్టారు. వరుసగా రెండు సార్లు గ్రామ సర్పంచ్‌గా ఎన్నికై, మహదేవపూర్ సమితి అధ్యక్షుడిగా, మంథని ల్యాండ్ మార్ట్గేజ్ బ్యాంక్ ఛైర్మన్‌గా పనిచేశారు. ఈ దశలోనే ఆయన ప్రజానాయకుడిగా ఒక్కో మెట్టు పైకెదిగారు. అధికారంలోకి వచ్చిన తరువాత ప్రజలకు దూరమయ్యే రాజకీయ సంస్కృతికి భిన్నంగా, ఆయన ఎప్పుడూ ప్రజల మధ్యే ఉండేవారు. నాయకత్వం అంటే హోదా కాదని, బాధ్యత అని ఆయన ప్రవర్తన చాటి చెప్పింది.

టీడీపీ హవాలోనూ విజయం

1983లో తెలుగుదేశం పార్టీ ప్రభంజనం మధ్య కాంగ్రెస్ అభ్యర్థిగా మంథని నుంచి పోటీ చేసి విజయం సాధించడం సాధారణ విషయం కాదు. ప్రజల విశ్వాసం ఆయనకు రాజకీయ బలంగా మారింది. మూడు సార్లు ఎమ్మెల్యేగా ఎన్నికై, మంథని నియోజకవర్గ అభివృద్ధికి నిబద్ధతతో కృషి చేశారు. రహదారులు, సాగునీటి సదుపాయాలు, విద్యా సంస్థలు, సంక్షేమ పథకాలు ఇలా ఆయన రాకతో... మంథని రూపురేఖలు మారిపోయాయి. 1990-94 మధ్య ఆంధ్రప్రదేశ్ శాసనసభ స్పీకర్‌గా ఏకగ్రీవంగా ఎన్నిక కావడం ఆయనకు లభించిన అత్యున్నత గౌరవం అని చెప్పవచ్చు.

అందరికీ మాట్లాడే అవకాశం

స్పీకర్ పదవి అంటే కేవలం సభను నడపడం కాదు. అది ప్రజాస్వామ్యాన్ని కాపాడే బాధ్యత. పొలిటికల్ హీట్ ఎక్కువగా ఉన్న కాలంలో కూడా ఆయన నిష్పక్షపాత వైఖరి పాటించారు. పార్టీ భావజాలాన్ని పక్కన పెట్టి, సభను సమతుల్యంగా నడిపి, అధికార, ప్రతిపక్ష పార్టీల సభ్యుల ప్రశంసలను సమానంగా పొందారు. శ్రీపాదరావు స్పీకర్‌గా ఉన్న కాలంలో ఉమ్మడి ఆంధ్రప్రదేశ్ శాసనసభలో సభ్యుల క్రమశిక్షణ పెరిగింది. ప్రజలకు ఉపయోగపడే చర్చలన్నీ గౌరవప్రదంగా జరిగేలా చూశారు. సభాపతి పీఠం పట్ల ప్రజల్లో ఉన్న గౌరవాన్ని నిలబెట్టారు. అదే సమయంలో తన నియోజకవర్గాన్ని మరువలేదు. మంథని అభివృద్ధికి ప్రత్యేక శ్రద్ధ తీసుకున్నారు.

నక్సలైట్ల చేతిలో

1994 ఎన్నికల్లో ఓడిపోయినప్పటికీ... ప్రజాసేవలో మాత్రం శ్రీపాదరావు వెనకడుగు వేయలేదు. నక్సలిజం ప్రభావం ఉన్న ప్రాంతంలోనూ ప్రజల మధ్యే ఉన్నారు. హింసకు బదులుగా ప్రజాస్వామ్య మార్గాన్ని విశ్వసించారు. 1999 ఏప్రిల్ 13న మహదేవపూర్ మండలం అన్నారం సమీపంలో నక్సలైట్ల చేతిలో హత్యకు గురవడం యావత్ తెలుగు ప్రజలను కలచివేసింది. ప్రజల కోసం జీవించిన నాయకుడి జీవితం ఇలా బలవడం తెలంగాణ రాజకీయ చరిత్రలో విషాద ఘట్టంగా నిలిచిపోయింది.

అవే విలువలతో రాజకీయాల్లో శ్రీధర్ బాబు

శ్రీపాదరావు మరణంతో ముగిసింది కేవలం జీవితం మాత్రమే అని, ఆయన విలువలు కాదని మంథని ప్రజలు ఇప్పటికీ ఆయన మీద అభిమానాన్ని చాటుకుంటున్నారు. తండ్రి స్ఫూర్తిని ఆయన కుమారుడు దుద్దిళ్ల శ్రీధర్‌బాబు ముందుకు తీసుకెళ్తున్నారు. 1999 నుంచి వరుసగా ఐదుసార్లు మంథని ఎమ్మెల్యేగా ఎన్నికై ప్రజల విశ్వాసాన్ని నిలబెట్టుకున్నారు. ఉమ్మడి ఆంధ్రప్రదేశ్‌లో విప్‌గా, మంత్రిగా పనిచేసి తనదైన ముద్ర వేశారు. రాష్ట్ర విభజన చట్ట ప్రక్రియలో కీలక పాత్ర పోషించి తెలంగాణ రాష్ట్ర అవిర్భావనికి కృషి చేశారు. కాంగ్రెస్ ప్రభుత్వంలో ఐటీ, పరిశ్రమలు, శాసన వ్యవహారాల శాఖలను నిర్వహిస్తూ అభివృద్ధి దిశగా కృషి చేస్తున్నారు. తండ్రి అందించిన విలువలు, ప్రజల మధ్యే ఉంటూ చేసే రాజకీయం ఆయన నడకలో, నడతలో, పాలనలో ప్రతిబింబిస్తోంది.

శ్రీపాదరావు జయంతి వేడుకలు

దుద్దిళ్ల శ్రీపాదరావు జయంతి వేడుకలు మార్చి 2న తెలంగాణ రాష్ట్ర ప్రభుత్వం అధికారికంగా జరపాలని 2024 ఫిబ్రవరి 25న నిర్ణయించింది. ఇది ఆయన మీద ఉన్న గౌరవానికి నిదర్శనం. పార్టీలకు అతీతంగా అందరి గౌరవాన్ని పొందిన నాయకుడిగా ఆయన నిలిచారు. ఈ ఏడాది రాష్ట్ర ప్రభుత్వం అధికారికంగా నిర్వహిస్తున్న 89వ జయంతి కార్యక్రమంలో శ్రీపాదరావు స్మారక అవార్డులు వివిధ రంగాల్లో విశిష్ట సేవలు అందించిన ప్రముఖులకు అందజేస్తున్నారు.

భారత రక్షణ రంగ అభివృద్ధికి విశేష కృషి చేసిన డాక్టర్ జి. సతీష్ రెడ్డి , అన్నమయ్య కీర్తనలను ప్రపంచవ్యాప్తంగా ప్రచారం చేసిన పద్మశ్రీ డాక్టర్ శోభారాజు , సాంకేతిక రంగంలో విశేష ప్రతిభ కనబరిచిన టాటా కన్సల్టెన్సీ సర్వీసెస్‌కు చెందిన ఆర్. వెంకటరామన్, సాంకేతిక, వృత్తిపర విద్యలో నూతన ఆవిష్కరణలకు మార్గదర్శకులైన డాక్టర్ సుబ్బరంగయ్య కొప్పరపు ఈ పురస్కారాలు అందుకోనన్నారు.

నేటి రాజకీయ వాతావరణంలో విభజన, విమర్శలు, ఆరోపణలు ఎక్కువగా వినిపిస్తున్న వేళ, శ్రీపాదరావు జీవితం ఒక స్పష్టమైన సందేశం ఇస్తుంది. అధికారాన్ని సంపాదించడం సులభమే కానీ, విశ్వాసాన్ని సంపాదించడం కష్టం. పదవి తాత్కాలికం. ప్రజల మనసుల్లో నిలిచే విశ్వాసమే శాశ్వతం అని శ్రీపాదరావు నిరూపించారు. సర్పంచ్ నుంచి శాసనసభ పీఠం వరకు ఆయన చేసిన ప్రయాణం, ప్రజాసేవకు అంకితమైన జీవితం ఒక నాయకుడు ఎలా ఉండాలో చూపించింది. ఆయనను స్మరించుకోవడం అంటే గతాన్ని పొగడడం మాత్రమే కాదు. రాజకీయాలకు విలువలు తిరిగి తీసుకురావాలనే సంకల్పం కూడా. దుద్దిళ్ల శ్రీపాదరావు 89వ జయంతి సందర్భంగా, ఆయన అందించిన రాజకీయ విలువలను స్మరించుకుంటూ యావత్ తెలంగాణ ఆయనకు నివాళి అర్పిస్తోంది!

హైదరాబాద్: గ్రంథాన్ని ఆవిష్కరించిన శ్రీను బాబు

 

హైదరాబాద్ చిక్కడపల్లి లోని  శ్రీ త్యాగరాయ గాన సభ లో నిర్వహించిన గ్రంథావిష్కరణ సభ కార్యక్రమంలో పాల్గొని గ్రంథాన్ని ఆవిష్కరించిన *టీపీసీసీ రాష్ట్ర ప్రధాన కార్యదర్శి దుద్దిళ్ళ శ్రీను బాబు.*

*అచ్యుతన్న చారిటబుల్ ట్రస్ట్ వారి సాదర ఆహ్వానంతో నిర్వహించిన ఈ సభలో, “శ్రీ గోపాలదాస కృతిరత్నాలు”* గ్రంథాన్ని బ్రహ్మశ్రీ సామవేదం షణ్ముఖ శర్మ గారి శుభాశీస్సులతో ఆవిష్కరించారు.

ఈ సందర్భంగా *దుద్దిళ్ళ శ్రీను బాబు మాట్లాడుతూ,*

మొదటి ప్రచురణను 1993లో ఉమ్మడి ఆంధ్రప్రదేశ్ మాజీ స్పీకర్, తమ తండ్రి స్వర్గీయ దుద్దిళ్ళ శ్రీపాద రావు గారు ఆవిష్కరించారని గుర్తుచేశారు. రెండవ ప్రచురణ ఆవిష్కరణ తమ చేతుల మీదుగా చేపట్టే అవకాశం కల్పించిన ట్రస్ట్ సభ్యులకు ప్రత్యేక కృతజ్ఞతలు తెలియజేశారు.

ఆధ్యాత్మిక సాహిత్యం మన సంస్కృతి,సనాతన విలువలను తదుపరి తరాలకు అందించడంలో కీలక పాత్ర పోషిస్తుందని పేర్కొన్నారు. గ్రంథ రచయితలకు మరియు ట్రస్ట్ సభ్యులకు హృదయపూర్వక అభినందనలు తెలిపారు. కార్యక్రమంలో పండితులు, సాహితీవేత్తలు,భక్తులు మరియు ప్రముఖులు పెద్ద సంఖ్యలో పాల్గొన్నారు.

హైదరాబాద్: సమాచార లోపంతోనే శారదా పీఠం భూములపై గందరగోళం

పొరపాట్లు దొర్లితే సరిదిద్దుకునేందుకు మాకెలాంటి భేషజాలు లేవు

మతాన్ని అడ్డు పెట్టుకొని మాపై ప్రతిపక్షాల దుష్ప్రచారం

పీఠం అభివృద్ధి, ఆధ్యాత్మిక కార్యక్రమాలకు అండగా ప్రభుత్వం: మంత్రి శ్రీధర్ బాబు 

కోకాపేట్‌లోని శ్రీ శారదా పీఠం భూముల వ్యవహారంలో ‘సమాచార లోపం’ వల్లే గందరగోళం తలెత్తిందని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు స్పష్టం చేశారు. ఆ భూములు పీఠానికే చెందుతాయని, ఇందులో ఎలాంటి సందేహం లేదన్నారు. పీఠం అభివృద్ధి, ఆధ్యాత్మిక కార్యక్రమాలకు ప్రభుత్వం తరఫున అన్ని రకాలుగా అండగా ఉంటామన్నారు. ఆదివారం కోకాపేట్ లోని శ్రీ శారదా పీఠాన్ని సందర్శించి... అక్కడి రాజ శ్యామల అమ్మవారి ఆలయం, ఇతర నిర్మాణాలను పరిశీలించారు. అనంతరం ఉత్తర పీఠాధిపతులు స్వాత్మానందేంద్ర సరస్వతీ స్వామీజీతో ప్రత్యేకంగా సమావేశమయ్యారు. ఈ సందర్భంగా మంత్రి శ్రీధర్ బాబు మీడియాతో మాట్లాడుతూ.... రాష్ట్ర ప్రభుత్వం అన్ని మతాలను సమానంగా గౌరవిస్తోందని అన్నారు. మా ప్రభుత్వానికి భేషజాలు లేవని, తప్పులు దొర్లితే ఎప్పటికప్పుడు సరిదిద్దుకునేందుకు సిద్ధంగా ఉన్నామన్నారు. అసలు విషయం తెలిసిన వెంటనే శారదా పీఠం భూముల విషయంలో జరిగిన పొరపాటును వెంటనే సరిదిద్దుకున్నామన్నారు. రాబోయే రోజుల్లో ఇలాంటివి పునరావృతం కాకుండా చర్యలు తీసుకుంటామన్నారు. మతాన్ని అడ్డు పెట్టుకొని కొందరు బీజేపీ, బీఆర్ఎస్ నాయకులు నీచ రాజకీయాలకు పాల్పడుతున్నారని విమర్శించారు. తమ రాజకీయ ఉనికి కోసం ప్రభుత్వంపై  దుష్ప్రచారం చేస్తున్నారని మండిపడ్డారు. మాది బుల్డోజర్ సంస్కృతి కాదని, కబ్జాకోరుల నుంచి ప్రభుత్వ భూములను కాపాడటం చూసి ఓర్వలేకే కొందరూ మాపై కావాలనే బురద చల్లుతున్నారని విమర్శించారు. బాపు ఘాట్ అభివృద్ధి విషయంలో ప్రజాభీష్టం మేరకే ముందుకెళ్తామని, తప్పుడు ప్రచారాన్ని నమ్మొద్దని స్థానికులకు మంత్రి శ్రీధర్ బాబు విజ్ఞప్తి చేశారు.

మంథని: గరికిపాటి ప్రవచనాలలో పాల్గొన్న మంత్రి శ్రీధర్ బాబు

* మంత్రపురి ధర్మ ప్రచార సమితి ప్రచార సమితి వారి ఆధ్వర్యంలో నిర్వహిస్తున్న  అయ్యప్ప స్వామి దేవాలయంలో మణికంఠ కళా ప్రాంగణంలో ఏర్పాటు చేసినటువంటి శకుంతల ప్రవచనాలలో సహస్రవధాని  పద్మశ్రీ డాక్టర్ శ్రీ గరికిపాటి నరసింహారావు పాల్గొన్నారు. మంథని ప్రాంతానికి వచ్చిన వారిని  రాష్ట్ర ఐటీ,పరిశ్రమల మరియు శాసనసభ వ్యవహారాల మంత్రివర్యులు శ్రీ దుద్దిల్ల శ్రీధర్ బాబు శాలువాతో ఘనంగా సత్కరించిన

అనంతరం మంత్రి శ్రీధర్ బాబు గారు మాట్లాడుతూ వారు నిర్భయంగా ముక్కుసూటియా ధర్మ శాస్త్రాలను మంచి   ప్రవచనాలు చెప్పి వ్యక్తి డాక్టర్ గరికిపాటి. మంథని లో అనేక దేవాలయాలు ఉన్నాయని వాటికి దూపదీప నైవేద్యాలను పాటు మంత్ర ఉచ్చరణకు, వేయి పడగలు సంబంధించినటువంటి పీవీ నరసింహారావు కూడా ఇదే ప్రాంతం నుంచి ప్రాతినిధ్యం వహించారు. ఈ ప్రాంతంలో పెద్దలు అందరు చేసే మంత్ర ఉచ్చరణ  చేస్తున్నారని అన్నారు.

మే మాసంలో జరిగే అంత పుష్కరాల్లో పాల్గొనాలని శ్రీధర్ బాబు కోరారు. నన్ను గాని మా నాన్నగారిని గాని గుర్తు చేసినందుకు హృదయపూర్వక ధన్యవాదాలు తెలుపుతున్నాను. ఈరోజు ఈ ప్రాంత ప్రజలందరికీ తరపున ఈ ప్రాంతానికి విచ్చేసిన గరికిపాటి నరసింహారావు కు ప్రత్యేక కృతజ్ఞతలు తెలిపారు. మంథని ప్రాంతంలో ఉన్న ప్రజలను చైతన్యవంతులను చేస్తూ ముందుకు తీసుకువెళ్లాలని అన్నారు. ఇలాంటి ఆధ్యాత్మిక కార్యక్రమాలు మరెన్నో చేయాలని వారన్నారు.

మంథని: పోచమ్మ ఆలయం వద్ద సింటెక్స్ ఏర్పాటు చేయాలి

మంథని: 

శ్రీపాద కాలనీ మెయిన్ రోడ్డు లోపల గల పోచమ్మ టెంపుల్ వద్ద భక్తుల సౌకర్యార్థం మరియు ఎండాకాలాన్ని దృష్టిలో పెట్టుకొని వీధి ప్రజల కొరకు వాటర్ ట్యాంక్ (సింటెక్స్) ఏర్పాటు చేయాలని కోరుతూ ఈరోజు మంథని పట్టణంలోని మున్సిపల్ కార్యాలయంలో మున్సిపల్ చైర్మన్  ఓడ్నాల  శ్రీనివాస్ గారికి మరియు వైస్ చైర్మన్ సహేందర్ రెడ్డి గారికి వినతి పత్రం ఇవ్వడం జరిగింది*

మంథని: ఛత్రపతి కి జోహార్లు

మరాఠా యోధుడు, హిందూ సామ్రాజ్యాన్ని స్థాపించాలని కంకణం కట్టుకున్న వీరుడు చత్రపతి శివాజీ మహారాజ్ 396వ జయంతినీ మంథనిలో గురువారం ఘనంగా నిర్వహించారు. ఈ సందర్భంగా మంథని పట్టణంలోని శివాజీ విగ్రహానికి పూలమాల వేసి జోహార్లు అర్పించారు. ఈ కార్యక్రమంలో విశ్వ హిందూ పరిషత్ జిల్లా ఉపాధ్యక్షుడు కొత్త శ్రీనివాస్, మంథని బాధ్యులు రావుల సతీష్, రాజమౌళి గౌడ్ , గుండా శీను, కనుకుంట్ల స్వామి, తూర్పాటి రాము, రమేష్, కాంగ్రెస్ నాయకుడు దిగంబర్ తో పాటు పలువురు దేశ భక్తులు పాల్గొన్నారు.

పెద్దపల్లి: మున్సిపల్ పీఠాలను అధిష్టించిన కాంగ్రెస్

మంత్రి శ్రీధర్ బాబు ను శాలువాతో సత్కరిస్తున్న మున్సిపల్ వైస్ చైర్మన్ ముస్కుల సయేందర్ రెడ్డి,

* ప్రశాంతంగా ముగిసిన మున్సిపల్ ఎన్నికలు

పెద్దపల్లి ప్రతినిధి:

పెద్దపల్లి జిల్లాలో సుల్తానాబాద్ మున్సిపాలిటీ లో తప్ప మిగతా  పెద్దపల్లి, రామగుండం, మంథని మున్సిపాలిటీ లో పాలకవర్గం కొలువుదీరింది. పెద్దపల్లి మున్సిపల్ చైర్మన్ గా నూగిళ్ల మల్లయ్య, వైస్ చైర్మన్ గా ముస్కాన్ నాజ్ ప్రమాణస్వీకారం చేశారు. 

మంథని మున్సిపల్ చైర్మన్ గా ఓడ్నాల శ్రీనివాస్

అలాగే మంథని మున్సిపల్ చైర్మన్ గా ఓడ్నాల శ్రీనివాస్, వైస్ చైర్మన్ గా ముస్కుల మహేందర్ రెడ్డి ప్రమాణ స్వీకారం చేశారు. సుల్తానాబాద్ లో మాత్రం చైర్మన్ ఎన్నిక విషయంలో ఏకాభిప్రాయం కుదరకపోవడంతో ప్రమాణ స్వీకారం రేపటికి వాయిదా పడింది.

రామగుండం మేయర్ గా మహంకాళి స్వామి

* రామగుండం మున్సిపల్ కార్పొరేషన్ మేయర్ గా మహంకాళి స్వామి, డిప్యూటీ మేయర్ గా పాతకాల ఎల్లయ్య ప్రమాణ స్వీకారం చేశారు.

హైదరాబాద్: త్రీ ట్రిలియన్ డాలర్ల లక్ష్య సాధనలో లైఫ్ సైన్సెస్ పాత్ర కీలకం

*దేశ జీడీపీలో మన వాటాను 10 శాతానికి పెంచేందుకే "తెలంగాణ రైజింగ్ 2047"కు శ్రీకారం

*బయో ఏషియా 2026 ముగింపు వేడుకలో మంత్రి దుద్దిళ్ల శ్రీధర్ బాబు

*తెలంగాణను గ్లోబల్ లైఫ్ సైన్సెస్ పవర్‌హౌస్‌గా మార్చాలన్నదే తమ ప్రభుత్వ సంకల్పమని, ఆ దిశగా చిత్తశుద్ధితో కృషి చేస్తున్నామని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు స్పష్టం చేశారు.* లైఫ్ సైన్సెస్ రంగంలో కేవలం రెండేళ్లలోనే (డిసెంబర్ 2023 - జనవరి 2026) రూ. 73,360 కోట్ల పెట్టుబడులు ఆకర్షించి, లక్ష ఉద్యోగాలను సృష్టించామని వివరించారు. బుధవారం హైటెక్స్ లో "బయో ఏషియా 2026" సదస్సులో భాగంగా "తెలంగాణ రైజింగ్ 2047: బిల్డింగ్ ఏ వరల్డ్ క్లాస్ లైఫ్ సైన్సెస్ ఎకో సిస్టం" పేరిట నిర్వహించిన ఫైర్ సైడ్ చాట్, ముగింపు వేడుకలో ఆయన ముఖ్య అతిథిగా పాల్గొన్నారు. ఈ సందర్భంగా మంత్రి శ్రీధర్ బాబు మాట్లాడుతూ.... దేశ జీడీపీలో తెలంగాణ వాటాను 10 శాతానికి పెంచాలనే లక్ష్యంతోనే ప్రజలు, నిపుణుల భాగస్వామ్యంతో "తెలంగాణ రైజింగ్ 2047"కు శ్రీకారం చుట్టామన్నారు. 2047 నాటికి రాష్ట్ర ఆర్ధిక వ్యవస్థను 3 ట్రిలియన్ డాలర్లకు చేర్చాలనే లక్ష్య సాధనలో కీలక పాత్ర పోషించేలా లైఫ్ సైన్సెస్ రంగం ఎకో సిస్టంను మరింత బలోపేతం చేసేందుకు సమగ్ర ప్రణాళికలు రూపొందించి అమలు చేస్తున్నామన్నారు. అందులో భాగంగానే.... తెలంగాణ నెక్స్ట్ - జెన్ లైఫ్ సైన్సెస్ పాలసీ(2026- 2030), తెలంగాణ లైఫ్ సైన్సెస్ స్కూల్, 1బయో ఇంక్యూబేటర్, జీనోమ్ వ్యాలీ విస్తరణ, ఫార్మా విలేజెస్, తెలంగాణ లైఫ్ సైన్సెస్ ను మరింత బలోపేతం చేసేందుకుప్రపంచ స్థాయి మౌలిక సదుపాయాలు, అంతర్జాతీయ భాగస్వామ్యం, నైపుణ్యం కలిగిన మానవ వనరుల తయారీకి శ్రీకారం చుట్టామన్నారు. రాష్ట్రంలో ప్రస్తుతం 2,000కు పైగా లైఫ్ సైన్సెస్ సంస్థలు కార్యకలాపాలు నిర్వహిస్తున్నాయని, జాతీయ ఫార్మా ఉత్పత్తుల్లో మూడో వంతు, ఎగుమతుల్లో అయిదో వంతు వాటా తెలంగాణదే కావడం మనకు గర్వకారణమన్నారు. ఈ ఏడాది సదస్సులో సనోఫీ (Sanofi), ఒపెల్లా (Opella), వ్యాక్సిండో యానిమల్ హెల్త్, ట్రెడెన్స్, ఆర్‌ఎక్స్ ప్రొపెల్లెంట్ వంటి దిగ్గజ సంస్థలు రాష్ట్రంలో పెట్టుబడులు ముందుకొచ్చాయన్నారు. బ్రిటన్, న్యూజిలాండ్, దక్షిణ కొరియా, ఆస్ట్రేలియా, జపాన్, యూకే తదితర దేశాల నిపుణులతో లైఫ్ సైన్సెస్ రంగంలో రాబోయే రోజుల్లో ఎదురయ్యే సవాళ్లు, అనుసరించాల్సిన వ్యూహాలపై నిర్వహించిన ప్రత్యేక రౌండ్ టేబుల్ సమావేశాలు తెలంగాణ బ్రాండ్ ను మరింత విశ్వవ్యాప్తం అయ్యేందుకు దోహదం చేస్తాయన్నారు. 'బయో ఎకానమీ' రంగంలో మూడో అతిపెద్ద శక్తిగా ఎదగడానికి భారత్ కు ఉన్న అవకాశాలు, తెలంగాణ పాత్రపై చర్చించి... ప్రత్యేక కాంప్రహెన్సివ్ రోడ్ మ్యాప్ ను సిద్ధం చేసేందుకు వరల్డ్ ఎకనామిక్ ఫోరమ్‌తో కలిసి ప్రత్యేక చర్చా కార్యక్రమాలు నిర్వహించామన్నారు. ఈసారి ఫార్చ్యూన్ 500 కంపెనీల ప్రతినిధులతో పాటు దేశ విదేశాల నుంచి మొత్తం 4,394 మంది ప్రతినిధులు హాజరయ్యారన్నారు. కొత్త పెట్టుబడులు, భాగస్వామ్యాల కోసం 4వేలకు పైగా అత్యున్నత స్థాయి బిజినెస్ టూ బిజినెస్(బీ2బీ) సమావేశాలకు ఈ ఏడాది సదస్సు వేదికగా నిలిచిందన్నారు. లైఫ్ సైన్సెస్ రంగాన్ని తమ ప్రభుత్వం కేవలం వ్యాపారంగా మాత్రమే చూడటం లేదని, ఒక సామాజిక బాధ్యతగా చూస్తున్నామన్నారు. అన్ని రకాలుగా పారిశ్రామికాభివృద్ధికి అనుకూలంగా ఉన్న రాష్ట్రంలో పెట్టుబడులు పెట్టి రైజింగ్ తెలంగాణలో భాగస్వామ్యం కావాలని ఈ సందర్భంగా మంత్రి శ్రీధర్ బాబు పారిశ్రామికవేత్తలకు విజ్ఞప్తి చేశారు.

మంథని: మున్సిపల్ చైర్మన్ కు బాల్య మిత్రుల సన్మానం

మంథని మున్సిపల్ చైర్మన్‌గా ఎన్నికైన వొడ్నాల శ్రీనివాస్ ను ఖతార్ నుండి స్వదేశానికి వచ్చిన రామడుగు వేణుగోపాల్ సమక్షంలో, బాల్యమిత్రులందరూ కలిసి ఘనంగా సన్మానించారు.

మంథని పట్టణంలో ఆత్మీయ వాతావరణంలో జరిగిన కార్యక్రమంలో స్థానిక ఫ్రెండ్స్ క్లబ్ ప్రాంగణంలో 1986–87 పదవ తరగతి బ్యాచ్ మిత్రుల ఆధ్వర్యంలో ఈ సన్మాన కార్యక్రమం జరిగింది. బాల్య స్నేహబంధానికి గుర్తుగా పుష్పగుచ్ఛాలు, శాలువాతో శ్రీనివాస్ గారిని సత్కరించారు. 

ఈ కార్యక్రమంలో కాచే శశిభూషణ్ (కాంగ్రెస్ నాయకులు) , గట్టు రమేష్, అవధానుల ప్రసాద్, కొత్త శ్రీనివాస్( విశ్వహిందూ పరిషత్ అధ్యక్షులు) రమణకుమార్ (న్యాయవాది), కొత్త శ్రీనివాస్ (సింగిల్ విండో) తదితరులు పాల్గొన్నారు. మరెన్నో బాల్యమిత్రులు హాజరై అభినందనలు తెలిపారు. 

సన్మాన కార్యక్రమం అనంతరం పట్టణ అభివృద్ధి అంశాలపై చర్చ జరిగింది. ముఖ్యంగా రావులచెరువు కట్ట, తమ్మచెరువు కట్ట సుందరీకరణ, కోతుల బెడద నివారణ చర్యలు, రాబోయే పుష్కరాల ఏర్పాట్లు వంటి అంశాలపై మిత్రులు తమ సూచనలు, అభిప్రాయాలను వెల్లడించారు. పట్టణ అభివృద్ధికి తమ వంతు సహకారం అందిస్తామని హామీ ఇచ్చారు. ఈ సందర్భంగా మున్సిపల్ చైర్మన్  శ్రీనివాస్ మాట్లాడుతూ, మిత్రుల ప్రేమాభిమానాలకు కృతజ్ఞతలు తెలుపుతూ, పట్టణ అభివృద్ధి కోసం సమగ్ర ప్రణాళికతో ముందుకు సాగుతానని పేర్కొన్నారు. మంథని ప్రజలు ఇచ్చిన ఈ అవకాశాన్ని సద్వినియోగం చేసుకుంటూ మన పదవతరగతి బ్యాచికి గర్వకారణంగా మెదులుతానని హామీ ఇచ్చారు.

కరీంనగర్:మాజీ ముఖ్యమంత్రి సంజీవయ్య కు నివాళి

*దళితుల అభివృద్ధి ఔన్నత్యం కోసం నిరంతరం శ్రమించిన వ్యక్తి దామోదరం సంజీవయ్య

* మానకొండూరు ఎమ్మెల్యే, టిపిసిసి ఎస్ సి సెల్ చైర్మన్ డా.కవ్వంపల్లి సత్యనారాయణ

దిక్సూచి, కరీంనగర్:

ఉమ్మడి ఆంధ్రప్రదేశ్ మొట్టమొదటి దళిత ముఖ్యమంత్రి స్వర్గీయ దామోదరం సంజీవయ్య 105వ జయంతి సందర్భంగా నేడు కరీంనగర్ డిసిసి కార్యాలయంలో ఏర్పాటు చేసిన కార్యక్రమానికి మానకొండూరు ఎమ్మెల్యే, పిసిసి ఎస్ సి సెల్ అధ్యక్షులు డాక్టర్ కవ్వంపల్లి సత్యనారాయణ హాజరై జిల్లా కాంగ్రెస్ ఎస్ సి సెల్ అధ్యక్షులు కొరివి అరుణ్ కుమార్, జిల్లా కాంగ్రెస్ ఎస్ టి సెల్ అధ్యక్షులు బానోతు శ్రవణ్ నాయక్, జిల్లా కాంగ్రెస్ మైనారిటీ సెల్ అధ్యక్షులు ఎండి తాజుద్దీన్ తో పాటు పలువురు నాయకులతో కలిసి దామోదరం సంజీవయ్య చిత్రపటానికి పూలమాలలు వేసి ఘనంగా నివాళులు అర్పించినారు.

ఈ సందర్భంగా కార్యక్రమాన్ని ఉద్దేశించి కవ్వంపల్లి సత్యనారాయణ మాట్లాడుతూ దామోదరం సంజీవయ్య, ఆంధ్ర ప్రదేశ్ రాష్ట్ర రెండవ ముఖ్యమంత్రి మరియు తొలి దళిత ముఖ్యమంత్రి గా పని చేసినారు, కేంద్ర ప్రభుత్వములో అనేక మార్లు మంత్రిగా పనిచేయడంతో పాటు  రెండుసార్లు అఖిల భారత కాంగ్రేస్ కమిటీ అధ్యక్షుడిగా పనిచేసి అటు పార్టీకి, ఇటు ప్రజలకు సేవలు అందించినారు, ఒక పేద కుటుంబం నుండి వచ్చి దళితుల అభివృద్ధి, ఔన్నత్యం కోసం నిరంతరం శ్రమపడిన వ్యక్తి,  ఎలాంటి ఆస్తులు కూడబెట్ట కుండా పేదరికంలో జీవించిన వ్యక్తిగా చరిత్రలో నిలిచిపోయారు, వారిని ఆదర్శంగా తీసుకొని నేడు కాంగ్రెస్ పార్టీ లో వి హనుమంతరావు లాంటి వారు నేటికీ కాంగ్రెస్ పార్టీ పట్ల విధేయతతో నిబద్ధతకు కట్టుబడి పనిచేస్తున్నారని, తుది శ్వాస వరకు తన జీవితాన్ని కాంగ్రెస్ పార్టీకి అంకితం చేసిన సంజీవయ్య జయంతి సందర్భంగా వారి సేవలను స్మరించుకుంటూ ఘన నివాళులు అర్పిస్తున్నాము అని అన్నారు.

ఈ కార్యక్రమంలో నాయకులు వంగల విద్యాసాగర్,కుంభాల రాజ్ కుమార్,మామిడి అనిల్ కుమార్,బండారి రమేష్ గౌడ్, సుధాకర్ నాయక్, రంగా నాయక్, ఊట్కూరు రవీందర్ రెడ్డి,బండ విద్యాసాగర్ తదితరులు పాల్గొన్నారు.

పెద్దపల్లి: జిల్లాలో వార్ వన్ సైడే..

పెద్దపల్లి ఎమ్మెల్యే నివాసం వద్ద కోలాహలం 

పెద్దపల్లి ప్రతినిధి: 

జిల్లాలోని రామగుండం కార్పొరేషన్, మంథని, పెద్దపల్లి, సుల్తానాబాద్ మున్సిపాలిటీలు కాంగ్రెస్ పార్టీ కైవసం చేసుకుంది

పెద్దపల్లి మున్సిపాలిటీలో కాంగ్రెస్ విజయం సాధించింది. గెలిచిన అభ్యర్థులు వీరే..

01) పూరెళ్ల శైలజ (కాంగ్రెస్) 

02) పస్తం లక్ష్మి(కాంగ్రెస్)

03) మోలుగురి కమల్  (కాంగ్రెస్)

04) కొమ్ము సుధాకర్ (కాంగ్రెస్) 

05) గుజ్జులా కుమార్ (కాంగ్రెస్) 

06) వెన్నం సుజాత (బిఆర్ఎస్) 

07) ఈర్ల స్వరూప (కాంగ్రెస్)

08) ఫర్జానా నాజ్ (ind) 

09) నాదిం (కాంగ్రెస్)

10) అక్కపెల్లి సుజాత (కాంగ్రెస్)

11) పురి అనూష (కాంగ్రెస్)

12) బొడ్డుపల్లి జగదీష్ (కాంగ్రెస్)

13) పాగల శ్రీకాంత్ (కాంగ్రెస్)

14) అస్లాం పర్వేజ్(కాంగ్రెస్)

15) పెంజర్ల రాకేష్ (బీజేపీ)

16) నందిని శ్రీనివాస్ (కాంగ్రెస్)

17) తోట ఫణీంద్ర (కాంగ్రెస్)

18) కలిపాక సంపత్ (AIFB)

19) రెవెల్లి స్వామి (కాంగ్రెస్)

20)  గణపతి నిర్మల (AIFB)

21) ముగిళ్ళ మల్లయ్య (కాంగ్రెస్)

22) ఉప్పు స్వరూప (కాంగ్రెస్)

23) జడల సురేందర్ (AIFB)

24) కొట్టే స్వరూప (కాంగ్రెస్)

25) శాహానజ బేగం (ఇండిపెండెంట్)

26) సుదమల్ల అమ్రేష్ (కాంగ్రెస్)

27) ఉనుకొండ సరస్వతి (కాంగ్రెస్)

28) తూముల లత (కాంగ్రెస్)

29) ఇల్లందుల రజని (కాంగ్రెస్)

30) ముక్సుదా బేగం (AIFB)

31) మంథని నర్సింగ్ (కాంగ్రెస్)

32) తిర్రీ శ్రీలత(కాంగ్రెస్)

33) గంగుల సంధ్యారాణి (AIFB)

34) ఆశ్రఫ్ (కాంగ్రెస్)

35) దేవానoది రమాదేవి (కాంగ్రెస్)

36) మాస్కాన్ సత్(కాంగ్రెస్)

మొత్తం : 36 కాంగ్రెస్         : 27 బీ ఆర్ ఎస్   : 1, బీజేపీ            : 1, ఫార్వర్డ్ బ్లాక్  : 5, ఇండిపెండెంట్ :- 2

మంథని: మంథని మున్సిపాలిటీ "హస్త"గతం

 కౌన్సిలర్ లుగా ఎన్నికైన అభ్యర్థులు

వీడియో 

మంథని:

మంథని మున్సిపాలిటీ ఎన్నికల్లో కాంగ్రెస్ పార్టీ ఘన విజయం సాధించింది. 13 వార్డుల్లో 11 స్థానాలు గెలుచుకొని మున్సిపాలిటీని కైవసం చేసుకుంది. గెలిచిన అభ్యర్థుల వివరాలు..

1వ  వార్డు కుర్ర లింగయ్య (కాంగ్రెస్)

2వ వార్డు నూకల కమల్ (కాంగ్రెస్)

4వ వార్డు మద్దికట్ల స్రవంతి (కాంగ్రెస్)

5వ ముస్కుల సహేందర్ రెడ్డి (కాంగ్రెస్)

7వ వారు జంబోజు శ్రీమతి సమ్మయ్య (కాంగ్రెస్)

8వ వార్డు లైశెట్టి రజిత రాజు (కాంగ్రెస్)

9వ వార్డు మారుపాక నిహారిక నాగరాజు (కాంగ్రెస్)

10వ వార్డు  పెంటరి రాజేందర్ (కాంగ్రెస్)

11వ వార్డు వోడ్నాల శ్రీనివాస్ (కాంగ్రెస్)

12వ వార్డు వేముల లక్మి సమ్మయ్య (కాంగ్రెస్)

13వ వార్డు ఎల్లంకి వంశీధర్ (కాంగ్రెస్)

కాగా..

3వ వార్డు మాచిడి రాజు (బీఆర్ఎస్), 

6వ వార్డు ఇండిపెండెంట్ అభ్యర్థి పోతరవేణ క్రాంతి గెలుపొందారు.

అందరి సహకారంతో అభివృద్ధి

అందరి సహకారంతో మంథని మున్సిపాలిటీ నీ అభివృద్ధి చేస్తానని ఐటీ, పరిశ్రమల శాఖ మంత్రి శ్రీధర్ బాబు అన్నారు. ఓటర్లకు ధన్యవాదాలు తెలుపుతూ ఆయన ఒక బహిరంగ లేఖ విడుదల చేశారు. ఆ లేఖ పూర్తి పాఠం మీముందు..

ప్రియమైన మంథని మున్సిపాలిటీ ఓటర్లకు నమస్కారం

ఈ మున్సిపల్ ఎన్నికల్లో కాంగ్రెస్ పార్టీకి అఖండ విజయాన్ని అందించి, నాపై నమ్మకం ఉంచిన మీ అందరికీ పేరుపేరునా హృదయపూర్వక ధన్యవాదాలు. నాపై మీరు ఉంచిన నమ్మకానికి కృతజ్ఞతలు. 

అభివృద్ధి అంటే కేవలం మాటల్లో కాదు.. మీ కళ్ల ముందు కనిపించే మార్పులో చూపిస్తాను అని ఈ సందర్భంగా మరోసారి స్పష్టం చేస్తున్నా. మీ అందరి సహకారంతో మంథని మున్సిపాలిటీని అన్ని రంగాల్లోనూ అభివృద్ధి చేసేందుకు శాయశక్తులా కృషి చేస్తా. 

ఈ గెలుపునకు అహర్నిశలు కృషి చేసిన నా కాంగ్రెస్ పార్టీ కుటుంబ సభ్యులు, నాయకులకు పేరుపేరునా ధన్యవాదాలు.

"విజయ గర్వంతో కాదు.. బాధ్యతతో మీ సేవలో.."

ప్రేమతో... అంటూ ముగించారు.

హైదరాబాద్: రెండేళ్ల ప్రజా పాలనకు ప్రజల ఆమోద ముద్ర

*  ప్రభుత్వంపై ఉన్న విశ్వాసానికి ఈ ఫలితాలే నిదర్శనం

* రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు 

మున్సిపల్ ఎన్నికల ఫలితాలు రెండేళ్ల ప్రజా ప్రభుత్వ పాలనకు ప్రజల ఆమోద ముద్ర అని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు పేర్కొన్నారు. ఇది కేవలం రాజకీయ గెలుపు మాత్రమే కాదని, సీఎం రేవంత్ రెడ్డి నేతృత్వంలోని కాంగ్రెస్ ప్రజా ప్రభుత్వంపై ఉన్న తిరుగులేని విశ్వాసానికి నిదర్శనమని శుక్రవారం విడుదల చేసిన ఓ ప్రకటనలో స్పష్టం చేశారు. తమ స్వార్థ రాజకీయాల కోసం తెలంగాణ బ్రాండ్ ఇమేజ్ ను దెబ్బ తీయడమే అజెండాగా పెట్టుకున్న శక్తులకు ఈ ప్రజా తీర్పు ఓ చెంప దెబ్బ అని వాఖ్యానించారు. ఓ వైపు రాష్ట్ర ఆర్థిక వ్యవస్థను గాడిన పెడుతూనే.... మరోవైపు అభివృద్ధి, సంక్షేమాన్ని ప్రజల చెంతకు చేర్చాలన్న మా ప్రభుత్వ సంకల్పానికి ఈ ఫలితాలు నిదర్శనమన్నారు. ఈ గెలుపు ప్రభుత్వంపై బాధ్యతను మరింత పెంచిందని, ఈ స్ఫూర్తితో తెలంగాణను అన్ని రంగాల్లోనూ ఇతర రాష్ట్రాలకు ధీటుగా అభివృద్ధి చేసేందుకు చిత్తశుద్ధితో కృషి చేస్తామన్నారు. ఎన్నికల ముందు ఇచ్చిన హామీలను దశల వారీగా అమలు చేసి తీరుతామన్నారు. అబద్ధపు ప్రచారాలను నమ్మకుండా, అభివృద్ధికి పట్టం కట్టిన ప్రజలకు.... ఈ ఎన్నికల్లో విజయం కోసం ఏఐసీసీ ఇన్చార్జి మీనాక్షి నటరాజన్ మార్గ నిర్దేశనంలో, టీపీసీసీ అధ్యక్షులు మహేష్ కుమార్ గౌడ్ నాయకత్వంలో అహర్నిశలు కృషి చేసిన కాంగ్రెస్ పార్టీ నాయకులకు, కార్యకర్తలకు మంత్రి శ్రీధర్ బాబు ధన్యవాదాలు తెలిపారు.

వీడియో...

కరీంనగర్: బల్దియా బాద్షా ఎవరు.?

కార్నర్ మీటింగులో మాట్లాడుతూ మంత్రి శ్రీధర్ బాబు

కార్నర్ మీటింగ్ లో మాట్లాడుతున్న మంత్రి పొన్నం ప్రభాకర్, పక్కన వీ హనుమంత్ రావు (వీఎచ్)

కరీంనగర్ ప్రతినిధి:

కరీంనగర్ బల్దియాలో ఎన్నికల యుద్ధం ముగిసింది. ఫలితం మిగిలింది. పక్షం రోజుల నుంచి నువ్వ నేనా అన్నట్లుగా ప్రచారం చేసిన అభ్యరులు ఫలితం కోసం ఎదురుచూస్తున్నారు.

కాంగ్రెస్, బీజేపీ, బిఆర్ఎస్, ఎంఐఎంతో పాటు కొత్తగా ఈసారి జనసేన, ఆల్ ఇండియా ఫార్వర్డ్ బ్లాక్ తో పాటు ఇండిపెండెంట్లు కూడా పెద్ద ఎత్తున పోటీలో ఉన్నారు. ప్రధాన పార్టీల అభ్యర్థుల కోసం పార్టీ ప్రముఖ నాయకులు ప్రచారం చేశారు. బీజేపీ అభ్యర్థుల ప్రచార బాధ్యతలన్నీ భుజాన వేసుకొని కేంద్ర సహాయ మంత్రి బండి సంజయ్ అన్నీ తానై వ్యవహరించారు. కార్నర్ మీటింగ్ లతో అటు కాంగ్రెస్,  ఇటు బిఆర్ఎస్ పార్టీలపై విమర్శనాస్త్రాలు సంధిస్తూ ఓటర్లను ఆకర్షించే ప్రయత్నం చేశారు. ఒకటి రెండు స్థానాల్లో ముస్లిం అభ్యర్థులను పోటీలో పెట్టి, పార్టీ ముస్లింలకు వ్యతిరేకం కాదని ఆ ఓట్లను సైతం తమ వైపుకు తిప్పుకునే ప్రయత్నం చేసినట్లు కనిపించింది. అలాగే కాంగ్రెస్ నుంచి మంత్రులు పొన్నం ప్రభాకర్, శ్రీధర్ బాబు, తుమ్మల నాగేశ్వర్ రావు కార్నర్ మీటింగ్ లతో అన్ని డివిజన్లలో ప్రచారం చేశారు. బిఆర్ఎస్ నుంచి కరీంనగర్ ఎమ్మెల్యే గంగుల కమలాకర్ సైతం డివిజన్ లలో ప్రచారం చేస్తూ కాంగ్రెస్, బీజేపీలపై విమర్శలు చేస్తూ ఓట్లు అభ్యర్థించారు. అన్ని ప్రధాన పార్టీలు ర్యాలీలు, కార్నర్ మీటింగ్ లు, బహిరంగ సభలతో ప్రచారాన్ని హోరెత్తించాయి. డివిజన్ లలో అభ్యర్థులు ఇంటింటి ప్రచారంలో పోటాపోటీగా నిర్వహించారు.

పోలింగ్ ఎలా జరిగిందంటే..?

కరీంనగర్ కార్పొరేషన్ పరిధిలో 66 డివిజన్లలో  3,40,580 ఓటర్లు ఉండగా, 2,14,486 ఓట్లు పోల్ అయ్యాయి. వాటిలో పురుషులు 1,05,579, మహిళలు 1,08,888 మంది తమ ఓటు హక్కు వినియోగించుకున్నారు. మొత్తానికి 62.98 శాతం ఓటింగ్ పూర్తయినట్లు అధికారులు ధృవీకరించారు. శుక్రవారం కరీంనగర్ ఎస్ఆర్ఆర్ కళాశాలలో ఎన్నికల కౌంటింగ్ కు ఏర్పాట్లు చేశారు. ఏ డివిజన్ లో ఏ పార్టీ అభ్యర్థికి ఎడ్జ్ ఉంది.. ఎవరు గెలిచే అవకాశాలు ఉన్నాయనే విషయమై ఎవరికి వారే అంచనా వేసుకుంటున్నారు.

*అంతుపట్టని ఓటరు అంతరంగం*

*కరీంనగర్ బల్దియా ఎన్నికల్లో ఓటరు అంతరంగం అంతుపట్టకుండా ఉంది. పోలింగ్ పూర్తయిన తరువాత అభ్యర్థులు తమ డివిజన్ లో ఓటర్లు ఎవరికి ఓటు వేశారో తేలుసుకోలేక అయోమయంలో ఉన్నారు.

*ఇండిపెండెంట్ అభ్యర్థుల వల్ల ప్రధాన పార్టీ అభ్యర్థులకు తలనొప్పిగా మారింది. ఏ పార్టీ అభ్యర్థుల ఓట్లపై ప్రభావం చూపుతుందోననే భయం పట్టుకుంది. ప్రధాన పార్టీల వల్ల టికెట్ రాకుండా భంగపడ్డ అభ్యర్థులు మరో పార్టీ నుంచి, ఇండిపెండెంట్ అభ్యర్థులుగా రంగంలోకి దిగడంతో కూడా ఫలితాలు తారుమారు అయ్యే అవకాశాలు మెండుగా ఉన్నాయి.

మంథని: మంథని మున్సిపాలిటీ మాదే.. శ్రీధర్ బాబు కాంగ్రెస్ భారీ ర్యాలీ

* ప్రచారంలో పాల్గొన్న మంత్రి శ్రీధర్ బాబు

* మంథని మున్సిపల్ లో కాంగ్రెస్ పార్టీ జెండా ఎగరవేస్తాం

మంథని:

మున్సిపల్ ఎన్నికల్లో భాగంగా సోమవారం కాంగ్రెస్ పార్టీ ఆధ్వర్యంలో మంథనిలోని  శ్రీపాదరావు  విగ్రహం నుంచి అంబేద్కర్ చౌక్ వరకు రోడ్ షో నిర్వహించారు. ఈ కార్యక్రమాన్ని ఉద్దేశించి రాష్ట్ర ఐటీ, పరిశ్రమలు, శాసనసభ వ్యవహారాల మంత్రి దుద్దిల్ల శ్రీధర్ బాబు మాట్లాడుతూ కాంగ్రెస్ రాష్ట్ర ప్రభుత్వం సంక్షేమ పథకాలను నిరుపేద కుటుంబాలకు అందజేస్తూ ముందుకు వెళ్తుందని ఎక్కడ కూడా అవినీతి జరగకుండా నేరుగా పేదలకు చేరవేస్తున్నామని రానున్న రోజులలో మరింత మంథని పట్టణాన్ని అభివృద్ధి చేసుకుంటూ ముందుకెళ్తామని అన్నారు. ముఖ్యమంత్రి రేవంత్ రెడ్డి సహకారంతో మంథని నియోజకవర్గానికి అధిక నిధులు తీసుకురావడం జరిగిందనీ అన్నారు. ఇప్పుడు కాంగ్రెస్ పార్టీ 13 మంది అభ్యర్థులను గెలిపించడం ద్వారా మంథని పట్టణ అధిక నిధులు కేటాయించి అభివృద్ధి జరుగుతుందని పనిచేసే వారికే ఓటు వేయాలని కోరారు. ప్రతిపక్షాలకు ఓటు వేయడం వృధా అని తెలిపారు. ప్రతి పేదవాడికి సంక్షేమ పథకాలు ఇల్లు లేని నిరుపేదలకు ఇందిరమ్మ ఇల్లులు, మహిళలకు డ్వాక్రా సంఘాల ద్వారా కోటి మంది మహిళలను కోటీశ్వరులను చేయడమే లక్ష్యంగా పనిచేస్తున్నామని ఆయన అన్నారు. కుట్టుమిషన్ల ద్వారా మహిళలకు జీవనోపాధి కల్పిస్తూ వారి ఆర్థిక అభివృద్ధికి దోహదం చేస్తాయన్నారు. ఇప్పటికే మంథని మున్సిపల్ కార్యాలయం సంబంధించిన నిర్మాణ పనులు జరుగుతున్నాయి, దరఖాస్తుదారులు ఎవరైనా వచ్చిన వెంటనే దరఖాస్తుకు సంబంధించి పూర్తి వివరాలు సేకరించి వారికి త్వరితగతిన విచారణ చేసి పనులు చేస్తామని మంత్రి తెలిపారు.

ప్రతి ఒక్కరికి వైద్యం అందాలనే ఉద్దేశంతో మంథనిలో ఐదు పడకల డయాసిస్ సెంటర్ ను ఏర్పాటు చేయడం జరిగిందని, ఎంపీడీవో ఆఫీస్ దగ్గర్లో నూతన 50 పడకల ఆసుపత్రికి నిర్మాణ పనులు జరుగుతున్నాయని త్వరలోనే అందుబాటులోకి తీసుకువస్తామని స్పష్టం చేశారు. కాబట్టి రాష్ట్రంలో ఉన్న కాంగ్రెస్ పార్టీ ప్రభుత్వంలో ఉన్న అభ్యర్థులను గెలిపించుకొని మన మంథని పట్టణాన్ని అభివృద్ధి చేసుకోవాలని ప్రతి ఒక్కరూ చేతి గుర్తు పై ఓటు వేసి కాంగ్రెస్ పార్టీ 13 వార్డు అభ్యర్థులను అత్యధిక మెజార్టీతో గెలిపించాలని మంత్రి మంథని పట్టణ ప్రజలకు పిలుపునిచ్చారు. ఈ కార్యక్రమంలో 13 వార్డులకు సంబంధించిన మున్సిపల్ కాంగ్రెస్ అభ్యర్థులు, కాంగ్రెస్ పార్టీ సీనియర్ నాయకులు, యూత్ కాంగ్రెస్ నాయకులు, అనుబంధ సంఘాల నాయకులు, మహిళా నాయకులు, కాంగ్రెస్ పార్టీ అభిమానులు, తదితరులు పాల్గొన్నారు