: కేంద్ర మంత్రి కిషన్ రెడ్డి
40–50 ఏళ్ల పాటు బొగ్గు ఉత్పత్తి.. రూ.1.20 లక్షల కోట్ల టర్నోవర్‌కు అవకాశం
దిక్సూచి, తాడిచెర్ల :
తాడిచెర్ల కోల్‌బ్లాక్–2 తెలంగాణ రాష్ట్రానికే మణికిరీటంగా నిలవనుందని, సింగరేణి చరిత్రలోనే ఇది అతిపెద్ద బొగ్గు గనిగా అభివృద్ధి చెందబోతోందని కేంద్ర బొగ్గు గనుల శాఖ మంత్రి జి. కిషన్ రెడ్డి అన్నారు. సింగరేణి భరోసా యాత్రలో భాగంగా తాడిచెర్లలో నిర్వహించిన కార్నర్ మీటింగ్‌లో ఆయన మాట్లాడారు.
తాడిచెర్ల కోల్‌బ్లాక్ అంశం గత రెండు దశాబ్దాలుగా చర్చలో ఉన్న విషయమని, ఈ ప్రాంతంలో బొగ్గు తవ్వకాల ద్వారా ఉపాధి, అభివృద్ధి సాధించాలని ప్రజలు ఎన్నో ఏళ్లుగా ఎదురుచూస్తున్నారని తెలిపారు. ప్రధాని నరేంద్ర మోదీ నాయకత్వంలోని కేంద్ర ప్రభుత్వం తాడిచెర్ల కోల్‌బ్లాక్–2ను సింగరేణికి కేటాయిస్తూ చారిత్రక నిర్ణయం తీసుకుందని చెప్పారు.
ఈ గనిలో సుమారు 350 మిలియన్ మెట్రిక్ టన్నుల బొగ్గు నిల్వలు ఉన్నాయని, 40 నుంచి 50 సంవత్సరాల పాటు ఉత్పత్తి కొనసాగే సామర్థ్యం ఉందన్నారు. ప్రస్తుత మార్కెట్ విలువ ప్రకారం ఈ గని ద్వారా సుమారు రూ.1.20 లక్షల కోట్ల టర్నోవర్ నమోదయ్యే అవకాశముందని వివరించారు.
కోల్‌బ్లాక్–2 ద్వారా 2,000 శాశ్వత ఉద్యోగాలు, 5,000 కాంట్రాక్ట్ ఉద్యోగాలు ప్రత్యక్షంగా లభిస్తాయని, పరోక్షంగా వేలాది మందికి ఉపాధి అవకాశాలు ఏర్పడతాయని మంత్రి తెలిపారు. డ్రైవర్లు, హోటళ్లు, లాడ్జీలు, వాహనాల మరమ్మతు కేంద్రాలు, చిన్న పరిశ్రమలు, ఇతర అనుబంధ వ్యాపారాలు అభివృద్ధి చెంది ప్రాంతీయ ఆర్థిక వ్యవస్థకు కొత్త ఊపు వస్తుందని పేర్కొన్నారు.
దక్షిణ భారతదేశంలోనే, తెలంగాణలోనే అతిపెద్ద కోల్‌బ్లాక్‌గా తాడిచెర్ల కోల్‌బ్లాక్–2 నిలవబోతోందని, దీనిని **"బాహుబలి కోల్ మైన్"**గా అభివర్ణించారు. ఈ ప్రాజెక్టును సాకారం చేసిన ప్రధాని నరేంద్ర మోదీకి గ్రామ ప్రజలు, సింగరేణి కార్మికులు, తెలంగాణ ప్రజల తరఫున కృతజ్ఞతలు తెలియజేస్తున్నట్లు కిషన్ రెడ్డి చెప్పారు.
అవసరమైన అన్ని పర్యావరణ, పరిపాలనా అనుమతులను త్వరితగతిన పూర్తి చేసి, సింగరేణి ద్వారా తవ్వకాల పనులను వీలైనంత త్వరగా ప్రారంభించేలా చర్యలు తీసుకుంటామని ఆయన హామీ ఇచ్చారు.
కామెంట్‌లు లేవు:
కామెంట్‌ను పోస్ట్ చేయండి