దిక్సూచి, సిరిసిల్ల:
సినిమాల్లో కేసీఆర్‌ కనిపించాడని మురిసిపోతూ, సినిమాలను చూసేందుకు ఎగబడుతూ.. వాటిని సామాజిక మాధ్యమాల్లో ప్రచారం చేసుకునే పనిలో కేటీఆర్‌ నిమగ్నమై ఉన్న సమయంలో.. ఆయన సొంత అడ్డాగా భావించే సిరిసిల్లలో సీఎం రేవంత్‌రెడ్డి భారీ ర్యాలీ, బహిరంగ సభ నిర్వహించడం రాజకీయంగా ఆసక్తికరంగా మారింది.
సిరిసిల్ల పర్యటనలో రేవంత్‌రెడ్డి అభివృద్ధి కార్యక్రమాలకు శ్రీకారం చుట్టడంతో పాటు బీఆర్‌ఎస్‌ పాలనపై తీవ్రస్థాయిలో విమర్శలు గుప్పించారు. ముఖ్యంగా కేటీఆర్‌ను లక్ష్యంగా చేసుకుని గత ప్రభుత్వ హయాంలో చోటుచేసుకున్నట్లు ప్రభుత్వం ఆరోపిస్తున్న ప్రజావ్యతిరేక విధానాలు, ఆర్థిక వ్యవహారాలు, చేనేత రంగం సమస్యలు, సిరిసిల్ల అభివృద్ధికి సంబంధించిన అంశాలను ప్రస్తావించారు.
కేటీఆర్‌ ప్రాతినిధ్యం వహిస్తున్న నియోజకవర్గంలోనే సీఎం భారీ సభ నిర్వహించడం ద్వారా కాంగ్రెస్ రాజకీయంగా తన బలాన్ని చాటుకునే ప్రయత్నం చేసింది. సభకు పెద్ద సంఖ్యలో కాంగ్రెస్ కార్యకర్తలు, ప్రజలు తరలిరావడంతో సిరిసిల్లలో రాజకీయ వాతావరణం వేడెక్కింది.
బీఆర్‌ఎస్‌ పదేళ్ల పాలనలో సిరిసిల్లకు ఏం జరిగింది? ప్రజలకు ఏం దక్కింది? చేనేత కార్మికుల పరిస్థితి ఎలా మారింది? అనే అంశాలను ప్రస్తావిస్తూ సీఎం గత పాలనపై ప్రశ్నలు సంధించారు. అదే సమయంలో కాంగ్రెస్ ప్రభుత్వం అధికారంలోకి వచ్చిన తర్వాత చేపట్టిన అభివృద్ధి కార్యక్రమాలు, నిధుల కేటాయింపులను ప్రజల ముందు ఉంచారు.
మరోవైపు సీఎం ఆరోపణలను బీఆర్‌ఎస్‌ ఖండిస్తోంది. సిరిసిల్ల అభివృద్ధిపై ప్రభుత్వం శ్వేతపత్రం విడుదల చేయాలని, సీఎం చేసిన ఆరోపణలకు ఆధారాలు చూపాలని కేటీఆర్‌ డిమాండ్‌ చేస్తున్నారు.
దీంతో సిరిసిల్ల సభ కాంగ్రెస్–బీఆర్‌ఎస్‌ మధ్య మరోసారి మాటల యుద్ధానికి వేదికగా మారింది. కేటీఆర్‌ సొంత నియోజకవర్గంలో రేవంత్‌రెడ్డి నిర్వహించిన భారీ ర్యాలీ, సభ.. వచ్చే స్థానిక, రాజకీయ సమీకరణాలపై కాంగ్రెస్ వేస్తున్న అడుగులకు సంకేతంగా నిలిచిందన్న చర్చ రాజకీయ వర్గాల్లో సాగుతోంది.
కామెంట్‌లు లేవు:
కామెంట్‌ను పోస్ట్ చేయండి