అర్హులైన నిరుపేదలందరికీ ఇందిరమ్మ ఇళ్లు

చిన్నారికి అక్షర శ్రీకారం చేస్తున్న మంత్రి శ్రీధర్​బాబు

దిక్సూచి,  మహాముత్తారం, ఆగస్టు 10:

అర్హులైన నిరుపేదలందరికీ ఇందిరమ్మ ఇళ్లు అందించడమే కాంగ్రెస్‌ ప్రభుత్వ లక్ష్యమని రాష్ట్ర ఐటీ, పరిశ్రమలు, శాసనసభ వ్యవహారాల మంత్రి దుద్దిళ్ల శ్రీధర్‌బాబు అన్నారు. గత ప్రభుత్వం అర్హులైన పేదలకు ఇళ్లు మంజూరు చేయడంలో నిర్లక్ష్యం చేసిందని విమర్శించారు.

మహాముత్తారం మండలంలోని ములుగుపల్లి గ్రామంలో రెండు, మహాముత్తారం గ్రామంలో మరో రెండు అంగన్‌వాడీ కేంద్రాలను మంత్రి శ్రీధర్‌బాబు ప్రారంభించారు. అనంతరం మహాముత్తారం ఎంపీడీవో కార్యాలయంలో నిర్వహించిన కార్యక్రమంలో 34 కల్యాణలక్ష్మి, 17 సీఎంఆర్‌ఎఫ్‌, ఇందిరమ్మ పథకాలకు సంబంధించిన మంజూరు పత్రాలు, చెక్కులను లబ్ధిదారులకు పంపిణీ చేశారు.   

ఈ సందర్భంగా మంత్రి మాట్లాడుతూ.. కాంగ్రెస్‌ ప్రభుత్వం అధికారంలోకి వచ్చిన వెంటనే అర్హులైన నిరుపేదలకు ఇందిరమ్మ ఇళ్లు మంజూరు చేస్తున్నట్లు తెలిపారు. గతంలో ఇందిరమ్మ ఇళ్లకు సంబంధించిన బిల్లులు పొందినట్లు ఆన్‌లైన్‌లో చూపుతున్నప్పటికీ వాస్తవంగా లబ్ధిదారులకు అందని సందర్భాలు ఉంటే వాటిని ప్రభుత్వం దృష్టికి తీసుకురావాలని సూచించారు. ఇలాంటి వ్యవహారాల్లో బాధ్యులను గుర్తించి కఠిన చర్యలు తీసుకుంటామని హెచ్చరించారు. ప్రైవేట్‌ ఆస్పత్రుల్లో చికిత్స పొందుతున్న పేదలకు ముఖ్యమంత్రి సహాయనిధి ద్వారా పెద్ద ఎత్తున ఆర్థిక సహాయం అందిస్తున్నామని శ్రీధర్‌బాబు తెలిపారు. అర్హులైన ప్రతి ఒక్కరికీ సీఎంఆర్‌ఎఫ్‌ ద్వారా సహాయం అందేలా చర్యలు తీసుకుంటున్నామని పేర్కొన్నారు. మహాముత్తారం మండలంలోని రోడ్లు, డ్రైనేజీ, ఆస్పత్రి తదితర సమస్యల పరిష్కారంపై ప్రత్యేక దృష్టి సారిస్తున్నామని చెప్పారు. ప్రధాన రహదారుల పనులను త్వరితగతిన పూర్తి చేస్తామని, ఇప్పటికే కొన్ని రోడ్ల పనులు పూర్తయ్యాయని తెలిపారు. రానున్న రోజుల్లో మారుమూల ప్రాంతమైన మహాముత్తారాన్ని మరింత అభివృద్ధి చేస్తామని హామీ ఇచ్చారు. మంథని నియోజకవర్గ ప్రజలంతా సుఖసంతోషాలతో ఉండాలని ఎల్లప్పుడూ కోరుకునే వ్యక్తినని, ప్రజలకు సేవ చేసే అవకాశాన్ని కల్పించినందుకు ప్రతి ఒక్కరికీ కృతజ్ఞతలు తెలుపుతున్నానని మంత్రి శ్రీధర్‌బాబు అన్నారు.

ఈ కార్యక్రమంలో కాంగ్రెస్‌ పార్టీ నాయకులు, ప్రజాప్రతినిధులు, అధికారులు, కార్యకర్తలు, లబ్ధిదారులు తదితరులు పాల్గొన్నారు.