రైతులను తప్పుదోవ పట్టిస్తున్న హరీష్​రావు

హైదరాబాద్ లో అసెంబ్లీ సీఎల్పీ కార్యాలయంలో మీడియా సమావేశంలో మాట్లాడుతున్న ప్రభుత్వ విప్, పెద్దపల్లి ఎమ్మెల్యే  చింతకుంట విజయరమణ రావు 

 

క‌న్నెప‌ల్లి పంప్ హౌస్ నుంచి నీళ్లు ఇవ్వొచ్చున‌ని హ‌రీష్ రావు త‌ప్పుదోవ ప‌ట్టిస్తున్నాడు 

కాళేశ్వ‌రం ప్రాజెక్టును ల‌క్షా నాలుగువేల కోట్లు పెట్టి నిర్మించిన రైతుల‌కు ప్ర‌యోజ‌నం క‌ల్గ‌లేదు.. 

ప్రాణ‌హిత కు వైఎస్ రాజ‌శేఖ‌ర్ రెడ్డి హ‌యాంలోనే ప్రాణం పోశారు 

హైదరాబాద్: కాళేశ్వరం ప్రాజెక్టు పేరుతో బీఆర్ఎస్ ప్రభుత్వం ప్రజాధనాన్ని దుర్వినియోగం చేసి రైతులను మోసం చేసిందని ప్రభుత్వ విప్, పెద్దపల్లి ఎమ్మెల్యే చింతకుంట విజయరమణ రావు ఆరోపించారు. హైదరాబాద్‌లోని సీఎల్పీ కార్యాలయంలో గురువారం నిర్వహించిన మీడియా సమావేశంలో ఆయన మాట్లాడుతూ, తుమ్మిడిహట్టి వద్ద బ్యారేజీ నిర్మించి 16.40 లక్షల ఎకరాలకు సాగునీరు అందించేలా రూ.38 వేల కోట్లతో డీపీఆర్ సిద్ధం చేసినప్పటికీ, కేసీఆర్ ప్రభుత్వం ప్రాణహిత-చేవెళ్ల ప్రాజెక్టును పక్కనపెట్టి రీడిజైన్ పేరుతో కాళేశ్వరం ప్రాజెక్టును చేపట్టిందని విమర్శించారు.

2012లో అప్పటి ముఖ్యమంత్రి కిరణ్ కుమార్ రెడ్డి హయాంలో మహారాష్ట్ర ప్రభుత్వం 148 మీటర్ల ఎత్తుకు అంగీకరించిందని, ఉమ్మడి రాష్ట్రంలో రూ.5,523 కోట్లు, అనంతరం కేసీఆర్ ప్రభుత్వం మరో రూ.6 వేల కోట్లు ఖర్చు చేసిన తర్వాత కూడా ప్రాణహిత-చేవెళ్ల ప్రాజెక్టును విరమించారని తెలిపారు. రూ.1.04 లక్షల కోట్లతో నిర్మించిన కాళేశ్వరం ప్రాజెక్టు రైతులకు ఆశించిన ప్రయోజనం అందించలేదని ఆరోపించారు.

ప్రాణహిత ప్రాజెక్టుకు దివంగత ముఖ్యమంత్రి వైఎస్ రాజశేఖరరెడ్డి హయాంలోనే రూపం వచ్చిందని పేర్కొన్న ఆయన, బీఆర్ఎస్ పాలనలో నాలుగేళ్లలో కాళేశ్వరం ద్వారా కేవలం 162 టీఎంసీల నీటినే ఎత్తిపోశారని, అందులో 63 టీఎంసీలను తిరిగి నదిలోకి వదిలేశారని చెప్పారు. నికరంగా 74 టీఎంసీల నీటినే వినియోగించారని, ఎల్లంపల్లి నీటిని కూడా కాళేశ్వరం నీటిగా చూపించారని ఆరోపించారు.

కన్నెపల్లి పంప్‌హౌస్ నుంచే ఉత్తర తెలంగాణకు నీరు అందించవచ్చని మాజీ మంత్రి హరీశ్ రావు రైతులను తప్పుదోవ పట్టిస్తున్నారని విమర్శించారు. కాళేశ్వరం బ్యారేజీలు పనికిరావని జాతీయ డ్యామ్ భద్రతా సంస్థ (ఎన్‌డీఎస్‌ఏ) నివేదిక ఇచ్చిందని, 2023 అక్టోబరులో మేడిగడ్డ బ్యారేజీ 19వ పిల్లర్ కుంగిపోయిన తర్వాత వచ్చిన నివేదికను అప్పటి ప్రభుత్వం దాచిపెట్టిందని ఆరోపించారు.

కాళేశ్వరం ద్వారా కనీసం లక్ష ఎకరాలకు కూడా సాగునీరు అందలేదని, ఏ నియోజకవర్గానికి ఎంత నీరు అందిందో శ్వేతపత్రం విడుదల చేయాలని ఆయన డిమాండ్ చేశారు. కాళేశ్వరం కోసం తీసుకున్న అప్పుల్లో ఇప్పటివరకు తమ ప్రభుత్వం రూ.33,574 కోట్ల అసలు, రూ.417 కోట్ల వడ్డీ చెల్లించిందని, కేవలం 74 టీఎంసీల నీటిని ఎత్తిపోసేందుకు రూ.9 వేల కోట్ల విద్యుత్ ఛార్జీలు చెల్లించాల్సి వచ్చిందని తెలిపారు.

తుమ్మిడిహట్టి వద్ద బ్యారేజీ నిర్మాణాన్ని తమ ప్రభుత్వం పూర్తి చేసి, గ్రావిటీ ద్వారా నీటిని ఎల్లంపల్లి జలాశయానికి తరలిస్తామని విజయరమణ రావు చెప్పారు. రైతులకు సాగునీరు అందించడం, కాళేశ్వరం బ్యారేజీల రక్షణ కల్పించడమే ప్రభుత్వ లక్ష్యమని పేర్కొన్నారు. ఎల్‌నినో ప్రభావాన్ని కూడా రాజకీయాలకు ఉపయోగించుకోవడం సరికాదని, రైతులను రెచ్చగొట్టే ప్రయత్నాలను ప్రజలు నమ్మరని అన్నారు.