మంత్రి దుద్దిళ్ల శ్రీధర్‌బాబు రేపు పర్యటన వివరాలు

 

దిక్సూచి,  మంథని, ఆగస్టు 23: రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు సోమవారం (ఆగస్టు 24) మంథని నియోజకవర్గంలో పలు అభివృద్ధి కార్యక్రమాల్లో పాల్గొననున్నారు.

ఉదయం 9 గంటలకు గంగాపురిలో హరే రామ హరే కృష్ణ ట్రస్ట్ ఆధ్వర్యంలో ఏర్పాటు చేసిన సెంట్రలైజ్డ్ కమ్యూనిటీ కిచెన్‌ను మంత్రి ప్రారంభించనున్నారు. పెద్దపల్లి, భూపాలపల్లి జిల్లాల్లోని ప్రభుత్వ పాఠశాలల్లో చదువుతున్న సుమారు 22 వేల మంది విద్యార్థులకు ఉదయం టిఫిన్ అందించే కార్యక్రమం ఈ వంటశాల ద్వారా కొనసాగనుంది.

ఉదయం 10.30 గంటలకు గంగాపురిలో రూ.2.55 కోట్లతో నిర్మించిన 33/11 కేవీ విద్యుత్ సబ్‌స్టేషన్‌ను మంత్రి ప్రారంభిస్తారు.

అనంతరం ఉదయం 11.30 గంటలకు కమాన్‌పూర్ మండలంలో రూ.75 లక్షలతో నిర్మించిన తహసీల్దార్ (ఎంఆర్‌ఓ) కార్యాలయాన్ని ప్రారంభిస్తారు. అనంతరం ఆదివరాహ స్వామి ఆలయానికి రూ.95 లక్షలతో నిర్మించిన సీసీ రోడ్డును ప్రారంభించనున్నారు. కమాన్‌పూర్ గ్రామంలో రూ.30 లక్షలతో చేపట్టనున్న ఈజీఎస్ పనులకు శ్రీకారం చుడతారు.

అలాగే గుండారం గ్రామం రాజాపూర్ నుంచి మంగపేట వరకు రూ.3.05 కోట్లతో నిర్మించనున్న వంతెనకు శంకుస్థాపన చేస్తారు. అనంతరం ఆదివరాహ స్వామి జయంతి కార్యక్రమంలో మంత్రి శ్రీధర్‌బాబు పాల్గొంటారు.